Триодь Постная. Пятница 1-ой седмицы. Литургия Преждеосвященных Даров.

Службы Великого поста

Оглавление
< Назад | Вперед >

Последование Вечерни в пятницу первой седмицы

Литургия Преждеосвященных Даров

Диакон: Благослови́, влады́ко.

Священник: Благослове́но Ца́рство Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Чтец: Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

И предначинательный псалом 103.

Благослови́, душе́ моя, Го́спода, Го́споди Бо́же мой, возвели́чился еси́ зело́, во испове́дание и в велеле́поту обле́клся еси́. Одея́йся све́том я́ко ри́зою, простира́яй не́бо я́ко ко́жу. Покрыва́яй вода́ми превы́спренняя Своя, полага́яй о́блаки на восхожде́ние Свое, ходя́й на крилу́ ве́треню. Творя́й А́нгелы Своя ду́хи, и слуги́ Своя пла́мень о́гненный. Основа́яй зе́млю на тве́рди ея́, не преклони́тся в век ве́ка. Бе́здна я́ко ри́за одея́ние ея́, на гора́х ста́нут во́ды, от запреще́ния Твоего побе́гнут, от гла́са гро́ма Твоего убоя́тся. Восхо́дят го́ры, и низхо́дят поля́ в ме́сто, е́же основа́л еси́ им. Преде́л положи́л еси́, его́же не пре́йдут, ниже́ обратя́тся покры́ти зе́млю. Посыла́яй исто́чники в де́брех, посреде́ гор про́йдут во́ды. Напая́ют вся зве́ри се́льныя, ждут она́гри в жа́жду свою. На ты́х пти́цы небе́сныя привита́ют, от среды́ ка́мения дадя́т глас. Напая́яй го́ры от превы́спренних Своих, от плода́ дел Твои́х насы́тится земля́. Прозяба́яй траву́ ското́м, и злак на слу́жбу челове́ком, извести́ хлеб от земли́. И вино́ весели́т се́рдце челове́ка, ума́стити лице́ еле́ем, и хлеб се́рдце челове́ка укрепи́т. Насы́тятся древа́ польска́я, ке́дри лива́нстии, и́хже еси́ насади́л. Та́мо пти́цы вогнездя́тся, ероди́ево жили́ще предводи́тельствует и́ми. Го́ры высо́кия еле́нем, ка́мень прибе́жище за́яцем. Сотвори́л есть луну́ во времена́, со́лнце позна́ за́пад свой. Положи́л еси́ тьму, и бысть нощь, в не́йже про́йдут вси зве́рие дубра́внии. Ски́мни рыка́ющии восхи́тити, и взыска́ти от Бо́га пи́щу себе. Возсия́ со́лнце, и собра́шася, и в ло́жах сво́их ля́гут. Изы́дет челове́к на де́ло свое, и на де́лание свое до ве́чера. Я́ко возвели́чишася дела́ Твоя, Го́споди, вся прему́дростию сотвори́л еси́, испо́лнися земля́ тва́ри Твоея́. Сие́ мо́ре вели́кое и простра́нное, та́мо га́ди, и́хже несть числа́, живо́тная ма́лая с вели́кими, та́мо корабли́ препла́вают, змий сей, его́же созда́л еси́ руга́тися ему. Вся к Тебе ча́ют, да́ти пи́щу им во бла́го вре́мя. Да́вшу Тебе́ им, соберу́т, отве́рзшу Тебе́ ру́ку, вся́ческая испо́лнятся бла́гости, отвра́щшу же Тебе́ лице́, возмяту́тся, оты́меши дух их, и исче́знут, и в персть свою возвратя́тся. По́слеши Ду́ха Твоего́, и сози́ждутся, и обнови́ши лице́ земли́. Бу́ди сла́ва Госпо́дня во ве́ки, возвесели́тся Госпо́дь о де́лех Своих, призира́яй на зе́млю, и творя́й ю́ трясти́ся, прикаса́яйся гора́м, и дымя́тся. Воспою́ Го́сподеви в животе́ моем, пою́ Бо́гу моему́, до́ндеже есмь, да услади́тся Ему́ бесе́да моя, аз же возвеселю́ся о Го́споде. Да исче́знут гре́шницы от земли́, и беззако́нницы, я́коже не бы́ти им. Благослови́, душе́ моя, Го́спода.

Со́лнце позна́ за́пад свой, положи́л еси́ тьму, и бысть нощь.

Я́ко возвели́чишася дела́ Твоя, Го́споди, вся прему́дростию сотвори́л еси́.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Посем ектения великая:

Ми́ром Го́споду помо́лимся.

Лик: Го́споди, поми́луй.

О свы́шнем ми́ре и спасе́нии душ наших, Го́споду помо́лимся.

Лик: Го́споди, поми́луй.

О ми́ре всего ми́ра, благостоя́нии Святы́х Бо́жиих Церкве́й, и соедине́нии всех, Го́споду помо́лимся.

Лик: Го́споди, поми́луй.

О святе́м хра́ме сем и с ве́рою, благогове́нием и стра́хом Бо́жиим входя́щих вонь, Го́споду помо́лимся.

Лик: Го́споди, поми́луй.

О Вели́ком Господи́не и отце́ на́шем, Святе́йшем Патриа́рхе (имя) и о Господи́не нашем, Преосвяще́ннейшем епи́скопе (или: архиепи́скопе, или: митрополи́те, имя, егоже есть область), честне́м пресви́терстве, во Христе́ диа́констве, о всем при́чте и лю́дех, Го́споду помо́лимся.

Лик: Го́споди, поми́луй.

О Богохрани́мей стране́ нашей, власте́х и во́инстве ея́, Го́споду помо́лимся.

Лик: Го́споди, поми́луй.

О гра́де сем, вся́ком гра́де, стране́ и ве́рою живу́щих в них, Го́споду помо́лимся.

Лик: Го́споди, поми́луй.

О благорастворе́нии возду́хов, о изоби́лии плодо́в земны́х и вре́менех ми́рных, Го́споду помо́лимся.

Лик: Го́споди, поми́луй.

О пла́вающих, путеше́ствующих, неду́гующих, стра́ждущих, плене́нных и о спасе́нии их, Го́споду помо́лимся.

Лик: Го́споди, поми́луй.

О изба́вится нам от вся́кия ско́рби, гне́ва и ну́жды, Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Пресвяту́ю, Пречи́стую, Преблагослове́нную, Сла́вную Влады́чицу нашу Богоро́дицу и Присноде́ву Мари́ю, со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Лик: Тебе́, Го́споди.

Священник: Я́ко подоба́ет Тебе́ вся́кая сла́ва, че́сть и поклоне́ние, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

И чтется кафисма 18-я.

Песнь степеней, 119.

Ко Го́споду, внегда́ скорбе́ти ми, воззва́х, и услы́ша мя. Го́споди, изба́ви ду́шу мою от усте́н непра́ведных и от язы́ка льсти́ва. Что да́стся тебе́, или́ что приложи́тся тебе́ к язы́ку льсти́ву? Стре́лы си́льнаго изощре́ны, со у́гльми пусты́нными. Увы́ мне, я́ко прише́льствие мое продолжи́ся, всели́хся с селе́нии Кида́рскими. Мно́го прише́льствова душа́ моя, с ненави́дящими ми́ра бех ми́рен: егда́ глаго́лах им, боря́ху мя ту́не.

Песнь степеней, 120.

