Триодь Постная. Понедельник 5-ой седмицы.

Службы Великого поста

Последование утрени

Тро́ичны случи́вшагося гла́са. По 1-м стихосло́вии пое́м седа́льны умили́тельныя, осмогла́сника два́, с богоро́дичным. По 2-м же стихосло́вии седа́лен господи́на Ио́сифа. Гла́с 3.

Подо́бен: Красоте́ де́вства:

Красне́йшее вре́мя наста́, достохва́льный де́нь возсия́ воздержа́ния бра́тие, потщи́мся очи́ститися, я́ко да яви́мся чи́сти Сотво́ршему, и красоту́ Его́ получи́м, моли́твами Того́ роди́вшия, еди́ныя чи́стыя Богома́тере.

Сла́ва, то́йже.

И ны́не, Богоро́дичен: Красоте́ де́вства Твоего́, и пресве́тлой чистоте́ Твое́й Гаврии́л удиви́вся, вопия́ше Ти́ Богоро́дице: ку́ю Ти́ похвалу́ принесу́ досто́йную? что́ же возъимену́ю Тя́? недоумева́ю, и ужаса́юся. Те́мже я́ко повеле́н бы́х, вопию́ Ти: ра́дуйся Благода́тная.

По 3-м стихосло́вии седа́лен господи́на Фео́дора. Гла́с 7.

Подо́бен: Го́споди, мы́ есмы́:

Го́споди, да́вый на́м предвари́ти дне́шний де́нь, седми́цу святу́ю предсия́ющую све́тло, ла́зарево от ме́ртвых воста́ние стра́шное, сподо́би рабы́ Твоя́ стра́хом Твои́м преити́ по́прище поще́ния все́ соверша́ющыя. [Два́жды.]

Богоро́дичен: Честне́йшая пресла́вных Херуви́мов еси́ Всечи́стая Де́во: они́ бо Боже́ственныя не терпя́ще си́лы, крила́ми покры́вше ли́ца, слу́жбу соверша́ют: Ты́ же воплоще́нна Сло́ва, самозри́тельно ви́дящи но́сиши: Его́же непреста́нно моли́ о душа́х на́ших.

Кано́н в мине́и, и трипе́снец господи́на Ио́сифа: и стихосло́вится пе́снь. Гла́с 3.

Пе́снь 1.

Ирмо́с: Во́ды дре́вле ма́нием Боже́ственным во еди́но со́нмище совокупи́вый, и раздели́вый мо́ре израильтеским лю́дем, Се́й Бог на́ш препросла́влен е́сть: Тому Еди́ному пои́м, я́ко просла́вися.

На́ша помышле́ния Боже́ственным ра́лом возде́лавше Боже́ственнаго поще́ния, доброде́телей кла́с плодопринесе́м, я́ко да не вза́лчем во ве́ки, наслажда́ющеся сла́достию неиждива́емою ра́дующеся.

Многоле́тныя стра́сти вну́трь ношу́, омрача́ющыя окая́нную ду́шу мою́, к Твое́й безле́тне Сло́ве, безнача́льнаго Отца́ си́ле непобеди́мей, сокруше́нным се́рдцем припа́даю и молю́ся: уще́дри, и спаси́ мя.

До́брое поще́ние пита́ет сердца́, умаща́ющее помышле́ния богоуго́дная, и страсте́й бе́здну изсуша́ющее, ту́чами умиле́ния очища́ет, ве́рою хвалу́ принося́щих Вседержи́телю.

Богоро́дичен: Многоимени́тая Отрокови́це, ра́дуйся Свята́я Де́во, Богороди́тельнице Мари́е, ве́рных Похвало́, кля́твы Избавле́ние, Ле́ствице Небе́сная, Недомы́сленное Чу́до, Купино́ Неопали́мая, Земле́ Неде́ланная.

И́ный господи́на Фео́дора, гла́с 7.

Ирмо́с: Пои́м Го́сподеви, погрузи́вшему всю́ си́лу фарао́нову в мо́ри, побе́дную пе́снь, я́ко просла́вися.

