Триодь Постная. Среда 6-ой седмицы.

Службы Великого поста

Последование утрени

Тро́ичны гла́са. По 1-м стихосло́вии седа́льны Кре́стны Осмогла́сника два́, с Крестобогоро́дичным. По 2-м же стихосло́вии седа́лен господи́на Ио́сифа. Гла́с 2.

Подо́бен: Ка́мень гро́бный:

Я́ко ка́менем отягче́н мно́гими греха́ми, во гро́бе лежу́ небреже́ния ще́дре: от него́же мя́ возведи́, Благоутро́бне Го́споди. [Два́жды.]

Крестобогоро́дичен.

Подо́бен: Милосе́рдия:

Честны́м Кресто́м Сына твоего́ соблюда́еми Влады́чице Чи́стая Богоро́дице, вся́кий прило́г бори́теля, вси́ удо́бь отража́ем. Те́мже Тя́ по до́лгу прославля́ем я́ко Ма́терь Све́та, и Еди́ну Наде́жду ду́ш на́ших.

По 3-м стихосло́вии седа́лен, господи́на Фео́дора. Гла́с 3.

Подо́бен: Красоте́ де́вства:

Дне́сь Ла́зарь уме́рый погреба́ется, и рыда́ние пою́т сего́ сро́дницы, я́коже Прови́дец и Бо́г, стра́сть предре́кл еси́: Ла́зарь у́спе, ученико́м провеща́я, но ны́не иду́ воскреси́ти его́же созда́х. Сего́ ра́ди Тебе́ вси́ вопие́м: сла́ва держа́ве кре́пости Твоея́. [Два́жды.]

Крестобогоро́дичен: Неискусобра́чная чи́стая, и Ма́ти Твоя́ Христе́, зря́щи тя́ ме́ртва ви́сяща на Дре́ве, ма́терски рыда́ющи глаго́лаше: что́ Ти воздаде́ евре́йский беззако́нный собо́р безблагода́тный, мно́гих и вели́ких Твои́х даро́в, Сы́не Мо́й, наслажде́йся? пою́ Твое́ Боже́ственное снизхожде́ние.

Кано́н в мине́и: и трипе́снец, господи́на Ио́сифа, гла́с 2.

Пе́снь 3.

Ирмо́с: Непло́дствовавший мо́й у́м, плодоно́сен Бо́же покажи́ ми, де́лателю до́брых, насади́телю благи́х, благоутро́бием Твои́м.

Си́лою Креста́ Твоего́ укрепи́в у́м мо́й, изнемо́гший прило́гми лука́выми, к хоте́нию твоему́ напра́ви Го́споди.

Уны́ния дрема́нием, на одре́ спя́ща мя́ сласте́й воздви́гни Го́споди, и Твои́м страсте́м покло́нника покажи́.

Просвети́вшеся душа́ми, посто́м чи́сты усре́сти по́йдем Христа́, ко Иерусали́му гряду́щаго пло́тию.

Богоро́дичен: Неопали́вшаяся огне́м Божества́ Чи́стая, попали́ моя́ ве́щная стремле́ния страсте́й, я́ко да Ве́рно Чи́стая сла́влю Тя́.

И́ный. Гла́с 3.

Ирмо́с: Непло́дная душе́ и безча́дная, стяжи́ пло́д благосла́вный, веселя́щися возопи́й: утверди́хся Тобо́ю Бо́же, не́сть свя́т, не́сть пра́веден, па́че тебе́ Го́споди.

Дне́сь Ла́зарь уме́рый, не утаи́ся всеви́дящаго о́ка Иису́сова. Те́мже сказу́ет сие́ ученико́м, вопия́: Ла́зарь дру́г На́ш у́спе, воскреси́ти его́ иду́.

Во Иуде́ю Го́споди па́ки ити́ ре́к, ученики́ устраши́л еси́, но де́рзостно вопия́ше Фома́: живо́т е́сть, и́дем, а́ще у́бо и у́мрем, а́бие оживе́м.

Тро́ичен: Тро́ице Единосу́щная, вседержи́телю О́тче, Сы́не Собезнача́льный, с Сопресто́льным Боже́ственным Ду́хом, Еди́но Поклоне́ние, Божество́ Несозда́нное, Тебе́ пое́м вси́ челове́цы.