Возведо́х о́чи мои в го́ры, отню́дуже прии́дет по́мощь моя. По́мощь моя от Го́спода, сотво́ршаго не́бо и зе́млю. Не даждь во смяте́ние ноги́ твоея́, ниже́ воздре́млет храня́й тя, се не воздре́млет, ниже́ у́снет храня́й Изра́иля. Госпо́дь сохрани́т тя, Госпо́дь покро́в твой на руку́ десну́ю твою. Во дни со́лнце не ожже́т тебе́, ниже́ луна́ но́щию. Госпо́дь сохрани́т тя от вся́каго зла, сохрани́т ду́шу твою Госпо́дь. Госпо́дь сохрани́т вхожде́ние твое и исхожде́ние твое, от ны́не и до ве́ка.

Песнь степеней, 121.

Возвесели́хся о ре́кших мне: в дом Госпо́день по́йдем. Стоя́ще бя́ху но́ги на́ша во дво́рех твоих, Иерусали́ме. Иерусали́м зи́ждемый я́ко град, ему́же прича́стие его вку́пе. Та́мо бо взыдо́ша коле́на, коле́на Госпо́дня, свиде́ние Изра́илево, испове́датися и́мени Госпо́дню, я́ко та́мо седо́ша престо́ли на суд, престо́ли в дому́ Дави́дове. Вопроси́те же я́же о ми́ре Иерусали́ма: и оби́лие лю́бящим тя. Бу́ди же мир в си́ле твоей и оби́лие в столпостена́х твоих. Ра́ди бра́тий моих и бли́жних моих глаго́лах у́бо мир о тебе. До́му ра́ди Го́спода Бо́га на́шего взыска́х блага́я тебе.

Песнь степеней, 122.

К Тебе возведо́х о́чи мои, Живу́щему на небеси́. Се я́ко о́чи раб в руку́ госпо́дий своих, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны. Поми́луй нас, Го́споди, поми́луй нас, я́ко по мно́гу испо́лнихомся уничиже́ния, наипа́че напо́лнися душа́ на́ша поноше́ния гобзу́ющих и уничиже́ния го́рдых.

Песнь степеней, 123.

Я́ко а́ще не Госпо́дь бы был в нас, да рече́т у́бо Изра́иль, я́ко а́ще не Госпо́дь бы был в нас, внегда́ воста́ти челове́ком на ны, у́бо живы́х поже́рли бы́ша нас, внегда́ прогне́ватися я́рости их на ны, у́бо вода́ потопи́ла бы нас. Пото́к пре́йде душа́ на́ша, у́бо пре́йде душа́ на́ша во́ду непостоя́нную. Благослове́н Госпо́дь, И́же не даде́ нас в лови́тву зубо́м их. Душа́ на́ша, я́ко пти́ца изба́вися от се́ти ловя́щих: сеть сокруши́ся, и мы изба́влени бы́хом. По́мощь на́ша во и́мя Го́спода, сотво́ршаго не́бо и зе́млю.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Таже ектения малая:

Па́ки и па́ки миром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Лик: Тебе́, Го́споди.

Священник: Я́ко Твоя́ держа́ва, и Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Лик: Ами́нь.

Чтец:

Песнь степеней, 124.

Наде́ющиися на Го́спода, я́ко гора́ Сио́н: не подви́жится в век живы́й во Иерусали́ме. Го́ры о́крест его, и Госпо́дь о́крест люде́й Своих от ны́не и до ве́ка. Я́ко не оста́вит Госпо́дь жезла́ гре́шных на жре́бий пра́ведных, я́ко да не про́струт пра́веднии в беззако́ния рук своих. Ублажи́, Го́споди, благи́я и пра́выя се́рдцем. Уклоня́ющияся же в развраще́ния отведе́т Госпо́дь с де́лающими беззако́ние. Мир на Изра́иля.

Песнь степеней, 125.

Внегда́ возврати́ти Го́споду плен Сио́нь, бы́хом я́ко уте́шени. Тогда́ испо́лнишася ра́дости уста́ на́ша, и язы́к наш весе́лия, тогда́ реку́т во язы́цех: возвели́чил есть Госпо́дь сотвори́ти с ни́ми. Возвели́чил есть Госпо́дь сотвори́ти с на́ми: бы́хом веселя́щеся. Возврати́, Го́споди, плене́ние на́ше, я́ко пото́ки ю́гом. Се́ющии слеза́ми, ра́достию по́жнут. Ходя́щии хожда́ху и пла́кахуся, мета́юще се́мена своя́, гряду́ще же прии́дут ра́достию, взе́млюще рукоя́ти своя́.

Песнь степеней, 126.

А́ще не Госпо́дь сози́ждет дом, всу́е труди́шася зи́ждущии. А́ще не Госпо́дь сохрани́т град, всу́е бде́ стреги́й. Всу́е вам есть у́треневати, воста́нете по седе́нии, яду́щии хлеб боле́зни, егда́ даст возлю́бленным Своим сон. Се достоя́ние Госпо́дне сы́нове, мзда плода́ чре́вняго. Я́ко стре́лы в руце́ си́льнаго, та́ко сы́нове оттрясе́нных. Блаже́н, и́же испо́лнит жела́ние свое от них. Не постыдя́тся, егда́ глаго́лют враго́м своим во врате́х.

Песнь степеней, 127.

Блаже́ни вси боя́щиися Го́спода, ходя́щии в путе́х Его. Труды́ плодо́в твоих сне́си: блаже́н еси́, и добро́ тебе́ бу́дет. Жена́ твоя́, я́ко лоза́, плодови́та в страна́х до́му твоего́, сы́нове твои, я́ко новосажде́ния ма́сличная, о́крест трапе́зы твоея. Се та́ко благослови́тся челове́к боя́йся Го́спода. Благослови́т тя Госпо́дь от Сио́на, и у́зриши блага́я Иерусали́ма вся дни живота́ Твоего, и у́зриши сы́ны сыно́в твоих. Мир на Изра́иля.

Песнь степеней, 128.

Мно́жицею бра́шася со мно́ю от ю́ности моея́, да рече́т у́бо Изра́иль: мно́жицею бра́шася со мною́ от ю́ности моея́, и́бо не премого́ша мя. На хребте́ мое́м де́лаша гре́шницы, продолжи́ша беззако́ние свое́. Госпо́дь Пра́веден ссече́ вы́я гре́шников. Да постыдя́тся и возвратя́тся вспять вси ненави́дящии Сио́на. Да бу́дут я́ко трава́ на здех, я́же пре́жде восторже́ния и́зсше, е́юже не испо́лни руки́ своея́ жня́й, и не́дра своего́ рукоя́ти собира́яй, и не ре́ша мимоходя́щии: благослове́ние Госпо́дне на вы, благослови́хом вы во и́мя Госпо́дне.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Таже ектения малая:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Лик: Тебе́, Го́споди.

Священник: Я́ко Благ и Человеколю́бец Бог еси́, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Чтец:

Песнь степеней, 129.

Из глубины́ воззва́х к Тебе, Го́споди, Го́споди, услы́ши глас мой. Да бу́дут у́ши Твои вне́млюще гла́су моле́ния моего́. А́ще беззако́ния на́зриши, Го́споди, Го́споди, кто постои́т? Я́ко у тебе очище́ние есть. И́мене ради Твоего потерпе́х Тя, Го́споди, потерпе́ душа́ моя в сло́во Твое, упова́ душа́ моя на Го́спода. От стра́жи у́тренния до но́щи, от стра́жи у́тренния да упова́ет Изра́иль на Го́спода. Я́ко у Го́спода ми́лость, и мно́гое у Него избавле́ние, и Той изба́вит Изра́иля от всех беззако́ний его.