Живоно́сному дре́ву поклони́вшеся, отсю́ду и́дем путе́м поще́ния к стра́сти Христо́вой ра́дующеся.

Христу́ после́дующе, отве́ржемся ми́ра, и во́змем кре́ст на ра́мо, сообража́ющеся Его́ Боже́ственным страсте́м.

Тро́ичен: В Тре́х Ли́цех, Пресу́щное Еди́но Божество́, воспои́м вси́ Отца́, и Сы́на, и Свята́го Ду́ха.

Богоро́дичен: Его́же родила́ еси́ недомы́сленно, тле́ния не разуме́вши Чи́стая, Иису́са Спа́са уми́лостиви ны́не о рабе́х Твои́х.

Сла́ва Тебе́ Бо́же на́ш, сла́ва Тебе́.

Егда́ в сла́ве прии́деши со А́нгелы, суди́ти вся́ческим, до́брый отве́т да́ти Тебе́ Христе́, на́с сподо́би.

Ирмо́с: Пои́м Го́сподеви, погрузи́вшему всю́ си́лу фарао́нову в мо́ри, побе́дную пе́снь, я́ко просла́вися.

Пе́снь 8.

Ирмо́с: Вавило́нская пе́щь о́троки не опали́, ниже́ Божества́ о́гнь Де́ву растли́. Те́м со о́троки ве́рнии возопие́м: благослови́те дела́ Господня Го́спода.

Вре́дными зми́я пре́лестьми извлачи́мь, и прельща́емь умо́м по вся́ дни́, я́зве мое́й прилага́я я́зву, Спа́се зову́ Ти: Врачу́ боля́щих, обрати́ и спаси́ мя.

Пости́вся воскреси́ отроча́ Сомани́тиды дре́вле, укрепля́емь Елиссе́й я́ве ду́хом: мы́ же умертви́вшеся сладостра́стием, живоно́сным посто́м ве́рнии оживи́мся.

Ниневи́тяны спа́сл еси́ Го́споди Человеколю́бче, дре́вле пока́явшыяся, в пла́чи и посте́, я́ко благоутро́бен: на́с же ми́лостию Твое́ю уще́дри, недоуме́ющих де́лы испове́датися Тебе́.

Богоро́дичен: По Рождестве́ нетле́нно Пребы́вшая Всенепоро́чная, изба́ви, мо́лимся Чи́стая, от тли́ рабы́ Твоя́, ве́рно пою́щыя единомышле́нием души́: благослови́те дела́ Госпо́дня Го́спода.

И́ный. Ирмо́с: Стра́шнаго Херуви́мом, и чу́днаго Серафи́мом, и ми́ру Творца́, свяще́нницы, и раби́, и ду́си пра́ведных, по́йте, благослови́те, и превозноси́те Его́ во ве́ки.

Воздержа́ния с Бо́гом кре́пость иму́ще ве́рнии, про́чее ю́ношески теце́м свято́е по́прище, и венцы́ прии́мем.

Безпло́дие зря́ многоболе́зненныя моея́ души́, еще́ потерпи́ Христе́, и не посецы́ мене́, я́коже смоко́вницу о́ную прокля́тую.

Благослови́м Отца́, и Сы́на, и Свята́го Ду́ха, Го́спода.

Тро́ичен: Единонача́льная Тро́ице, и Триипоста́сная Еди́нице, О́тче, Сы́не и Ду́ше, от вся́ких изба́ви искуше́ний и бе́д Тя́ воспева́ющыя.

Богоро́дичен: Ра́дуйся, Горо́ Бо́жия: ра́дуйся, Присносве́тлая Свеще́: ра́дуйся, Но́вое Не́бо: ра́дуйся, У́ме Блиста́яйся: ра́дуйся, Хра́ме Госпо́день: ра́дуйся Всепе́тая.

Сла́ва Тебе́ Бо́же на́ш, сла́ва Тебе́.