Богоро́дичен: Де́во Ма́ти пречи́стая, ко́реню Иессе́ов, от него́же Христо́с возсия́, Живоно́сный Цве́т земноро́дных, Е́юже изба́вихомся тли́ и сме́рти, Тя́ пое́м вси́ Чи́стая.

Сла́ва Тебе́ Бо́же на́ш, сла́ва Тебе́.

Ра́дуйся Сио́не, ны́не гряде́т Ца́рь тво́й кро́ток, я́коже проро́к возопи́, и но́сит жребя́ Сего́ пло́тски, руко́ю Свое́ю вся́ содержа́щаго: пое́м Держа́ву Его́.

Пе́снь 8.

Ирмо́с: В купине́ Моисе́ю Девы чу́до, на Сина́йстей горе́, прообрази́вшаго иногда́, по́йте, благослови́те, и превозноси́те во вся́ ве́ки.

Смире́нныя моея́ души́ тя́жкий ка́мень лю́таго уны́ния отвали́ Христе́, и воздви́гни мя́ от гро́ба нечу́вствия в сла́ву Твою́ Сло́ве.

Сме́рть дру́га Твоего́ предсказа́л еси́ друго́м, за милосе́рдие ми́лости, Прови́дче и Бо́же: его́же име́л еси́ воздви́гнути из гро́ба четверодне́вна, к твоему́ славосло́вию.

Во Иуде́ю па́ки Христе́ гряде́ши, и́щущую жи́зни Тя́ Дре́во, Дре́вом уби́ти, жела́я обезсме́ртвити умерщвле́нныя Дре́ва сне́дию.

Богоро́дичен: В тебе́ Де́во чи́стая, ви́дена бы́ша вся́ ше́ствия Бо́га, сохра́ншаго Твою́ чистоту́ по рождестве́, запечатле́нну я́ве во вся́ ве́ки.

И́ный.

Ирмо́с: Из Безнача́льнаго Отца́ рожде́ннаго пре́жде ве́к Бо́га, и в после́дняя от Богоро́дицы в пло́ть обле́кшася, я́ко соверше́нна челове́ка, и Бо́га и́стинна, по́йте, благослови́те, и превозноси́те во вся́ ве́ки.

Ла́зарь дне́сь уме́рый изно́сится, дру́г Христо́в, и рыда́ют су́щии с Мари́ею и Ма́рфою вси́: Христо́с же ра́достию прихо́дит к нему́, показа́ти лю́дем, я́ко То́й е́сть живо́т все́х.

Я́ко из горы́ Елео́нския, от высоты́ ми́лостыней, доброде́телей ве́твие лю́дие секу́ще, прииди́те угото́вим к на́м мы́сленно прише́ствие Христо́во, пою́ще, благословя́ще Его́, и превознося́ще во вся́ ве́ки.

Благослови́м Отца́, и Сына, и Свята́го Ду́ха, Го́спода.

Тро́ичен: Триипоста́сная Еди́нице, О́тче, Сы́не и Ду́ше Живы́й, Еди́но Божество́, Еди́но Ца́рство, Тя́ хва́лят незаходи́маго све́та А́нгельская во́инства, и мы́ земни́и пое́м, благослови́м, и превозно́сим во вся́ ве́ки.

Богоро́дичен: Се́ вси́ ро́дове блажи́м Тя́ Пречи́стая, вели́чия Твоя́ зря́ще: Ты́ бо ражда́еши преесте́ственно все́х Творца́ Бо́га су́ща и челове́ка. Те́мже Тя́ благослови́м, и превозно́сим во ве́ки.

Сла́ва Тебе́ Бо́же на́ш, сла́ва Тебе́.

Со о́троки и мы́ усря́щим Христа́ Бо́га, вме́сто ва́ий принося́ще ми́лостыню, в моли́тве серде́чней, с ве́твьми оса́нна вопию́ще: благослови́те, и превозноси́те Его́ во ве́ки.

Хва́лим, благослови́м, покланя́емся Го́сподеви:

Пе́снь 9.

Ирмо́с: От земноро́дных кто́ слы́ша таково́е? или кто́ ви́де когда́, я́ко Дева обре́теся во чре́ве иму́щая? и безболе́зненно Младенца поро́ждшая? таково́е Твое́ чу́до и Тя́ Чистая Богородице велича́ем.