Песнь степеней, 130.

Го́споди, не вознесе́ся сердце мое, ниже́ вознесо́стеся о́чи мои, ниже́ ходи́х в вели́ких, ниже́ в ди́вных па́че мене́. А́ще не смиреному́дрствовах, но вознесо́х ду́шу мою, я́ко отдое́ное на ма́терь свою́, тако возда́си на ду́шу мою. Да упова́ет Изра́иль на Го́спода от ны́не и до ве́ка.

Песнь степеней, 131.

Помяни́, Го́споди, Дави́да и всю кро́тость его: я́ко кля́тся Го́сподеви, обеща́ся Бо́гу Иа́ковлю: а́ще вни́ду в селе́ние до́му моего́, или́ взы́ду на одр посте́ли моея́, а́ще дам сон очи́ма мои́ма и ве́ждома мои́ма дрема́ние, и поко́й скраниа́ма мои́ма, до́ндеже обря́щу ме́сто Го́сподеви, селе́ние Бо́гу Иа́ковлю. Се слы́шахом я́ во Евфра́фе, обрето́хом я́ в поля́х дубра́вы. Вни́дем в селе́ния Его, поклони́мся на ме́сто, иде́же стоя́сте но́зе Его. Воскресни́, Го́споди, в поко́й Твой, Ты и киво́т святы́ни Твоея́. Свяще́нницы Твои облеку́тся пра́вдою, и преподо́бнии Твои возра́дуются. Дави́да ра́ди раба́ Твоего, не отврати́ лице́ пома́заннаго Твоего. Кля́тся Госпо́дь Дави́ду и́стиною, и не отве́ржется ея́: от плода́ чре́ва твоего́ посажду́ на престо́ле твое́м. А́ще сохраня́т сы́нове твои́ заве́т Мой, и свиде́ния Моя сия́, и́мже научу́ я́, и сы́нове их до ве́ка ся́дут на престо́ле твое́м. Я́ко избра́ Госпо́дь Сио́на, изво́ли и́ в жили́ще Себе. Сей поко́й Мой во век ве́ка, зде вселю́ся, я́ко изво́лих и́. Лови́тву его благословля́яй благословлю́, ни́щия его насыщу́ хле́бы, свяще́нники его облеку́ во спасе́ние, и преподо́бнии его ра́достию возра́дуются. Та́мо возращу́ рог Дави́дови, угото́вах свети́льник пома́занному Моему́. Враги́ его облеку́ студо́м, на не́мже процвете́т святы́ня Моя.

Песнь степеней, 132.

Се что добро́, или́ что красно́, но е́же жи́ти бра́тии вку́пе? Я́ко ми́ро на главе́, сходя́щее на браду́, браду́ Ааро́ню, сходя́щее на оме́ты оде́жды его, я́ко роса́ Аермо́нская сходя́щая на го́ры Сио́нския, я́ко та́мо запове́да Госпо́дь благослове́ние и живо́т до ве́ка.

Песнь степеней, 133.

Се ны́не благослови́те Го́спода, вси раби́ Госпо́дни, стоя́щии в хра́ме Госпо́дни, во дво́рех до́му Бо́га на́шего. В но́щех воздежи́те ру́ки ва́ша во свята́я, и благослови́те Го́спода. Благослови́т тя Госпо́дь от Сио́на, сотвори́вый не́бо и зе́млю.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Посем ектения малая:

Па́ки и па́ки ми́ром Го́споду помо́лимся.

Лик: Го́споди, поми́луй.

Заступи́, спаси́, поми́луй и сохрани́ нас, Бо́же, Твое́ю благода́тию.

Лик: Го́споди, поми́луй.

Лик: Тебе́, Го́споди.

Священник: Я́ко Ты еси́ Бог наш, Бог ми́ловати и спаса́ти, и Тебе́ сла́ву возсыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Лик: Ами́нь.

Таже поем Го́споди, воззвах... на оба лика, во глас 5.

Го́споди, воззва́х к Тебе, услы́ши мя, услы́ши мя, Го́споди.

Го́споди, воззва́х к Тебе, услы́ши мя: вонми́ гла́су моле́ния моего́, внегда́ воззва́ти ми к Тебе́. Услы́ши мя, Го́споди.

Да испра́вится моли́тва моя, я́ко кади́ло пред Тобо́ю, воздея́ние руку́ мое́ю же́ртва вече́рняя. Услы́ши мя, Го́споди.

Положи́, Го́споди, хране́ние усто́м моим, и дверь огражде́ния о устна́х моих.

Не уклони́ се́рдце мое в словеса́ лука́вствия, непщева́ти вины́ о гресе́х.

С челове́ки де́лающими беззако́ние, и не сочту́ся со избра́нными их.

Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́.

Я́ко еще́ и моли́тва моя во благоволе́ниих их, поже́рты бы́ша при ка́мени судии́ их.

Услы́шатся глаго́ли мои, я́ко возмого́ша: я́ко то́лща земли́ просе́деся на земли́, расточи́шася ко́сти их при а́де.

Я́ко к Тебе, Го́споди, Го́споди, о́чи мои: на Тя упова́х, не отыми́ ду́шу мою.

Сохрани́ мя от се́ти, ю́же соста́виша ми, и от собла́зн де́лающих беззако́ние.

Паду́т во мре́жу свою́ гре́шницы: еди́н есмь аз, до́ндеже прейду́.

Гла́сом моим ко Го́споду воззва́х, гла́сом моим ко Го́споду помоли́хся.

Пролию́ пред Ним моле́ние мое, печа́ль мою пред Ним возвещу́.

Внегда́ исчеза́ти от Мене́ ду́ху моему́: и Ты позна́л еси́ стези́ моя.

На пути́ сем, по нему́же хожда́х, скры́ша сеть мне.

Смотря́х одесну́ю и возгля́дах, и не бе зна́яй мене́.

Поги́бе бе́гство от Мене́, и несть взыска́яй ду́шу мою́.

Воззва́х к Тебе, Го́споди, рех: Ты еси́ упова́ние мое́, часть моя еси́ на земли́ живы́х.

Вонми́ моле́нию моему́, я́ко смири́хся зело́.

Изба́ви мя от гоня́щих мя, я́ко укрепи́шася па́че мене́.

Стих: Изведи́ из темни́цы ду́шу мою, испове́датися и́мени Твоему.

Стихиры самогласны, глас 5:

Прииди́те, ве́рнии, де́лаим во све́те дела́ Бо́жия, я́ко во дни благообра́зно хо́дим: вся́кое непра́ведное списа́ние от себе́ бли́жняго оты́мем, не полага́юще претыка́ния сему́ в собла́зн. Оста́вим пло́ти сладостра́стие, возрасти́м души́ дарова́ния, дади́м тре́бующим хлеб, и присту́пим Христу́ в покая́нии вопию́ще: Бо́же наш, поми́луй нас.

Стих: Мене́ ждут пра́ведницы, до́ндеже возда́си мне.

Прииди́те, ве́рнии, де́лаим во све́те дела́ Бо́жия, я́ко во дни благообра́зно ходи́м: вся́кое непра́ведное списа́ние от себе́ бли́жняго оты́мем, не полага́юще претыка́ния сему́ в собла́зн. Оста́вим пло́ти сладостра́стие, возрасти́м души́ дарова́ния, дади́м тре́бующим хлеб, и присту́пим Христу́ в покая́нии вопию́ще: Бо́же наш, поми́луй нас.

Посем 4 стихиры мученичны Октоиха прилучившагося гласа с обычными стихами.

