Триодь Цветная. Последование Вечерни в среду Светлой седмицы.
Последование Вечерни
во свети́льничном, по Христо́с воскре́се, и ектении́, пое́м стихи́ры воскре́сны 3, гла́с 5:
Честны́м Твои́м Кресто́м Христе́, диа́вола посрами́л еси́, и Воскресе́нием Твои́м жа́ло грехо́вное притупи́л еси́, и спа́сл еси́ ны́ от вра́т сме́ртных: сла́вим Тя́ Единоро́дне.
Воскресе́ние дая́й ро́ду челове́ческому, я́ко овча́ на заколе́ние веде́ся: устраши́шася сего́ кня́зи а́дстии, и взя́шася врата́ плаче́вная. Вни́де бо Ца́рь сла́вы Христо́с, глаго́ля су́щым во у́зах, изыди́те: и су́щым во тьме́, откры́йтеся.
Ве́лие чу́до, неви́димых Соде́тель, за человеколю́бие пло́тию пострада́в, воскре́се Безсме́ртный, прииди́те оте́чествия язы́к, Тому́ поклони́мся: благоутро́бием бо Его́ от пре́лести изба́вльшеся, в Трие́х Ипоста́сех Еди́наго Бо́га пе́ти навыко́хом.
И восто́чны 3, гла́с то́йже:
Вече́рнее поклоне́ние прино́сим Тебе́ Невече́рнему Све́ту, на коне́ц веко́в, я́ко в зерца́ле пло́тию возсия́вшему ми́рови, и да́же до а́да низше́дшему, и та́мо су́щую тьму́ разруши́вшему, и све́т Воскресе́ния язы́ком показа́вшему: Светода́вче Го́споди сла́ва Тебе́.
Нача́льника спасе́ния на́шего, Христа́ славосло́вим: Тому́ бо из ме́ртвых воскре́сшу, ми́р от пре́лести спасе́н бы́сть. Ра́дуется ли́к А́нгельский, бе́гает де́монов пре́лесть, Ада́м пады́й воста́, диа́вол упраздни́ся.
И́же от кустоди́и науче́ни быва́ху от беззако́нник, покры́йте Христо́во Воста́ние, и приими́те сре́бреники, и рцы́те я́ко на́м спя́щым, из гро́ба укра́ден бы́сть Ме́ртвый. Кто́ ви́де, кто́ слы́ша, мертвеца́ укра́дена когда́, па́че же пома́зана и на́га, оста́вльша и во гро́бе погреба́льная Своя́? не прельща́йтеся иуде́е, навы́кните рече́нием проро́ческим, и уразуме́йте, я́ко То́й е́сть вои́стинну Изба́витель ми́ра, и Всеси́льный.
Сла́ва:
Го́споди, а́д плени́вый, и сме́рть попра́вый Спа́се на́ш, просвети́вый ми́р Кресто́м честны́м, поми́луй на́с.
И ны́не: Богоро́дичен:
В Чермне́м мо́ри, Неискусобра́чныя Неве́сты о́браз написа́ся иногда́: та́мо Моисе́й, раздели́тель воды́: зде́ же Гаврии́л, служи́тель чудесе́. Тогда́ глубину́ ше́ствова немо́кренно Изра́иль: ны́не же Христа́ роди́ безсе́менно Де́ва. Мо́ре по проше́ствии Изра́илеве, пребы́сть непрохо́дно: Непоро́чная по Рождестве́ Емману́илеве, пребы́сть Нетле́нна. Сы́й, и пре́жде Сы́й, явле́йся я́ко Челове́к, Бо́же поми́луй на́с.
Вхо́д с кади́лом. Све́те ти́хий: И проки́мен, гла́с 7: Внуши́ Бо́же моли́тву мою́, и не пре́зри моле́ния моего́. Сти́х: Вонми́ ми, и услы́ши мя́. Сти́х: Я́ко уклони́ша на мя́ беззако́ние. Сти́х: А́з к Бо́гу воззва́х, и Госпо́дь услы́ша мя́, ве́чер и зау́тра и полу́дне. Та́же: Внуши́ Бо́же моли́тву мою́, и не пре́зри моле́ния моего́. Ектениа́: и Сподо́би Го́споди в ве́чер се́й: И про́чая вся́, я́коже предъяви́ся.
На стихо́вне, стихи́ра воскре́сна, гла́с 5:
Тебе́ Воплоще́ннаго Спа́са Христа́, и Небе́с не разлучи́вшася, во гла́сех пе́ний велича́ем: я́ко Кре́ст и сме́рть прия́л еси́ за ро́д на́ш, я́ко Человеколю́бец Госпо́дь, испрове́ргий а́дова врата́, тридне́вно воскре́сл еси́, спаса́я ду́шы на́шя.
И стихи́ры па́схи, с припе́вы и́х, я́коже предписа́ся. Христо́с воскре́се: три́жды. И отпу́ст.