Дании́л посто́м огражде́н, загради́ уста́ звере́й: сему́ ревну́ющи душе́ моя́, рыка́ющаго я́коже льва́ зми́я, и и́щущаго бра́шно сотвори́ти вся́кую ду́шу, кре́стною по́мощию отжени́.

Сло́ве Бо́жий, умерщвле́нную греха́ми ду́шу мою́, и затворе́нную во гро́бе преступле́ния, животода́тельным Твои́м сло́вом воскреси́в, принести́ Тебе́ ве́тви доброде́телей, победи́телю сме́рти, сподо́би.

Не́бо я́ко престо́л име́яй, и подно́жие зе́млю: Бо́га Отца́ Сло́во, на жребя́ти носи́мь, во гра́д вхо́дит Святы́й из у́ст младе́нец хвалу́ кра́сную, я́ко Ца́рь все́х соверши́ти.

Богоро́дичен: В жена́х Ты́ еди́на украси́лася еси́, о Пречу́дная Чи́стая! красне́йшее Сло́во роди́вши, па́че все́х челове́к я́вльшагося красне́йша: Того́ у́бо моли́, скве́рну очи́стити, Де́во, се́рдца моего́.

И́ный.

Ирмо́с: На Сина́йстей горе́, ви́де Тя́ в купине́ Моисе́й, неопа́льно о́гнь Божества́ Заче́ншую во чре́ве: Дании́л же Тя́ ви́де го́ру несеко́мую: же́зл прозя́бший, Иса́иа взыва́ше, от ко́рене Дави́дова.

Надгро́бныя сле́зы излива́ют Ла́заревы сестры́, зря́щыя сро́дника дне́сь под ка́менем го́рьким: Христо́с же мо́й издале́ча сие́ сказу́я, глаго́лаше апо́столом Свои́м, ра́дуюся ва́с ра́ди, не бе́х бо пло́тию та́мо.

Па́ки гряде́т к тебе́, уби́йце Иуде́е, Христо́с, спаси́тельную стра́сть жела́я испо́лнити я́ко Бо́г: Его́же иска́ла еси́ ка́мением уби́ти, се́ к Тебе́ самозва́н хотя́ прихо́дит ко уби́йству Твоему́, во е́же спасти́ на́с.

Тро́ичен: Божество́ еди́ница, и Тро́ица е́сть: о пресла́внаго обраще́ния! соединя́емая естество́м, дели́тся Ли́цы, сво́йственно: несеко́ма бо сече́тся, еди́но су́щи трои́тся: сия́ Оте́ц е́сть, Сы́н, и Ду́х Живы́й, соблюда́ющая все́.

Богоро́дичен: Деторо́дную де́ву кто́ слы́ша, и ма́терь без му́жа? Мари́е соверша́еши чу́до: но скажи́ Ми, ка́ко? не испыту́й глубины́ Богорожде́ния Моего́: сие́ всеи́стинное, па́че челове́ча ума́ постиже́ние.

Сла́ва Тебе́ Бо́же на́ш, сла́ва Тебе́.

От фи́ник ва́иа спле́тше мы́сленно, и чу́вственно сре́тение Влады́це сотвори́м, гряду́щему к на́м: и́бо благослове́н Гряды́й во и́мя Го́спода же и Отца́, я́ко Сы́н и́стинный.

Свети́лен гла́са.

На стихо́вне стихи́ра самогла́сна дне́, два́жды. Гла́с 1:

Изра́иль в порфи́ру и червлени́цу облача́шеся, оде́ждами свяще́нными и ца́рскими сия́я: зако́ном же и проро́ки богате́я, зако́нными слу́жбами веселя́шеся: но Тебе́ обнища́вшаго распе́н вне́ вра́т Благоде́телю, и жи́ва по распя́тии отмета́яся, в не́драх Бо́га Отца́ присносу́щнаго, жа́ждет ка́пли благода́ти: я́коже бога́тый неми́лостивый от Ла́заря убо́гаго, и́же в порфи́ре и червлени́це, в негаси́мый о́гнь вше́д: и ви́дя боле́знует, пе́рвее крупи́ц и́стины ску́дныя лю́ди язы́ческия, ны́не в не́дрех ве́ры Авраа́ма гре́ющыяся, Твоея́ кро́ве багряни́цу с червлени́цею креще́ния нося́щыя, и Твои́ми оби́лующыя и наслажда́ющыяся дарова́нии, и глаго́лющыя: Христе́ Бо́же на́ш сла́ва Тебе́.