Стих: Из глубины́ воззва́х к Тебе́, Го́споди, Го́споди, услы́ши глас мой.

И 1-я стихира Октоиха.

Стих: Да бу́дут у́ши Твои́, вне́млюще гла́су моле́ния моего́.

И 2-я стихира Октоиха.

Стих: А́ще беззако́ния на́зриши, Го́споди, Го́споди, кто постои́т? я́ко у тебе́ очище́ние есть.

И 3-я стихира Октоиха.

Стих: И́мене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

И 4-я стихира Октоиха.

Стих: От стра́жи у́тренния до но́щи, от стра́жи у́тренния, да упова́ет Изра́иль на Го́спода.

И стихиры Триоди святаго Феодора, глас 2:

Прииди́те, мучениколю́бцы вси, духо́вно возвесели́мся, и торжеству́им: днесь бо предлага́ет трапезу та́йную му́ченик Фео́дор, веселя́щую празднолю́бцев нас, е́же вопи́ти к нему́: ра́дуйся, страстоте́рпче непобеди́мый, преще́ния мучи́телей на земли́ разори́вый. Ра́дуйся, бре́нное твое́ те́ло за Христа́ Бо́га отда́вый му́кам. Ра́дуйся, в разли́чных беда́х иску́сный во́ин яви́выйся небе́снаго во́инства. Те́мже мо́лим тя, му́чеников украше́ние, моли́ся о душах на́ших.

Стих: Я́ко у Го́спода ми́лость, и мно́гое у Него́ избавле́ние, и Той изба́вит Изра́иля от всех беззако́ний его́.

Богодарова́нную благода́ть чуде́с твоих, му́чениче Фео́доре, всем простира́еши, ве́рою к тебе́ притека́ющим. Е́юже хва́лим тя, глаго́люще: плене́нныя избавля́еши, исцеля́еши боля́щия, ни́щия обогаща́еши, и спаса́еши пла́вающия, су́етное тече́ние удержава́еши рабо́в, и тщеты́ явле́ние твори́ши украда́ющим, страда́льче, и во́ины наказу́еши восхище́ния огреба́тися, младе́нцем да́руеши ми́лостивно проше́ния, те́плый обрета́ешися предста́тель творя́щим твою́ свяще́нную па́мять. С ни́миже и нам, страда́льче свяще́ннейший, воспева́ющим твое́ муче́ние, проси́ у Христа́ ве́лию ми́лость.

Стих: Хвали́те Го́спода, вси язы́цы, похвали́те Его, вси лю́дие.

Дар Бо́жий превы́шший показа́лся еси́, му́чениче Фео́доре: зане́ и по кончи́не я́ко жив притека́ющим дае́ши проше́ния. Те́мже сы́ну восхище́нну жены́ иногда́, плене́нну инове́рными во́ины, предста́вши вдови́ца слеза́ми храм твой моча́ше. Ты же я́ко ми́лостив на коне́ бе́лом наше́д, сея́ о́трока предста́вил еси́ неви́димо: и посе́м и с сим де́йствуяй чудесы́, не преста́л еси́. Но моли́ Христа́ Бо́га спасти́ся душа́м на́шим.

Стих: Я́ко утверди́ся ми́лость Его на нас, и и́стина Госпо́дня пребыва́ет во век.

Боже́ственных даро́в тезоимени́та тя чту, треблаже́нне Феодоре: све́та бо боже́ственнаго незаходи́мое свети́ло явле́йся, уясни́л еси́ страда́ньми твоими всю тварь: и огня́ сильне́йший яви́вся, пла́мень угаси́л еси́, и льсти́ваго зми́я главу́ сокруши́л еси́. Те́мже во страда́ниих твои́х Христо́с приклони́вся, венча́ боже́ственную главу́ твою́, великому́чениче страда́льче, я́ко име́яй дерзнове́ние к Бо́гу, приле́жно моли́ся о душа́х на́ших.

Сла́ва Отцу́ и Сы́ну и Свято́му Ду́ху.

Глас 6: Сосу́да употреби́в враг соотсту́пника мучи́теля, умышле́нием лю́тым, посто́м очища́ющияся лю́ди благочести́выя, от скве́рных жертв, оскверне́нными бра́шны окуша́шеся оскверни́ти: но ты о́наго ухищре́ние мудре́йшим разруши́л еси́ умышле́нием, во сне предста́л еси́ тогда́шнему архиере́ю, и глубо́кое ра́зума открыва́я, и безме́стное начина́ние явля́я. И тебе́ у́бо благода́рственная принося́ще, спа́са напису́ем, ле́тное воспомина́ние бы́вшаго чудесе́ творя́ще: и про́чее моля́щеся, от умышле́ний лука́ваго невреди́мым спасти́ся, к Бо́гу твои́ми моли́твами, му́чениче Фео́доре.

И ны́не и при́сно и во ве́ки веко́в. Ами́нь.

Богородичен, догматик текущего гласа.

Посем бывает вход с кадильницею. Иерей благословляет вход.

Диакон: Прему́дрость, про́сти.

Лик: Све́те тихий святы́я сла́вы Безсме́ртнаго Отца́ Небе́снаго, Свята́го, Блаже́ннаго, Иису́се Христе́. Прише́дше на за́пад со́лнца, ви́девше свет вече́рний, пое́м Отца́, Сы́на и Свята́го Ду́ха, Бо́га. Досто́ин еси́ во вся времена́ пет бы́ти гла́сы преподо́бными, Сы́не Бо́жий, живо́т дая́й, те́мже мир Тя сла́вит.

Диакон: Во́нмем.

Священник: Мир всем.

Диакон: Прему́дрость, во́нмем.

Чтец: Проки́мен, глас пя́тый:

Услы́шит тя Госпо́дь в день печа́ли.

Лик: Услы́шит тя Госпо́дь в день печа́ли.

Чтец, стих: Защи́тит тя и́мя Бо́га Иа́ковля.

Лик: Услы́шит тя Госпо́дь в день печа́ли.

Чтец: Услы́шит тя Госпо́дь.

Лик: В день печа́ли.

Диакон: Премудрость.

Чтец: Бытия́ чте́ние (Быт. 2:20–25; 3, 1–20).

Диакон: Во́нмем.

