Приложение Триоди Цветной. Трипеснцы на Утрени

В Четверг Пятой седмицы по Пасхе

В четверто́к пя́тыя неде́ли по Па́сце, трипе́снец, его́же краестро́чие: Пе́снь Богу подоба́ет.

Гла́с 4.

Пе́снь 4.

Ирмо́с: Любве́ ра́ди Ще́дре Твоего о́браза, на Кресте́ Твое́м ста́л еси́, и раста́яшася язы́цы: ты́ бо еси́ Человеколю́бче, кре́пость моя́ и хвале́ние.

Яко воздви́глся еси́ во́лею на дре́во, и земля́ и го́ры и хо́лми поколеба́шася тре́петом, стра́ждуща Тя́ ви́дяще, Ще́дре Долготерпели́ве.

Убоя́вся Твоего, Спасе, сни́тия а́д, ме́ртвыя я́же имя́ше, подава́ше вско́ре, песносло́вящыя Твою́ неизрече́нную Си́лу.

Сла́ва: Неразу́мный зря́ Тя́ евре́йский собо́р Ще́дре, слепы́м о́чи даю́ща, убива́ше Су́щаго Жи́знь и Воскресе́ние.

И ны́не, богоро́дичен: Ви́девши из гро́ба воста́вша Твоего́ Сына Дево, со апо́столы о не́м ра́довалася еси́ Чи́стая: с ни́ми же Тя́ сла́вим.

Пе́снь 8.

Ирмо́с: Вся́ дела́ Божия, и вся́ тва́рь благослови́те Господа, я́ко челове́ком от земли́ возсия́ све́т, и вселе́нную всю́ просвети́, и жи́знь ве́чную ми́ру дарова́, по́йте лю́дие, и превозноси́те Его́ во ве́ки.

На Кресте́ Тя́ ви́дев разбо́йник благоразу́мный, помяни́ мя, взыва́ше, Владыко, удиви́вся си́ле Твое́й, и е́же па́че ума́ Твоему́ стра́шному смотре́нию.

Яви́лся еси́ Христе́ жена́м, ра́дуйтеся, глаго́ля, ми́лостивно я́ко Человеколю́бец, ско́рбь я́ве утоля́я, и радостнотворя́ челове́ки Твои́м воста́нием.

Сла́ва: Дре́вле слепо́му от рожде́ния, я́коже дарова́л еси́ све́т, Светода́вче Иисусе: си́це и мне́ серде́чныя зе́ницы отве́рзи, разуме́ти све́т Твои́х повеле́ний.

И ны́не, богоро́дичен: Изба́ви мя́ огня́ гее́нскаго, и ве́чнаго осужде́ния Чи́стая, утиши́ помышле́ний мои́х свире́пое волне́ние, и напра́ви к ти́хому жи́зни приста́нищу.

Пе́снь 9.

Ирмо́с: Ка́мень нерукосе́чный от несеко́мыя горы́ Тебе́ Дево, краеуго́льный отсече́ся, Христо́с, совокупи́вый разстоя́щаяся естества́: те́м веселя́щеся, Тя́ Богородице велича́ем.

Просте́рл еси́ дла́ни на Дре́ве, пе́рвыя сне́ди дре́ва владыко ру́ку просте́ршуюся, душетле́нна вре́да исцеля́я: те́мже непостижи́мое смотре́ние Твое́ сла́вим.

Врата́ и вереи́ сме́рти сни́тием Твои́м сокру́шь, а́дова ца́рствия вся́ Твое́ю си́лою Спасе истощи́л еси́, и воскре́с тридне́вно, вселе́нную просвети́л еси́.

Сла́ва: Ре́кл еси́ Спасе, я́влься Твои́м святы́м апостолом по воскресе́нии: ми́р прете́кше ве́рою пропове́дите, я́же во Мне́ ви́десте стра́шная, и неизрече́нная та́инства.

И ны́не, богоро́дичен: Ви́дела еси́ Христа́ воста́вша, с жена́ми мироно́сицами, и преложи́вши рыда́ние в ра́дость, сего́ сла́вила еси́: те́мже велегла́сно Тя́ Богороди́тельнице велича́ем.