Му́ченичен: Ва́с прехва́льнии му́ченицы, ни ско́рбь, ни теснота́, ни гла́д, ни гоне́ние ниже́ ра́ны, ни я́рость звере́й, ни ме́чь, ниже́ о́гнь претя́й, разлучи́ти от Бо́га возмого́ша: любо́вию же па́че к Нему́, я́ко в чужди́х подви́гшеся телесе́х естество́ забы́сте, сме́рть презре́вше. Те́мже и по достоя́нию боле́зней ва́ших мзду́ прия́сте, Небе́снаго Ца́рствия насле́дницы бы́сте, моли́теся о душа́х на́ших.

Сла́ва, и ны́не, Крестобогоро́дичен.

Подо́бен: Всехва́льнии му́ченицы:

Ви́дящи ви́сима Христе́, Чи́сто Ро́ждшая Тя́, пове́сившаго на вода́х зе́млю Человеколю́бче, взыва́ше: увы́ мне́, что́ стра́нное виде́ние, ка́ко за́йде добро́та Твоя́, сладча́йший Сы́не, безме́рная, велича́ю Твою́ ми́лость, я́ко стра́ждеши во́лею за все́х.

На 6-м часе́ тропа́рь проро́чества. Гла́с 5:

Ми́лости Твоя́ Го́споди сотвори́ с на́ми, и не преда́ждь на́с беззако́нием на́шым, святы́й Влады́ко Вседержи́телю, Тебе́ мо́лимся.

Проки́мен, псало́м 112. Гла́с 4: Хвали́те о́троцы Го́спода, хвали́те и́мя Госпо́дне.

Сти́х: Бу́ди и́мя Госпо́дне благослове́но от ны́не и до ве́ка.

Проро́чества Иса́иина чте́ние. [Ис.58:1–11.]

Та́ко глаго́лет Госпо́дь: возопи́й кре́постию и не пощади́; я́ко трубу́ возвы́си гла́с тво́й и возвести́ лю́дем Мои́м грехи́ и́х и до́му Иа́ковлю беззако́ния и́х. Мене́ де́нь от дне́ и́щут и разуме́ти пути́ Моя́ жела́ют, я́ко лю́дие пра́вду сотвори́вшии и суда́ Бо́га своего́ не оста́вившии: про́сят ны́не у Мене́ суда́ пра́ведна, и прибли́житися ко Го́споду жела́ют, глаго́люще: Что́ я́ко пости́хомся, и не уви́дел еси́? смири́хом ду́шы на́шя, и не уве́дел еси́? во дни́ бо поще́ний ва́ших обрета́ете во́ли ва́шя, и вся́ подру́чныя ва́шя томите́. А́ще в суде́х и сва́рех постите́ся, и бие́те пястьми́ смире́ннаго, вску́ю мне́ постите́ся я́коже дне́сь, е́же услы́шану бы́ти с во́плем гла́су ва́шему? Не сицева́го поста́ А́з избра́х, и дне́, е́же смири́ти челове́ку ду́шу свою́, ниже́ а́ще сляче́ши я́ко се́рп вы́ю твою́, и вре́тище и пе́пел посте́леши, ниже́ та́ко нарече́те по́ст прия́тен. Не такова́го [бо] поста́ А́з избра́х, глаго́лет Госпо́дь: но разреша́й вся́к соу́з непра́вды, разруша́й обдолже́ния наси́льных писа́ний, отпусти́ сокруше́нныя в свобо́ду, и вся́кое писа́ние непра́ведное раздери́. Раздробля́й а́лчущым хле́б тво́й, и ни́щыя безкро́вныя введи́ в до́м тво́й: а́ще ви́диши на́га, оде́й, и от сво́йственных пле́мене твоего́ не пре́зри. Тогда́ разве́рзется ра́но све́т тво́й, и исцеле́ния твоя́ ско́ро возсия́ют: и преды́дет пред тобо́ю пра́вда твоя́, и сла́ва Бо́жия оби́мет тя́. Тогда́ воззове́ши, и Бо́г услы́шит тя́, и еще́ глаго́лющу ти́, рече́т: се́ приидо́х. а́ще оти́меши от себе́ соу́з, и рукобие́ние, и глаго́л ропта́ния, И да́си а́лчущему хле́б от души́ твоея́, и ду́шу смире́нную насы́тиши: тогда́ возсия́ет во тьме́ све́т тво́й, и тьма́ твоя́ бу́дет я́ко полу́дне. И бу́дет Бо́г тво́й с тобо́ю при́сно.