Чтец: Нарече́ Ада́м имена́ всем ското́м, и всем пти́цам небе́сным, и всем звере́м земны́м, Ада́му же не обре́теся помо́щник, подо́бный ему́. И наложи́ Бог изступле́ние на Ада́ма, и у́спе: и взя еди́но от ребр его́, и испо́лни пло́тию вме́сто его́. И созда́ Госпо́дь Бог ребро́, е́же взя от Ада́ма, в жену́, и приведе́ ю ко Ада́му. И рече́ Ада́м: се ны́не кость от косте́й моих, и плоть от пло́ти моея́: сия́ нарече́тся жена́, я́ко от му́жа своего́ взята́ бысть сия́. Сего́ ра́ди оста́вит челове́к отца́ своего́ и ма́терь, и прилепи́тся к жене́ свое́й: и бу́дета два в плоть еди́ну. И бе́ста о́ба на́га, Ада́м же и жена́ его́, и не стыдя́стася. Змий же бе мудре́йший всех звере́й су́щих на земли́, и́хже сотвори́ Госпо́дь Бог. И рече́ змий жене́: что я́ко рече́ Бог, да не я́сте от вся́каго дре́ва ра́йскаго. И рече́ жена́ зми́ю: от вся́каго дре́ва ра́йскаго я́сти бу́дем. От плода́ же дре́ва, е́же есть посреде́ рая́, рече́ Бог, да не я́сте от него́, ниже́ прикосне́теся ему́, да не у́мрете. И рече́ змий жене́: не сме́ртию у́мрете. Ве́дяше бо Бог, я́ко во́ньже а́ще день сне́сте от него́, отве́рзутся о́чи ва́ши, и бу́дете я́ко бо́зи, ве́дяще до́брое и лука́вое. И ви́де жена́, я́ко добро́ дре́во в снедь, и я́ко уго́дно очи́ма ви́дети, и красно́ есть, е́же разуме́ти: и взе́мши от плода́ его, яде́: и даде́ му́жу своему́ с собо́ю, и ядо́ста. И отверзо́шася о́чи обе́ма, и разуме́ша, я́ко на́зи бе́ша: и сши́ста ли́ствие смоко́вное, и сотвори́ста себе́ препоя́сания. И услы́шаста глас Го́спода Бо́га ходя́ща в раи́ по полу́дни: и скры́стася Ада́м же и жена́ его́ от лица́ Го́спода Бо́га посреде́ дре́ва ра́йскаго. И призва́ Го́сподь Бог Ада́ма, и рече́ ему́: Ада́ме, где еси́? И рече́ Ему́: глас слы́шах Тебе́ ходя́ща в раи́, и убоя́хся, я́ко наг есмь, и скры́хся. И рече́ ему́ Бог: кто возвести́ тебе́, я́ко наг еси́, а́ще не бы от дре́ва, его́же запове́дах те́бе, сего́ еди́наго не я́сти, от него́ ял еси́? И рече́ Ада́м: жена́, ю́же дал еси́ со мно́ю, та ми даде́ от дре́ва, и ядо́х. И рече́ Госпо́дь Бог жене́: что сие́ сотвори́ла еси́? И рече́ жена́: змий прельсти́ мя, и ядо́х. И рече́ Госпо́дь Бог зми́ю: я́ко сотвори́л еси́ сие́, про́клят ты от всех ското́в, и от всех звере́й земны́х: на пе́рсех твои́х и чре́ве ходи́ти бу́деши, и зе́млю сне́си вся дни живота́ твоего́. И вражду́ положу́ между́ тобо́ю, и между́ жено́ю, и между́ се́менем твои́м, и между́ се́менем тоя́: той твою́ блюсти́ бу́дет главу́, и ты блюсти́ бу́деши его́ пя́ту. И жене́ рече́: умножа́я умно́жу печа́ли твоя́, и воздыха́ния твоя́, в боле́знех роди́ши ча́да, и к му́жу твоему́ обраще́ние твое́, и той тобо́ю облада́ти бу́дет. И Ада́му рече́: я́ко послу́шал еси́ гла́са жены́ твоея́, и ял еси́ от дре́ва, его́же запове́дах тебе́, сего́ еди́наго не я́сти, от него́ ял еси́: про́клята земля́ в де́лех твои́х, в печа́лех сне́си ту́ю вся дни живота́ твоего́. Те́рния и волчцы́ возрасти́т тебе́, и сне́си тра́ву се́льную. В по́те лица́ твоего́ сне́си хлеб твой, до́ндеже возврати́шися в зе́млю, от нея́же взят еси́: я́ко земля́ еси́, и в зе́млю оты́деши. И нарече́ Ада́м и́мя жене́ свое́й жизнь, я́ко та ма́ти всех живу́щих.

Диакон: Во́нмем.

Чтец: Проки́мен, глас шесты́й:

Вознеси́ся, Го́споди, си́лою Твое́ю, воспое́м и пое́м си́лы Твоя́.

Лик: Вознеси́ся, Го́споди, си́лою Твое́ю, воспое́м и пое́м си́лы Твоя́.

Чтец, стих: Го́споди, си́лою Твое́ю возвесели́тся царь.

Лик: Вознеси́ся, Го́споди, си́лою Твое́ю, воспое́м и пое́м си́лы Твоя́.

Чтец: Вознеси́ся, Го́споди, си́лою Твое́ю.

Лик: Воспое́м и пое́м си́лы Твоя́.

Диакон: Повели́те.

Священник же, взем обема рукама кадильницу, и свещник со свещею, стоит пред святою трапезою, зря к востоком, и назнаменуя крест, глаголет: Прему́дрость, про́сти.

Таже, обратяся на запад к народу, глаголет: Свет Христо́в просвеща́ет всех.

Чтец: При́тчей чте́ние (Притч. 3:19–34).

Диакон: Во́нмем.

Чтец: Бог прему́дростию основа́ зе́млю, угото́ва же небеса́ ра́зумом. В чу́встве Его бе́здны разверзо́шася, о́блацы же источи́ша ро́су. Сы́не, да не премине́ши, соблюди́ же мой сове́т и мы́сль: да жива́ бу́дет душа́ твоя́, и благода́ть бу́дет на твоей вы́и: (бу́дет же исцеле́ние пло́тем твои́м, и уврачева́ние косте́м твои́м). Да хо́диши наде́яся в ми́ре во всех путе́х твоих, нога́ же твоя́ не по́ткнется. А́ще бо ся́деши, безбоя́знен бу́деши, а́ще же поспи́ши, сла́достно поспи́ши. И не убои́шися стра́ха наше́дшаго, ниже́ устремле́ния нечести́вых находя́щаго. Госпо́дь бо бу́дет на всех путе́х твои́х, и утверди́т но́гу твою́, да не поползне́шися. Не отрецы́ся благотвори́ти тре́бующему, егда́ и́мать рука́ Твоя́ помога́ти. Не рцы: отше́д возврати́ся, и зау́тра дам, си́льну ти су́щу благотвори́ти: не ве́си бо, что породи́т находя́щий день. Не соплета́й на дру́га твоего́ зла, прише́льца су́ща и упова́юща на тя. Не вражду́й на челове́ка ту́не, да не что на тя соде́ет зло́е. Не стяжи́ злых муже́й поноше́ния, ни возревну́й путе́м их. Нечи́ст бо пред Го́сподем всяк законопресту́пник: и с пра́ведными не сочетава́ется. Кля́тва Госпо́дня в доме́х нечести́вых: дворы́ же пра́ведных благословля́ются. Госпо́дь го́рдым проти́вится, смире́нным же дае́т благода́ть.

Священник: Мир ти.

Диакон: Прему́дрость.

Чтец же поет: Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Таже правый и левый лики, и весь предстоящий в церкви народ стоит дóндеже чтец пропоет, на коленях молящися. И по пропетии чтеца, первый лик поет тожде:

Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Чтец же и другая страна лика, и предстоящий народ стоит на коленях, молящися.

Таже чтец поет первый стих:

Го́споди, воззва́х к Тебе́, услы́ши мя; вонми́ гла́су моле́ния моего́, внегда́ воззва́ти ми к Тебе́.

И по пропетии стиха, поет вторый лик:

Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Тогда чтец и первый лик, и тоя страны предстоящий народ припадает на колена.

Таже чтец поет вторый стих:

Положи́, Го́споди, хране́ние усто́м мои́м и дверь огражде́ния о устна́х мои́х.

И паки первый лик поет:

Да испра́вится моли́тва моя, я́ко кади́ло пред Тобо́ю, воздея́ние руку́ мое́ю, же́ртва вече́рняя.

Чтец же и вторый лик, и тоя страны предстоящий народ припадает на колена.

Таже чтец поет третий стих:

Не уклони́ се́рдце мое́ в словеса́ лука́вствия, непщева́ти вины́ о гресе́х.