Стра́шное Твое́ испыта́ние помышля́я Христе́, ужаса́юся, трепе́щу, и вопию́: неизме́рную име́яй ве́лию ми́лость, спаси́ мя окая́ннаго.

Хва́лим, благослови́м, покланя́емся Го́сподеви, пою́ще и превознося́ще во вся́ ве́ки.

Ирмо́с: Стра́шнаго Херуви́мом, и чу́днаго Серафи́мом, и ми́ру Творца́, свяще́нницы, и раби́, и ду́си пра́ведных, по́йте, благослови́те, и превозноси́те Его́ во ве́ки.

Пе́снь 9.

Ирмо́с: Но́вое чу́до и Боголе́пное: деви́ческую бо две́рь затворе́нную я́ве прохо́дит Госпо́дь, на́г во вхо́де, и плотоно́сец яви́ся во исхо́де Бог, и пребыва́ет дверь затворе́на: сию́ неизрече́нно, я́ко Богома́терь велича́ем.

Ча́шу Боже́ственную испо́лнивши ны́не умиле́ния, по́стная благода́ть я́ве, созыва́ет вся́ ве́рныя, вопию́щи с весе́лием: прииди́те, наслади́теся, пия́нство страсте́й отложи́вше, да бу́дущаго сподо́битеся утеше́ния.

Бли́з Су́д, внемли́ душе́, со́вестию попецы́ся, и де́лай до́бре, тебе́ неосужде́ну при́сно соблюда́ющая: а́ще бо себе́ зде́ разсужда́ем, ника́коже та́мо осу́димся без свиде́телей, иде́же пови́ннии осужда́ются.

Нача́ла, Си́лы, Престо́ли, Серафи́ми, Госпо́дьства, и Вла́сти, и Херуви́ми, А́нгели, Арха́нгели, Бо́га моли́те, поще́ния вре́мя прейти́ на́м, сему́ уго́дная творя́щым, да я́ко раби́ благоугоди́вшии сла́ву получи́м.

Богоро́дичен: С му́ченики, с проро́ки, ро́ждшую Тя́, с преподо́бными все́ми Христе́ моля́щуюся приими́ при́сно, о рабе́х прогне́вавших Тя́, Еди́наго Человеколю́бца Влады́ку, Его́же небе́снии чи́нове трепе́щут.

И́ный. Ирмо́с: Па́че естества́ Ма́терь, и по естеству́ Де́ву, еди́ну в жена́х Благослове́нную, пе́сньми ве́рнии Богоро́дицу велича́ем.

Ти́хое пла́вание поще́ния, духо́вным дыха́нием преплы́вше, ко приста́нищу страсте́й Христо́вых, дости́гнути помо́лимся.

Ханане́и поревнова́в, поми́луй мя́ вопию́ Ти, Сы́не Дави́дов Бо́же, и исцели́ мою́ изнемо́гшую ду́шу, я́коже о́ныя дще́рь.

Тро́ичен: Божества́ Естество́, Еди́нствующее Еди́ницу, и начерта́ньми Треми́ Тро́йствующее, Отца́, и Сы́на, и Ду́ха воспои́м.

Богоро́дичен: Во Чре́ве заче́ншая непостижи́маго Сло́ва, и Сего́ без се́мене пло́ти ро́ждшая, моли́ приле́жно спасти́ся душа́м на́шым.

Сла́ва Тебе́ Бо́же на́ш, сла́ва Тебе́.

Оправда́вый мытаря́, очи́сти мя́ вопию́ща: и мне́ гре́шному ми́лостив бу́ди, все́х Судие́, проща́я моя́ согреше́ния.

Ирмо́с: Па́че естества́ Ма́терь, и по естеству́ Де́ву, еди́ну в жена́х Благослове́нную, пе́сньми ве́рнии Богоро́дицу велича́ем.

Свети́лен гла́са.

