Приложение Триоди Цветной. Трипеснцы на Утрени
В Пятницу второй седмицы по Пасхе
В пято́к вторы́я неде́ли по Па́сце.
Трипе́снец, его́же краегране́сие: Сла́ва Богу, ами́нь.
Гла́с 1.
Пе́снь 5.
Ирмо́с: Све́тлый на́м возсия́й Све́т присносу́щный, у́тренюющым о судьба́х за́поведей твои́х; Владыко Человеколю́бче Христе́ Боже на́ш.
Собо́р евре́йский Тебе́ долготерпели́ваго Сло́ве распя́т: со́нм же безчи́сленный язы́ков все́х Твои́м распя́тием спа́сл еси́, Человеколю́бче Христе́ Боже на́ш.
Не поколеба́л еси́ ка́мене зна́мения, воскресе́нием Твои́м, я́коже ни отве́рзл еси́ в рождестве́ Твое́м, де́вства ключе́й ро́ждшия Тя́, Христе́ Боже на́ш.
Сла́ва: Стра́нным о́бразом ви́девше, боже́ственно блиста́ющася безпло́тнаго, жены́ ужа́сни бы́вше, слы́шаху: не пла́чите, воскре́се Господь.
И ны́не, богоро́дичен: Свя́та Господа Си́л Пречистая родила́ еси́, истощи́вшаго а́дова ца́рствия, и воскре́сша, и совоскреси́вшаго челове́ческое смеше́ние.
Пе́снь 8.
Ирмо́с: Песносло́вцы в пещи́ спа́сшаго де́ти, и громопла́менную прело́жшаго на ро́су, Христа́ Бога по́йте, и превозноси́те во вся́ ве́ки.
Во́лею распе́ншагося, и поло́жшагося во гро́бе, и упраздни́вшаго сме́рти держа́ву, Христа́ Бога по́йте, и превозноси́те Его́ во ве́ки.
Яви́лся еси́ пе́рвее жена́м воста́в из гро́ба, и благове́стницы посла́в и́х апостолом Христе́: те́мже Тя́ хвалосло́вим во вся́ ве́ки.
Разруши́в Ще́дре кре́постию сме́рти си́лу, и а́дова ца́рствия, я́ко сы́й Царь истощи́л еси́: те́мже Тя́ хвалосло́вим во вся́ ве́ки.
Сла́ва: Ре́кл еси́ ученико́м воста́в, во все́м ми́ре пропове́дати потщи́теся Мою́ си́лу, изима́юще тму́ многобо́жия све́том и́стинным.
И ны́не, богоро́дичен: Яко небес Вы́шшая, и херуви́мов Лу́чшая, Честне́йшая же Всесвята́я Дево тва́ри всея́, моли́ся о ве́рою при́сно Тя́ сла́вящих.
Пе́снь 9.
Ирмо́с: Живоприе́мный исто́чник приснотеку́щий, светоно́сный свети́льник благода́ти, хра́м одушевле́нный, се́нь Пречи́стую, небесе́ и земли́ простра́ннейшую, Богородицу ве́рнии велича́ем.
Ра́дуется земля́ вся́ дне́сь, и весе́лие о́блацы да кропя́т: на дре́ве бо Господь Сла́вы распны́йся воста́, тли́ сме́ртныя на́с свободи́в, и нетле́нием просвети́в, я́ко благоутро́бен.
Миро иногда́ нося́щым со слеза́ми, свяще́нным жена́м отвещава́ше ангел, блиста́яйся све́тло на гро́бе: с ме́ртвыми жива́го почто́ и́щете; Се́й воскре́се, просвети́в вся́ческая.
Сла́ва: Светоза́рное Бога на́шего воста́ние, па́че со́лнечных заре́й освеща́ющее духом ве́рныя, во ве́ки вся́ просвеща́ет, и наставля́ет ко спасе́нию: е́же Чи́стою мы́слию пра́зднуем.
И ны́не, богоро́дичен: Умерщвле́нных на́с грехопаде́ньми, живо́т ве́чный роди́вшая Богородице оживи́, и твори́ти поспеши́, к Животу́ и́стинному наставля́ющи: я́ко да ве́рою Тя́ при́сно ублажа́ем.