И паки вторый лик поет:

Да испра́вится моли́тва моя, я́ко кади́ло пред Тобо́ю, воздея́ние руку мое́ю, же́ртва вече́рняя.

Чтец же и первый лик, и тоя страны предстоящий народ паки приклоняет колена.

Посем паки чтец поет:

Да испра́вится моли́тва моя, я́ко кади́ло пред Тобо́ю.

Тогда оба лика и весь в церкви предстоящий народ припадает на колена и стоит дóндеже чтец поет.

Воставше же допевают на клиросе:

Воздея́ние руку́ мое́ю, же́ртва вече́рняя.

Посем три поклоны великия с молитвою святаго Ефрема.

И прочее последование Преждеосвященной литургии.

По заамвонной же молитве поем настоящий молебный канон святаго Феодора. Предложше же на уготованном пред царскими враты столе и коливо.

Священник: Благослове́н Бог наш все́гда, ны́не и при́сно и во ве́ки веко́в.

Чтец: Ами́нь.

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 142.

Го́споди, услы́ши моли́тву мою, внуши́ моле́ние мое во и́стине Твоей, услы́ши мя в пра́вде Твоей: и не вни́ди в суд с рабо́м Твоим, я́ко не оправди́тся пред Тобою всяк живы́й. Я́ко погна́ враг ду́шу мою, смири́л есть в зе́млю живо́т мой, посади́л мя есть в те́мных, я́ко ме́ртвыя ве́ка. И уны́ во мне дух мой, во мне смяте́ся се́рдце мое. Помяну́х дни дре́вния, поучи́хся во всех де́лех Твоих, в творе́ниих руку́ Твое́ю поучи́хся. Возде́х к Тебе ру́це мои, душа́ моя, я́ко земля́ безво́дная Тебе. Ско́ро услы́ши мя, Го́споди, исчезе́ дух мой, не отврати́ лица́ Твоего от Мене́, и уподо́блюся низходя́щим в ров. Слы́шану сотвори́ мне зау́тра ми́лость Твою, я́ко на Тя упова́х. Скажи́ мне, Го́споди, путь, во́ньже пойду́, я́ко к Тебе взях ду́шу мою. Изми́ мя от враг мои́х, Го́споди, к Тебе прибего́х. Научи́ мя твори́ти во́лю Твою, я́ко Ты еси́ Бог мой. Дух Твой Благи́й наста́вит мя на зе́млю пра́ву. Имене Твоего ра́ди, Го́споди, живи́ши мя, пра́вдою Твое́ю изведе́ши от печа́ли ду́шу мою. И ми́лостию Твое́ю потреби́ши враги́ моя и погуби́ши вся стужа́ющия души́ моей, я́ко аз раб Твой есмь.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Аллилу́иа, аллилу́иа, аллилу́иа, сла́ва Тебе́, Бо́же. (Трижды.)

Таже поем Бог Госпо́дь... на оба лика во глас 2:

Бог Госпо́дь, и яви́ся нам, благослове́н Гряды́й во и́мя Госпо́дне.

Стих 1: Испове́дайтеся Го́сподеви я́ко Благ, я́ко в век ми́лость Его́.

Бог Госпо́дь, и яви́ся нам, благослове́н Гряды́й во и́мя Госпо́дне.

Стих 2: Обыше́дше обыдо́ша мя, и и́менем Госпо́дним противля́хся им.

Бог Госпо́дь, и яви́ся нам, благослове́н Гряды́й во и́мя Госпо́дне.

Стих 3: Не умру́, но жив бу́ду, и пове́м дела́ Госпо́дня.

Бог Госпо́дь, и яви́ся нам, благослове́н Гряды́й во и́мя Госпо́дне.

Стих 4: Ка́мень его́же небрего́ша зи́ждущии, сей бысть во главу́ у́гла: от Го́спода бысть сей, и есть ди́вен во очесе́х на́ших.

Бог Госпо́дь, и яви́ся нам, благослове́н Гряды́й во и́мя Госпо́дне.

Тропарь, глас 2:

Ве́лия ве́ры исправле́ния, во исто́чнице пла́мене, я́ко на воде́ упокое́ния, святы́й му́ченик Фео́дор ра́довашеся: огне́м бо всесожже́гся, я́ко хлеб сла́дкий Тро́ице принесе́ся. Того́ моли́твами, Христе́ Бо́же, спаси́ ду́ши на́ша.

Сла́ва Отцу́ и Сы́ну и Свято́му Ду́ху.

И ны́не и при́сно и во ве́ки веко́в. Ами́нь.

Богородичен: Вся па́че смы́сла, вся пресла́вная Твоя́, Богородице, та́инства, чистоте́ запеча́танной, и де́вству храни́му, Ма́ти позна́лася еси́ нело́жна, Бо́га ро́ждши и́стиннаго. Того́ моли́ спасти́ся душа́м на́шим.

Псалом 50.

Поми́луй мя, Бо́же, по вели́цей ми́лости Твоей, и по мно́жеству щедро́т Твои́х очи́сти беззако́ние мое. Наипа́че омы́й мя от беззако́ния моего́, и от греха́ моего́ очи́сти мя. Я́ко беззако́ние мое аз зна́ю, и грех мой предо мно́ю есть вы́ну. Тебе еди́ному согреши́х и лука́вое пред Тобою сотвори́х, я́ко да оправди́шися во словесе́х Твои́х, и победи́ши, внегда́ суди́ти Ти. Се бо в беззако́ниих зача́т есмь, и во гресе́х роди́ мя ма́ти моя. Се бо и́стину возлюби́л еси́, безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся, омы́еши мя, и па́че сне́га убелю́ся. Слу́ху моему́ да́си ра́дость и весе́лие, возра́дуются ко́сти смире́нныя. Отврати́ лице́ Твое от грех моих и вся беззако́ния моя очи́сти. Се́рдце чи́сто сози́жди во мне, Бо́же, и дух прав обнови́ во утро́бе моей. Не отве́ржи мене́ от лица́ Твоего, и Ду́ха Твоего Свята́го не отыми́ от Мене́. Возда́ждь ми ра́дость спасе́ния Твоего, и Ду́хом Влады́чним утверди́ мя. Научу́ беззако́нныя путе́м Твои́м, и нечести́вии к Тебе обратя́тся. Изба́ви мя от крове́й, Бо́же, Бо́же спасе́ния моего́, возра́дуется язы́к мой пра́вде Твоей. Го́споди, устне́ мои отве́рзеши, и уста́ моя возвестя́т хвалу́ Твою. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н: се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возношение и всесожега́емая; тогда́ возложа́т на олта́р Твой тельцы́.

И глаголем канон, творение Иоанна Дамаскина, глас 8.

Песнь 1

Ирмос: Во́ду проше́д:

Припев: Святы́й великому́чениче Фео́доре, моли́ Бо́га о нас.

Бо́жия тя рачи́теля, Фео́доре, ве́дый, и любо́вию неизбе́жною твое́ю запе́нся, ду́шу же и те́ло, и словеса́ похва́л возлага́ю.

Святы́й великому́чениче Фео́доре, моли́ Бо́га о нас.

Писа́шеся повеле́ние богоме́рзкое, же́ртву и́долом, а не живо́му Бо́гу приноси́ти: но приведе́н был еси́, не пожря́й, страстоте́рпче, Бо́гу же имы́й приведе́н бы́ти.

Сла́ва Отцу́ и Сы́ну и Свято́му Ду́ху.

