Триодь Цветная. Вторник Восьмой седмицы по Пасхе. Последование Вечерни.

Последование Вечерни

На Го́споди воззва́х: поста́вим стихо́в 6. И пое́м стихи́ры подо́бны, гла́с 1.

Подо́бен: Небе́сных чино́в:

Я́ко сра́сленно, я́ко сво́йственно слове́сным небесе́м, огнеобра́зными язы́ки возвеща́ти язы́ком сла́ву Бо́га, огне́м небеса́ украси́вшаго, и озари́вшаго ми́р чу́вственный, с Сы́ном же и Ду́хом.

В Сио́не собра́нным ученико́м Христо́вым, я́коже обеща́ние, Ду́х Святы́й на сия́ прише́д ви́дом о́гненным, огнедохнове́нны я́ показа́, веща́нии та́йными уче́ния тро́ическая вити́йствующыя.

Небокова́нныя мечи́, свяще́нныя ученики́, Свяще́нный Ду́х прише́д соверши́: зе́млю освяти́ша Бо́гу Творцу́, несвяще́нныя посе́кше, я́ко исче́знути ору́жием лука́ваго, и спасти́ся душа́м на́шым.

И Мине́и, 3. Сла́ва, и ны́не: гла́с 2:

Ви́дехом све́т и́стинный, прия́хом Ду́ха Небе́снаго, обрето́хом ве́ру и́стинную, неразде́льней Тро́ице покла́няемся: та́ бо на́с спасла́ е́сть.

На стихо́вне стихи́ры подо́бны, гла́с 4.

Подо́бен: Да́л еси́ зна́мение:

Дне́сь на́йде Пресвята́го Твоего́ Ду́ха де́йствие Го́споди на апо́столы Твоя́, и прему́дры показа́в богове́дением, и испо́лни я́ блаже́ннаго уче́ния Твоего́. Те́мже Твое́ спаси́тельное смотре́ние сла́вим, Иису́се Всеси́льне, Спа́се ду́ш на́ших.

Сти́х: Се́рдце чи́сто сози́жди во мне́ Бо́же:

Дне́сь Ду́х тво́й всеси́льный влады́ко, от отца́ посыла́ется, тебе́ единосу́щный, во о́гненных язы́цех, подая́ти же вели́чия Твоя́ глаго́лати, апо́столы твоя́ устро́и. Те́мже спаси́тельное твое́ смотре́ние сла́вим, Иису́се всеси́льне, Спа́се ду́ш на́ших.

Сти́х: Не отве́ржи мене́ от лица́ Твоего́:

Дне́сь излия́л еси́ уте́шителя Твоего́ ду́ха, Спа́се, дарова́ния, пода́в челове́ческому естеству́ проро́чествовати, я́коже ре́кл еси́ сло́ве, и тро́ице покланя́тися неразде́льно снаказа́л еси́. Те́мже твое́ спаси́тельное смотре́ние сла́вим, Иису́се всеси́льне, Спа́се ду́ш на́ших.

Сла́ва и ны́не: гла́с 6.

Го́споди, Свята́го Ду́ха наше́ствие, апо́столы Твоя́ испо́лнившее, ины́ми язы́ки глаго́лати устро́и: те́мже пресла́вное, неве́рным у́бо пия́нство мня́шеся, ве́рным же хода́тайственно спасе́ния. Его́же сия́ния и на́с сподо́би, мо́лим Ти ся человеколю́бче.

Та́же, Ны́не отпуща́еши: тропа́рь, и отпу́ст.