На стихо́вне самогла́сен, два́жды. Гла́с 8:

Впа́дшему в разбо́йники уподо́бихся а́з, Влады́ко все́х прегреше́ньми мои́ми упа́д, и от ни́х неми́лостивно уязви́хся: но не оста́ви мене́ неисце́льна, не от самари́и, но от пречи́стыя Де́вы прише́дый, Иису́се спаси́тельное и́мя, поми́луй мя́.

Му́ченичен: Что́ вы́ нарече́м святи́и? Херуви́мы ли? я́ко на ва́с почи́л е́сть Христо́с. Серафи́мы ли? я́ко непреста́нно просла́висте Его́? А́нгелы ли? те́ла бо отврати́стеся. Си́лы ли? де́йствуете бо чудесы́. мно́гая ва́ша имена́, и бо́льшая дарова́ния: моли́те спасти́ся душа́м на́шым.

Сла́ва, и ны́не, Богоро́дичен: Небе́сная пою́т Тя́, обра́дованная Ма́ти Безневе́стная, и мы́ славосло́вим неизсле́дованное Твое́ Рождество́ Богоро́дице, моли́ спасти́ся душа́м на́шым.

На 6-м часе́ тропа́рь проро́чества. Гла́с 3:

Я́ко беззако́ния на́ша воста́ша на ны́, воскресни́ Го́споди помози́ на́м: ты́ бо еси́ Оте́ц на́ш, кроме́ бо тебе́ ино́го не зна́ем.

Проки́мен, псало́м 83, гла́с 4: Олтари́ твоя́ Го́споди Си́л, Царю́ мо́й, и Бо́же мо́й. Сти́х: Ко́ль возлю́бленна селе́ния Твоя́ Го́споди Си́л.

Проро́чества Иса́иина чте́ние. [Ис.37:33–38,38:1–6]

Та́ко глаго́лет Госпо́дь на царя́ ассири́йска: не вни́дет в се́й гра́д, ниже́ пу́стит на́нь стрелу́, ниже́ возложи́т на́нь щита́, ниже́ огради́т о́крест его́ огражде́ния: Но путе́м, и́мже прии́де, те́мже возврати́тся, и в гра́д се́й не вни́дет. сия́ глаго́лет Госпо́дь: Защищу́ гра́д се́й, е́же спасти́ его́ мене́ ра́ди, и ра́ди Дави́да раба́ Моего́. И изы́де А́нгел Госпо́день, и изби́ от полка́ ассири́йска сто́ о́смьдесят пя́ть ты́сящ: и воста́вше зау́тра, обрето́ша вся́ телеса́ ме́ртва. И оти́де возвра́щься сеннахири́м ца́рь ассири́йский, и всели́ся в Ниневи́и: И внегда́ покланя́тися ему́ в дому́ Насара́ху отечествонача́льнику своему́, Адрамеле́х и Сараса́р сы́нове его́ уби́ша его́ мечми́, са́ми же убежа́ша во Арме́нию, и воцари́ся Асорда́н сы́н его́ вме́сто его́. Бы́сть же в то́ вре́мя, разболе́ся Езеки́а до сме́рти, и прии́де к нему́ Иса́иа проро́к сы́н Амо́сов, и рече́ к нему́: сия́ глаго́лет Госпо́дь, устро́й о дому́ твое́м, умира́еши бо ты́, и не бу́деши жи́в. И обрати́ Езеки́а лице́ свое́ к стене́, и помоли́ся к Го́сподеви, глаго́ля: Помяни́ Го́споди, ка́ко ходи́х пред Тобо́ю со и́стиною, и се́рдцем и́стинным, и уго́дная пред тобо́ю сотвори́х, и пла́кася Езеки́а пла́чем вели́ким. И бы́сть сло́во Госпо́дне ко Иса́ии глаго́ля: Иди́, и рцы́ Езеки́и: та́ко глаго́лет Госпо́дь Бог Дави́да отца́ твоего́: услы́шах моли́тву твою́, и ви́дех сле́зы твоя́, се́ прилага́ю к ле́том твои́м, ле́т пятьна́десять. И от руки́ царя́ ассири́йска изба́влю тя́, и гра́д се́й, и защищу́ о гра́де се́м.