Раче́нием Боже́ственным пригвожде́н, Бо́га Вы́шняго Сы́ну Единоро́дному, Фео́доре му́чениче, вво́инился еси́, и по́честей не погреши́л еси́.

И ны́не и при́сно и во ве́ки веко́в. Ами́нь.

Чи́ни Тя А́нгелов и челове́ков, Безневе́стная Ма́ти, восхваля́ют непреста́нно: Соде́теля бо сих я́ко Младе́нца, во объя́тиих Твои́х носи́ла еси́.

Песнь 3

Ирмос: Ты еси́ утвержде́ние:

Святы́й великому́чениче Фео́доре, моли́ Бо́га о нас.

Пе́ние из усте́н мои́х, и из боле́зненныя души́ мольбу́ приношу́, ю́же уще́дри, страстоте́рпче Фео́доре.

Святы́й великому́чениче Фео́доре, моли́ Бо́га о нас.

Плоть покори́л еси́ самоде́ржцу, сла́вне му́чениче, уму́, и обо́ими угожда́еши Созда́вшему.

Сла́ва Отцу́ и Сы́ну и Свято́му Ду́ху.

Стал еси́ на суди́щи мучи́тельском, Христа́ Царя́ богосло́вя: жре́ти бо скве́рным отре́клся еси́, Фео́доре.

И ны́не и при́сно и во ве́ки веко́в. Ами́нь.

Тя вси стяжа́хом прибе́жище и сте́ну при́сно христиа́не: Тя славосло́вим немо́лчно, Безневе́стная.

Песнь 4

Ирмос: Услы́шах, Го́споди:

Святы́й великому́чениче Фео́доре, моли́ Бо́га о нас.

Та́ин Боже́ственных вкуси́в, в ра́зуме, му́чениче Фео́доре, непосты́дную про́поведь Бо́жия рожде́ния испове́дал еси́.

Святы́й великому́чениче Фео́доре, моли́ Бо́га о нас.

Стра́стное божество́ непщева́ху, страсте́м служа́щии, и́хже Ду́хом изобличи́л еси́, страда́льче Фео́доре, просвеща́емь.

Сла́ва Отцу́ и Сы́ну и Свято́му Ду́ху.

Изба́вителя моли́твою, тебе́ воспева́ющим, блаже́нне Фео́доре, от разли́чных обстоя́ний и страсте́й бы́ти мо́лим.

И ны́не и при́сно и во ве́ки веко́в. Ами́нь.

Клас возрасти́вшая животворя́щий, Неора́нная Ни́во, подаю́щий ми́рови жизнь, Богоро́дице, спаси́ пою́щия Тя.

Песнь 5

Ирмос: У́тренююще вопие́м Ти:

Святы́й великому́чениче Фео́доре, моли́ Бо́га о нас.

Люби́те возлюби́вшаго Го́спода, возглаша́л еси́, страда́льче Фео́доре, стра́ждущим с тобо́ю му́чеником.

Святы́й великому́чениче Фео́доре, моли́ Бо́га о нас.

Я́ко ре́вностию, страстоте́рпче, разжиза́яся се́рдцем, боги́ню лжеимени́тую с тре́бищем попали́л еси́.

Сла́ва Отцу́ и Сы́ну и Свято́му Ду́ху.

Си́лою непобеди́мою, Фео́доре, страстоте́рпче, ва́рварскую де́рзость и моя стра́сти погуби́.

И ны́не и при́сно и во ве́ки веко́в. Ами́нь.

Де́ву по рождестве́ пое́м Тя, Богоро́дице: Ты бо Бо́га Сло́ва пло́тию ми́рови родила́ еси́.

Песнь 6

Ирмос: Очи́сти мя, Спа́се:

Святы́й великому́чениче Фео́доре, моли́ Бо́га о нас.

Коль сла́бое, коль немощно́е бого́в су́етных шата́ние, на отмще́ние свое́, челове́ком моля́шеся в стоя́нии побежда́емое, нело́жных му́чеников, пропове́дающих и́стину.

Святы́й великому́чениче Фео́доре, моли́ Бо́га о нас.

Сла́ва Отцу́ и Сы́ну и Свято́му Ду́ху.

Укрепи́вся си́лою Бо́жиею, му́чеников сла́во, Фео́доре, му́ки злочести́вых, младе́нец стреля́ния зрел еси́, блаже́нне, ве́чнующее бу́дущих предзря́.

И ны́не и при́сно и во ве́ки веко́в. Ами́нь.

Да изба́вимся от лю́тых прегреше́ний моли́твами Твои́ми, Богороди́тельнице Чи́стая, и да улучи́м, Всечи́стая, Боже́ственнаго осия́ния, из Тебе́ неизрече́нно воплоти́вшагося Сы́на Бо́жия.

Кондак, глас 8:

Ве́ру Христо́ву я́ко щит внутрь прие́м в се́рдце твое́м, проти́вныя си́лы попра́л еси́, многострада́льче, и венце́м небе́сным венча́лся еси́ ве́чно, Фео́доре, я́ко непобеди́мый.

Песнь 7

Ирмос: От Иуде́и доше́дше:

Святы́й великому́чениче Фео́доре, моли́ Бо́га о нас.

Ура́нен был еси́ те́лом за ура́неннаго Сло́ва пло́тию нас ра́ди, и Сему́ благода́рственно веселя́ся возопи́л еси́, стратоте́рпче Фео́доре: оте́ц на́ших Бо́же, благослове́н еси́.

Святы́й великому́чениче Фео́доре, моли́ Бо́га о нас.

Я́ко во гро́бе положи́ся, и во́лею запечатле́ся Изба́вителю всех, в темни́це запечатле́нной всели́лся еси́, вопия́, страстоте́рпче Фео́доре: оте́ц на́ших Бо́же, благослове́н еси́.

Святы́й великому́чениче Фео́доре, моли́ Бо́га о нас.

Умерщвле́н быв, и стра́сти плотски́я произволе́нием оттря́с, не сне́дию, страстоте́рпче, но любо́вию Боже́ственною пита́яся, пел еси́: оте́ц на́ших Бо́же, благослове́н еси́.

Сла́ва Отцу́ и Сы́ну и Свято́му Ду́ху.

В темни́це, страстоте́рпче, я́коже в пещи́ ю́ноши иногда́, Еди́н нетле́нныя Тро́ицы, тебе́ укрепля́ет ви́ден быв, вопию́ща: оте́ц на́ших, Бо́же, благослове́н еси́.

И ны́не и при́сно и во ве́ки веко́в. Ами́нь.

На́ше спасе́ние, я́коже восхоте́л еси́, Спа́се, устро́ити, во утро́бу Де́вы всели́лся еси́, Ю́же ми́ру Предста́тельницу показа́л еси́: оте́ц на́ших, Бо́же, благослове́н еси́.

Песнь 8

Ирмос: Седмери́цею пещь:

Святы́й великому́чениче Фео́доре, моли́ Бо́га о нас.

Ослепле́н умо́м беззако́нных нача́льник, богочести́ву тебе́ нечести́вно претя́ше: что всу́е на Челове́ка ну́ждею уме́рша, безу́мне, возложи́л еси́ наде́жду? но ты возопи́л еси́: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Святы́й великому́чениче Фео́доре, моли́ Бо́га о нас.

Я́ко смы́сленный, и прему́дрый строи́тель благода́ти, да́нною тебе́ от Бо́га благода́тию возопи́л еси́, Фео́доре, повелева́ющему нечести́вно: сей студ мне и пою́щим бу́ди: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

Сла́ва Отцу́ и Сы́ну и Свято́му Ду́ху.

