Триодь Цветная. Понедельник второй седмицы по Пасхе. Последование Вечерни.

Последование вечерни

на Го́споди воззва́х: поста́вим стихо́в 6, и пое́м стихи́ры подо́бны, гла́с 4. Подо́бен: Я́ко до́бля:

Воскре́с из гро́ба, заключе́нным две́рем, предста́л еси́ друго́м Твои́м всеси́льне, и Фоме́ неве́ровавшу, гвозде́й показа́л еси́ я́звы, и ребра́ е́же от копия́ прободе́ние, утвержда́я и уверя́я того́ Сло́ве, я́ко ты́ са́м еси́, за милосе́рдие претерпе́вый спаси́тельныя стра́сти.

За мно́гое снизхожде́ние, и милосе́рдие безме́рное, мое́ зря́ истоща́ние не усумни́ся, но уве́рися бли́знче, Госпо́дь рече́: я́ко Са́м е́смь Аз пострада́вый, и тридне́вен из гро́ба воскресы́й, и а́дова сокро́вища истощи́вый, и оживи́вый от ве́ка уме́ршыя.

Удиви́вся я́ко узре́ Фома́ возопи́, егда́ ви́де Тя́ всеси́льне: Ты́ еси́ Бо́г мо́й и Госпо́дь, ве́рую Человеколю́бче, я́ко Са́м еси́ пострада́вый, и стра́сти исцеля́яй ду́ш на́ших. Кла́няюся Твое́й держа́ве, и ми́рови возвеща́ю стра́шное Твое́ и всеси́льное воста́ние.

И Мине́и 3. Сла́ва, и ны́не: гла́с 1:

Ученико́м сомня́щымся, во осмы́й де́нь предста́ Спа́с, иде́же бя́ху со́брани, и ми́р да́в, Фоме́ возопи́: прииди́ апо́столе, осяжи́ дла́ни, в ни́хже гво́здия вонзо́ша. О до́брое неве́рие Фомино́, ве́рных сердца́ в позна́ние приведе́ и со стра́хом возопи́: Госпо́дь мо́й и Бо́г мо́й, сла́ва тебе́!

Све́те ти́хий:

На стихо́вне стихи́ры, гла́с 1:

Обыди́те лю́дие Cио́н, и объими́те его́, и дади́те сла́ву в не́м Воскре́сшему из ме́ртвых: я́ко То́й е́сть Бо́г на́ш, избавле́й на́с от беззако́ний на́ших.

Сти́х: К тебе́ воздвиго́х о́чи мои́.

Я́ко помышле́нии лука́выми, и де́лы осуди́хся Спа́се, мы́сль мне́ да́руй обраще́ния Бо́же, да зову́: спаси́ мя благоде́телю Благи́й, и поми́луй мя́.

Сти́х: Поми́луй на́с Го́споди, поми́луй на́с:

Му́ченичен:

Е́же на суди́щи ва́ше испове́дание святи́и, де́монов оплева́ си́лу, и от пре́лести челове́ки свободи́. Те́мже и глава́м усека́емым, взыва́сте: да бу́дет, Го́споди, же́ртва ду́ш на́ших благоприя́тна пред Тобо́ю, я́ко Тебе́ возлюби́вше неради́хом о вре́менной жи́зни, Человеколю́бче.

Сла́ва, и ны́не: гла́с 2:

По воста́нии Твое́м Го́споди, собра́нным ученико́м Твои́м, и две́рем заключе́нным, посреде́ ста́л еси́, ми́р подая́ и́м: ве́ровав же и Фома́, зре́нием руку́ и ре́бр Твои́х, Го́спода и Бо́га Тя́ испове́да, спаса́ющаго упова́ющыя на Тя́, Человеколю́бче.

Ны́не отпуща́еши: Тропа́рь пра́здника: Запеча́тану гро́бу: И отпу́ст.