Приложение Триоди Цветной. Трипеснцы на Утрени

Во Вторник Седьмой седмицы по Пасхе

Во вто́рник седмы́я неде́ли по Па́сце, трипе́снец, гла́с 2.

Пе́снь 2.

Ирмо́с: Ви́дите, ви́дите, я́ко Аз е́смь в мо́ри спасы́й, и в пусты́ни насы́тивый Израильтеския лю́ди, и во́ду из ка́мене источи́вый челове́ком, да дре́вле па́дшаго поне́с, привлеку́ ко Мне́ за неизрече́нную ми́лость.

Соводворя́яся ученико́м во дне́х четы́редесятих, по Боже́ственном из гро́ба Спасе воста́нии, Духа Боже́ственнаго обещава́я и́м посла́ти я́ве, возне́слся еси́ во сла́ве, на ра́му херуви́мску стра́шно носи́мый.

Врата́ возми́те, разуме́йте пресла́вная, мы́сленныя си́лы Вы́шнейшым вопия́ху: Царь вся́ческих Те́ло земле́но нося́, прии́де к на́м в поко́й Сво́й, челове́ки обожи́в за милосе́рдие мно́гое и безме́рную ми́лость.

Сла́ва: Закро́в Себе́ тму́ полага́яй, безпло́тному естеству́ на крилу́ ве́треннюю восходя́й Бог, вопло́щся из Девы о́блака све́тлаго, о́блаком све́тлым от земли́ на высоту́ взы́де, зря́щым ученико́м сла́вное вознесе́ние.

И ны́не, богоро́дичен: Невозде́ланная земле́, возрасти́вшая все́х пита́теля отверза́юща ру́ку, и благоволе́нием свои́м насыща́юща вся́кое живо́тное, кре́пости боже́ственныя: утверди́ Хле́бом Живо́тным разсла́бленная сердца́ сы́тостию злы́х на́ших грехопаде́ний.

Пе́снь 8.

Ирмо́с: О подо́бии зла́те небре́гше треблаже́ннии ю́ношы, Неизме́нный и Живы́й Божий о́браз ви́девше, среди́ огня́ воспева́ху: осуществова́нная да пое́т Господа вся́ тва́рь, и превозно́сит во вся́ ве́ки.

Естество́ ада́мово восприи́м, и сие́ обожи́в Сло́ве, к первонача́льнику све́та вознесе́ Своему́ Отцу́, удиви́вшымся все́м безпло́тным чино́м, и вопию́щым: по́йте Господа, и превозноси́те Его́ во ве́ки.

Илиа́ прообразу́я стра́шное Твое́ вознесе́ние Животода́вче, Боже́ственным Духом показа́ся ору́жник, и к высоте́ ве́сь от земли́ ноша́шеся, поя́ Владыце: да пое́т Господа вся́ тва́рь, и превозно́сит Его́ во ве́ки.

Сла́ва: Хвали́те Бога, воскли́кните язы́цы, восплещи́те рука́ми, согла́сно по́йте, со сла́вою Христо́с взы́де, отону́дуже к на́м прии́де, спасти́ вопию́щыя: по́йте и превозноси́те Его́ во ве́ки.

И ны́не, богоро́дичен: троичен: Отца́ и Сына, и Собезнача́льна просла́вим вси́ Духа, Троицу Несозда́нную, естество́м соедине́нну, разделе́нну же Ту́ Ли́цы, пою́ще: осу́щественная да пое́т Господа вся́ тва́рь, и превозно́сит Его́ во ве́ки.

Пе́снь 9.

Ирмо́с: Недоуме́ет вся́к язы́к благохвали́ти по достоя́нию, изумева́ет же у́м и преми́рный пе́ти Тя́ Богородице, оба́че блага́я су́щи, ве́ру приими́: и́бо любо́вь ве́си боже́ственную на́шу, Ты́ бо Христиа́н еси́ предста́тельница: Тя́ велича́ем.

Со сла́вою ны́не восходя́й на о́блацех, кто́ у́бо е́сть; реко́ша го́рнейшии чи́нове, вопию́ще и́м: врата́ у́мная отими́те, Бог Еди́ный я́же на земли́ совокупи́вый небесе́м, сему́ вели́чие, и сла́ву со стра́хом принесе́м.

Зри́те, ре́кл еси́ Сло́ве ученико́м, скорбя́щым Твои́м восхо́дом: седи́те жду́ще ве́рою, до́ндеже прии́дет к ва́м Боже́ственный Уте́шитель от Вы́шних, даро́в все́м незави́стный исто́чник. Се́й ва́с научи́т всему́, я́ко Преблаги́й.

Сла́ва: Отпа́дшее естество́ ада́мово ви́дится в Вы́шних, на Престо́ле Отчи водруже́нно пресла́вно, и покланя́емо всегда́ от ангел и арха́нгел, от престо́л, си́л и нача́л: сла́ва изво́лившему та́ко, Еди́ному Богу на́шему.

И ны́не, богоро́дичен: Кра́сна добро́тою роди́ Тя красна́ Девца, Его́же зря́щи ни ви́да внегда́ страда́ти, ниже́ добро́ты иму́ща, Спасе, рыда́ющи глаго́лаше: дивлю́ся Твоему́ па́че ума́ Сыне Мо́й смире́нию, и́мже спаса́еши смири́вшееся естество́ челове́ческое.