Триодь Цветная. Последование Вечерни в пятницу Светлой седмицы.

Последование Вечерни

по е́же Христо́с воскре́се: и ектении́, на Го́споди воззва́х: поста́вим стихо́в 6, и пое́м стихи́ры воскре́сны, гла́с 8:

Вече́рнюю пе́снь, и слове́сную слу́жбу, Тебе́ Христе́ прино́сим: я́ко благоволи́л еси́ поми́ловати на́с воскресе́нием.

Го́споди, Го́споди, не отве́ржи на́с от Твоего́ лица́: но благоволи́ поми́ловати на́с Воскресе́нием.

Ра́дуйся, Сио́не святы́й, ма́ти Церкве́й, Бо́жие жили́ще, ты́ бо прия́л еси́ пе́рвый, оставле́ние грехо́в, воскресе́нием.

Восто́чны три́, гла́с то́йже:

Е́же от Бо́га Отца́ Сло́во, пре́жде ве́к ро́ждшееся, в после́дняя же времена́, То́ежде от Неискусобра́чныя вопло́щшееся во́лею, распя́тие сме́ртное претерпе́: и дре́вле умерщвле́ннаго челове́ка спасе́ Свои́м Воскресе́нием.

Е́же из ме́ртвых Твое́ Воскресе́ние славосло́вим Христе́, и́мже свободи́л еси́ Ада́мский ро́д от а́дова мучи́тельства: и дарова́л еси́ ми́рови я́ко Бо́г жи́знь ве́чную, и ве́лию ми́лость.

Сла́ва Тебе́ Христе́ Спа́се, Сы́не Бо́жий единоро́дный, пригвозди́выйся на Кресте́, и воскресы́й из гро́ба тридне́вен.

Сла́ва:

Тебе́ сла́вим Го́споди, во́лею на́с ра́ди Кре́ст претерпе́вшаго, и Тебе́ покланя́емся Всеси́льне Спа́се: не отве́ржи на́с от лица́ Твоего́, но услы́ши и спаси́ ны Воскресе́нием Твои́м, Человеколю́бче.

И ны́не: Богоро́дичен:

Ца́рь Небе́сный за человеколю́бие на земли́ яви́ся, и с челове́ки поживе́: от Де́вы бо Чи́стыя пло́ть прие́мый, и из Нея́ проше́дый с восприя́тием: еди́н е́сть Сы́н, сугу́б естество́м, но не ипоста́сию. Те́мже соверше́нна Того́ Бо́га, и соверше́нна Челове́ка вои́стинну пропове́дающе, испове́дуем Христа́ Бо́га на́шего: Его́же моли́ Ма́ти Безневе́стная, поми́ловатися душа́м на́шым.

Вхо́д: Све́те ти́хий: Проки́мен гла́с 8: Да́л еси́ достоя́ние боя́щымся Тебе́ Го́споди. Сти́х: От коне́ц земли́ к Тебе́ воззва́х. Сти́х: Покры́юся в кро́ве кри́л Твои́х. Сти́х: Та́ко воспою́ и́мени Твоему́ во ве́ки. И па́ки: Да́л еси́ достоя́ние боя́щымся Тебе́ Го́споди. Та́же, ектениа́, Сподо́би Го́споди в ве́чер се́й: и про́чая.

На стихо́вне стихи́ра воскре́сна, гла́с 8:

Возше́л еси́ на Кре́ст Иису́се, снизше́дый с небесе́: прише́л еси́ на сме́рть Животе́ безсме́ртный, к су́щым во тьме́ Све́т и́стинный: к па́дшым все́х Воскресе́ние, просвеще́ние, и Спа́се на́ш, сла́ва Тебе́.

Та́же стихи́ры па́схи, с припе́вы и́х: Христо́с воскре́се: три́жды. И отпу́ст.