Проки́мен псало́м 113. Гла́с 6. Благослове́ни вы́ Го́сподеви сотво́ршему не́бо и зе́млю. Сти́х: Не́бо Небесе́ Го́сподеви, зе́млю же даде́ сыново́м челове́ческим.

Последование вечерни

обы́чное стихосло́вие. На Го́споди воззва́х, поста́вим стихо́в 10. и пое́м настоя́щий самогла́сен дне́ два́жды.

Гла́с 5:

Бога́тый в страсте́х сы́й, преле́стною лицеме́рия обложе́н е́смь оде́ждою, веселя́ся в злы́х невоздержа́ния, и безме́рное немилосе́рдие показу́ю, презира́я мо́й у́м, пред две́рьми пове́рженный покая́ния, а́лчущий вся́каго бла́га, и боля́щий невнима́нием мои́м: но Ты́ Го́споди Ла́заря мя́ сотвори́, ни́щаго греха́ми, да не ка́ко тре́буяй, не получу́ пе́рста ороша́юща, боле́знующу моему́ язы́ку в негаси́мом огни́: в не́дрех же патриа́рха Авраа́ма всели́ мене́, я́ко Человеколю́бец.

Му́ченичен: Несы́тною любо́вию души́ Христа́ не отверго́стеся святи́и му́ченицы, и́же разли́чныя ра́ны страсте́й претерпе́вше, мучи́телей де́рзость низложи́сте: непрекло́нну и невреди́му ве́ру сохра́нше, на небеса́ преста́вистеся. Те́мже и дерзнове́ние получи́вше к нему́, проси́те дарова́ти на́м ве́лию ми́лость.

И́ны стихи́ры господи́на Ио́сифа. Гла́с 5.

Подо́бен: Ра́дуйся по́стником:

Об ону́ страну́ Иорда́на пло́тию ходя́ Иису́се, с тобо́ю су́щым вопи́л еси́: дру́г Ла́зарь уже́ у́мре, и погребе́нию ны́не предаде́ся. Те́мже ра́дуюся дру́зи Мои́ ва́с ра́ди, да ве́сте, я́ко вся́ ве́м, Бо́г сы́й непрело́жный, а́ще и явля́юся ви́димый челове́к. и́дем у́бо оживи́ти его́, я́ко да сме́рть ощути́т сего́ побе́ду, и соверше́нное разруше́ние, я́ве е́ сотворю́, подая́ ми́рови ве́лию ми́лость.

Ма́рфу и Мари́ю ве́рнии подража́юще, ко Го́споду по́слем Боже́ственная дея́ния я́ко моли́твы, я́ко да прише́д на́ш у́м воскреси́т, ме́ртв лежа́щий лю́те во гро́бе ле́ности нечу́вственный, стра́ха Боже́ственнаго ника́коже ощуща́ющий, и де́йств живо́тных ны́не не иму́щий, зову́ще: ви́ждь Го́споди, и я́коже дру́га Твоего́ Ла́заря дре́вле ще́дре, предста́нием воздви́гл еси́ стра́шным, си́це все́х оживи́, подая́й ве́лию ми́лость.

И́на стихи́ра господи́на Фео́дора, гла́с 6.

Подо́бен: Го́споди на гро́б:

Двоеде́нствует Ла́зарь во гро́бе, су́щыя от ве́ка ви́дит уме́ршыя, та́мо зри́т стра́хи стра́нныя, мно́жество неисче́тное а́довыми держи́мое у́зами: те́мже сро́дницы рыда́ют го́рько, предви́дяще гро́б его́. Христо́с же и́дет оживи́ти дру́га Своего́, еди́но от все́х соверши́ти согла́сие: благослове́н еси́ Спа́се, поми́луй на́с.