Проки́мен, псало́м 84, гла́с 8: Яви́ на́м Го́споди ми́лость Твою́, и спасе́ние Твое́ да́ждь на́м. Сти́х: Благоволи́л еси́ Го́споди зе́млю Твою́, возврати́л еси́ пле́н Иа́ковль.

[зри́] Поне́же до́лжно е́сть ве́дати о кафи́смах четвертка́ вели́каго кано́на, я́же су́ть три́, я́ко да прочту́тся пре́жде, и не оста́вятся, зри́ напреди́, и я́коже расположены́ су́ть на свои́х и́м ме́стех, си́це чти́.

Последование вечерни

стихосло́вим вме́сто, Ко Го́споду: рядову́ю кафи́сму Псалти́ра, си́есть, 10-ю. На Го́споди воззва́х, поста́вим стихо́в 6: и пое́м настоя́щыя подо́бны 3, и Мине́и 3.

Стихи́ры подо́бны трипе́снца, господи́на Ио́сифа, гла́с 3.

Подо́бен: Крестоявле́нно:

Да́вый на́м поще́ния вре́мя обрати́тися и живы́м бы́ти, и ника́коже поги́бнути, Сло́ве Бо́жий, сподо́би все́х благоугоди́ти Тебе́ до́бре, и те́плым умиле́нием послужи́ти Тебе́ Христе́, я́коже блудни́ца о́ная целому́дренная и честна́я, иногда́ ми́ром и излия́ньми те́плых сле́з, прегреше́ний прии́мши оставле́ние.

Я́коже слепы́й от се́рдца зову́ Ти: Сы́не Бо́жий, просвети́ мои́ о́чи серде́чныя. Я́коже ве́рная ханане́а вопию́ Ти: поми́луй мя́ Ще́дре, и́бо ду́шу бесну́ющуюся и́мам в сласте́х: ю́же премени́в от тьмы́ страсте́й, про́чее жи́ти чи́сте сотвори́, да сла́влю Твою́ мно́гую благосты́ню.

И́ный, господи́на Фео́дора, гла́с 8.

Подо́бен: Богозва́нный му́ченик:

Богосве́тлая благода́ть воздержа́ния, возсия́вши на́м дне́сь со́лнца светле́е, ду́шы на́шя просвеща́ет, я́коже о́блаки стра́сти грехо́вныя отгоня́ющи. Сего́ ра́ди вси́ притеце́м, благоду́шно сию́ лобыза́юще: ра́дующеся соверша́ем боже́ственное по́прище того́, его́же в весе́лиих учрежда́ющеся возопии́м Христу́: освяти́ бла́же, сие́ соверша́ющыя ве́рно.

И мине́и 3. Сла́ва, и ны́не, Богоро́дичен.

Проки́мен, псало́м 85, гла́с 4: Наста́ви мя́ Го́споди на пу́ть Тво́й, и пойду́ во и́стине Твое́й. Сти́х: Приклони́ Го́споди у́хо твое́.

Бытия́ чте́ние. [Быт.13:12–18]

Авра́м же всели́ся в земли́ Ханаа́нстей: Ло́т же всели́ся во гра́де окре́стных стра́н, и всели́ся в Содо́ме. Челове́цы же су́щии в Содо́ме зли́, и гре́шни пред Бо́гом зело́. Бог же рече́ Авра́му, повнегда́ разлучи́тися Ло́ту от него́: воззри́ очи́ма твои́ма, и ви́ждь от ме́ста, иде́же ты́ ны́не еси́, к се́веру, и югу , и к восто́ку, и мо́рю. Я́ко всю́ зе́млю, ю́же ты́ ви́диши, тебе́ да́м ю́, и се́мени твоему́ во ве́ки. И сотворю́ се́мя твое́ я́ко песо́к земны́й: а́ще кто́ мо́жет исчести́ песо́к земны́й, то и се́мя твое́ изочте́т. Воста́в пройди́ зе́млю в долготу́ ея́, и в широту́, я́ко тебе́ да́м ю́, и се́мени твоему́ во ве́к. И отсели́вся Авра́м, прише́д всели́ся у ду́ба Мамври́йскаго, и́же бя́ше в Хевро́не: и созда́ ту́ же́ртвенник Го́споду.