Ю́ношески подвиза́лся еси́, де́рзостно изобличи́л еси́: что безу́мствуеши, му́чителю, взыва́л еси́, повелева́я тва́рем служи́ти ло́жно, оста́вльшим Созда́вшаго? но аз воспева́ю: о́троцы, благослови́те, свяще́нницы, воспо́йте, лю́дие, превозноси́те во вся ве́ки.

И ны́не и при́сно и во ве́ки веко́в. Ами́нь.

Плотски́ми изображе́ньми, и разли́чными гана́нии, и знамена́тельными и образи́тельными изрече́ньми, Твое́ предвеща́ху богоглаго́ливии рождество́, преесте́ственное и чу́дное, Де́во: те́мже Тя, веселя́щеся, благоче́стно восхваля́ем, Христа́ превознося́ще во вся ве́ки.

Песнь 9

Ирмос: Тя, Неискусобра́чную:

Вещество́ муче́ния твоего́, Бо́жие, Фео́доре, жела́ние. Те́мже ти и вещество́ бысть веще́ственному те́ло огню́: и́мже к Боже́ственному ра́дуяся огню́ изше́л еси́, страстоте́рпче уго́дниче Бо́жий Фео́доре.

Святы́й великому́чениче Фео́доре, моли́ Бо́га о нас.

Му́чениче всече́стне, попали́в не попали́лся еси́: ты бо пре́лесть попали́л еси́, Бо́гу же предстои́ши живы́й, и в нем му́ченически веселя́ся, страстоте́рпче и уго́дниче Фео́доре.

Сла́ва Отцу́ и Сы́ну и Свято́му Ду́ху.

Еди́наго Тя зна́ем Христа́, еди́наго от Тро́ицы, во двою́ соверше́нну естеству́, лю́ди Твоя́ спаси́ сия́, я́же стяжа́л еси́ Честно́ю Твое́ю Кро́вию, Фео́дора страстоте́рпца моли́твами.

И ны́не и при́сно и во ве́ки веко́в. Ами́нь.

Тя, неви́димаго Бо́га носи́вшую объя́тии, на небесе́х воспева́емаго от всея́ си́лы, и Тобо́ю нам да́руемое вы́ну спасе́ние во обстоя́нии, велича́ем.

Таже катавасия: Тя, Неискусобра́чную Ма́терь Бо́га Вы́шняго, Тя, па́че ума́ ро́ждшую Сло́вом вои́стинну Бо́га, вы́шшую пречи́стых сил, немо́лчными славословле́нии велича́ем.

Чтец: Святы́й Бо́же, Святы́й Кре́пкий, Святы́й Безсме́ртный, поми́луй нас. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй. (Трижды.)

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на небесе́х! Да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на небеси́ и на земли́. Хлеб наш насу́щный даждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Священник: Я́ко Твое́ есть Ца́рство и си́ла и сла́ва, Отца́ и Сы́на и Свята́го Ду́ха, ны́не и при́сно и во ве́ки веко́в.

Чтец: Ами́нь.

Тропарь святаго, глас 2:

Слава Отцу, и Сыну, и Святому Духу.

Кондак, глас 8:

И ныне и присно, и во веки веков. Ами́нь.

Богородичен, глас тойже:

Я́коже предста́тельство вси, и держа́вное заступле́ние прегре́шшии стяжа́хом, Всечи́стая, Твою́ те́плую по́мощь, Де́во Ма́ти Мари́е, христиа́н спасе́ние. Тем не преста́й о нас моля́щи Спа́са, дарова́тися проще́нию.

Посем бывает благословение колива.

Диакон: Го́споду помо́лимся.

Лик: Го́споди, поми́луй.

Священник глаголет молитву над коливом:

Вся соверши́вый сло́вом Твои́м, Го́споди, и повеле́вый земли́ многоразли́чныя прозяба́ти плоды́, в наслажде́ние и пи́щу на́шу, И́же се́менми три о́троки, и Дании́ла, су́щия в Вавило́не, сластнопита́нных све́тлшия показа́вый: Сам Всеблаги́й Царю́, и се́мена сия́ с разли́чными плоды́ благослови́, и от них вкуша́ющия освяти́, я́ко в сла́ву Твою́, и в честь свята́го великому́ченика Фео́дора Ти́рона, сия́ предложи́шася от Твои́х рабо́в, и в па́мять во благочести́вой ве́ре сконча́вшихся. Пода́ждь же, Бла́же, благоукраси́вшим сия́, и па́мять соверша́ющим, вся я́же ко спасе́нию проше́ния, и ве́чных Твои́х благ наслажде́ние: моли́твами Пречи́стыя Влады́чицы на́шея Богоро́дицы и Присноде́вы Мари́и, и свята́го великому́ченика Фео́дора Ти́рона, его́же и па́мять соверша́ем, и всех святы́х Твои́х: я́ко Ты еси́ благословля́яй, и освяща́яй вся́ческая, Бо́же наш, и Тебе́ сла́ву возсыла́ем Безнача́льному Отцу́, со Единоро́дным Твои́м Сы́ном и Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Лик: Ами́нь.

Бу́ди и́мя Госпо́дне благослове́нно от ны́не и до ве́ка.

(Трижды.)

Псалом 33.

Благословлю́ Го́спода на вся́кое вре́мя, вы́ну хвала́ Его́ во усте́х мои́х. О Го́споде похва́лится душа́ моя́, да услы́шат кро́тции и возвеселя́тся. Возвели́чите Го́спода со мно́ю, и вознесе́м и́мя Его́ вку́пе. Взыска́х Го́спода, и услы́ша мя, и от всех скорбе́й моих изба́ви мя. Приступи́те к Нему́ и просвети́теся, и лица ва́ша не постыдя́тся. Сей ни́щий воззва́, и Госпо́дь услы́ша и́, и от всех скорбе́й его́ спасе́ и́. Ополчи́тся А́нгел Госпо́день о́крест боя́щихся Его́, и изба́вит их. Вкуси́те и ви́дите, я́ко благ Госпо́дь; блаже́н муж, и́же упова́ет Нань. Бо́йтеся Го́спода, вси святи́и Его́, я́ко несть лише́ния боя́щимся Его. Бога́тии обнища́ша и взалка́ша, взыска́ющии же Го́спода не лиша́тся вся́каго бла́га. Прииди́те, ча́да, послу́шайте мене́, стра́ху Госпо́дню научу́ вас. Кто есть челове́к хотя́й живо́т, любя́й дни ви́дети бла́ги? Удержи́ язы́к твой от зла, и устне́ твои́, е́же не глаго́лати льсти. Уклони́ся от зла и сотвори́ бла́го. Взыщи́ ми́ра, и пожени́ и́. О́чи Госпо́дни на пра́ведныя, и у́ши Его́ в моли́тву их. Лице́ же Госпо́дне на творя́щия зла́я, е́же потреби́ти от земли́ па́мять их. Воззва́ша пра́веднии, и Госпо́дь услы́ша их, и от все́х скорбе́й их изба́ви их. Бли́з Госпо́дь сокруше́нных се́рдцем, и смире́нныя ду́хом спасе́т. Мно́ги ско́рби пра́ведным, и от всех их изба́вит я́ Госпо́дь. Храни́т Госпо́дь вся ко́сти их, ни еди́на от них сокруши́тся. Смерть гре́шников люта́, и ненави́дящии пра́веднаго прегреша́т. Изба́вит Госпо́дь ду́ши раб Свои́х, и не прегреша́т вси упова́ющии на Него́.

И отпуст по обычаю.