Проки́мен, псало́м 86, гла́с 4: Лю́бит Госпо́дь врата́ Сио́ня, па́че все́х селе́ний Иа́ковлих.

Сти́х: Основа́ния его́ на гора́х святы́х.

При́тчей чте́ние. [Притч.14:27–35,15:1–4.]

Стра́х Госпо́день исто́чник жи́зни, твори́т же уклоня́тися от се́ти сме́ртныя. Во мно́зе язы́це сла́ва царю́: во оскуде́нии же лю́дсте сокруше́ние си́льному. Долготерпели́в му́ж, мно́г в ра́зуме: малоду́шный же кре́пко безу́мен. Кро́ткий му́ж се́рдцу вра́чь: мо́ль же косте́м се́рдце чу́вственно. Оклевета́яй убо́гаго, раздража́ет Сотво́ршаго и́: почита́яй же Его́, ми́лует ни́щаго. Во зло́бе свое́й отри́нется нечести́вый: наде́яй же ся на Го́спода, свои́м преподо́бием пра́веден. В се́рдце бла́зе му́жа почи́ет прему́дрость: в се́рдцы же безу́мных не познава́ется. Пра́вда возвыша́ет язы́к, умаля́ют же племена́ греси́. Прия́тен царе́ви слуга́ разу́мный: свои́м же благообраще́нием оте́млет безче́стие. Гне́в губи́т и разу́мныя: отве́т же смире́н отвраща́ет я́рость, а сло́во же́стоко воздвиза́ет гне́вы. Язы́к му́дрых до́брая све́сть: уста́ же безу́мных возвеща́ют зла́я. На вся́ком ме́сте о́чи Госпо́дни сматря́ют злы́я же и благи́я. Исцеле́ние язы́ка дре́во жи́зни: храня́й же его́, испо́лнится ду́ха.

На стихо́вне самогла́сен, гла́с 7, еди́ножды:

Я́коже впады́й в разбо́йники и уя́звен, та́ко и а́з впадо́х от мои́х грехо́в, и уя́звена е́сть душа́ моя́: к кому́ прибе́гну исцели́тися? то́кмо к Тебе́ ду́ш же и теле́с врачу́: изле́й на мя́ Бо́же вели́кую Твою́ ми́лость.

И́ный самогла́сен, еди́ножды, гла́с 4:

Прегреши́вше от преступле́ния пе́рваго, от ра́йския сла́дости и наслажде́ния веде́ни бы́хом в безче́стнейшую жи́знь: доброде́телей бо подоба́ющаго и хва́льнаго жития́ совле́кшеся прегреше́ньми, я́ко в разбо́йники впадо́хом: и́сполу же ме́ртвы есмы́, прегреши́вше от спаси́тельных уче́ний Твои́х, но мо́лим Тя́ от Мари́и яви́вшагося, и безстра́стно страсте́м прибли́жившагося Влады́ку: обяжи́ на́шя я́же от греха́ прибы́вшыя стру́пы, и безме́рное Твое́ милосе́рдие излива́й на ны́, Твое́ исцели́тельное попече́ние, я́ко Человеколю́бец.

Му́ченичен: Святы́х му́ченик прие́мый терпе́ние, и от на́с приими́ пе́ние Человеколю́бче, да́руя на́м те́х моли́твами ве́лию ми́лость.

Сла́ва, и ны́не, Богоро́дичен: От все́х бе́д рабы́ Твоя́ сохраня́й, благослове́нная Богоро́дице: да Тя́ сла́вим наде́жду ду́ш на́ших.