И в мине́и 4.

Проки́мен, псало́м 114. Гла́с 4: Благоугожду́ пред Го́сподем во стране́ живы́х.

Сти́х: Возлюби́х, я́ко услы́шит Госпо́дь гла́с моле́ния моего́.

Бытия́ чте́ние. [Быт.43:26–31, 45:1–16.]

Принесо́ша Ио́сифу бра́тия его́ да́ры, я́же имя́ху в рука́х свои́х, в до́м: и поклони́шася ему́ лице́м до земли́. И вопроси́ и́х: здра́ви ли есте́? и рече́ и́м: здра́в ли е́сть оте́ц ва́ш ста́рец, его́же реко́сте, еще́ ли жи́в е́сть? Они́ же реко́ша: здра́в е́сть ра́б тво́й оте́ц на́ш, еще́ жи́в е́сть. и рече́: благослове́н челове́к о́ный Бо́гу. и прини́кше поклони́шася ему́. Воззре́в же очи́ма свои́ма Ио́сиф, ви́де Вениами́на бра́та своего́ единома́терня, и рече́: се́й ли е́сть бра́т ва́ш юне́йший, его́же реко́сте ко мне́ привести́? и рече́: Бо́г да поми́лует тя́ ча́до. Возмути́ся же Ио́сиф, подви́жеся бо утро́ба его́ о бра́те свое́м, и иска́ше пла́кати: вше́д же в ло́жницу, пла́кася та́мо. И умы́в лице́, изше́д удержа́ся. И не можа́ше Ио́сиф удержа́тися все́м предстоя́щым ему́, но рече́: отосли́те все́х от мене: и не предстоя́ше ни еди́н Ио́сифу, егда́ познава́шеся бра́тии свое́й. И испусти́ гла́с с пла́чем: слы́шаша же вси́ Еги́птяне, и слы́шано бы́сть в дому́ фарао́нове. Рече́ же Ио́сиф бра́тии свое́й: а́з е́смь Ио́сиф: еще́ ли оте́ц мо́й жи́в е́сть? и не мого́ша бра́тия отвеща́ти ему́: смути́шася бо. Рече́ же Ио́сиф бра́тии свое́й: прибли́житеся ко мне́, и прибли́жишася. и рече́: а́з е́смь Ио́сиф бра́т ва́ш, его́же прода́сте во Еги́пет. Ны́не у́бо не скорби́те, ниже́ же́стоко ва́м да яви́тся, я́ко прода́сте мя́ се́мо: на жи́знь бо посла́ мя Бо́г пред ва́ми. Сие́ бо второ́е ле́то гла́д на земли́, и еще́ пя́ть ле́т оста́, в ни́хже не бу́дет ора́ния, ни жа́твы. Посла́ бо мя́ Бо́г пред ва́ми оста́вити ва́м оста́нок на земли́, и препита́ти ва́ш оста́нок ве́лий. Ны́не у́бо не вы́ посла́сте мя́ се́мо, но Бо́г: и сотвори́ мя я́ко отца́ фарао́ну, и господи́на всему́ до́му его́, и кня́зя все́й земли́ Еги́петстей. Потща́вшеся у́бо, взы́дите ко отцу́ моему́, и рцы́те ему́: сия́ глаго́лет сы́н тво́й Ио́сиф: сотвори́ мя Бо́г господи́на все́й земли́ Еги́петстей: сни́ди у́бо ко мне́, и не уме́дли. И всели́шися в земли́ Гесе́мли Арави́йстей, и бу́деши близ мене́ ты́, и сы́нове твои́, и сы́нове сыно́в твои́х, о́вцы твоя́, и воло́ве твои́, и ели́ка су́ть твоя́: И препита́ю тя́ та́мо, еще́ бо пя́ть ле́т бу́дет гла́д на земли́, да не поги́бнеши ты́, и сы́нове твои́, и вся́ име́ния твоя́. Се́ о́чи ва́ши ви́дят, и о́чи Вениами́на бра́та моего́, я́ко уста́ моя́ глаго́лющая к ва́м. Возвести́те у́бо отцу́ моему́ всю́ сла́ву мою́ су́щую во Еги́пте, и ели́ка ви́дите: и ускори́вше, приведи́те отца́ моего́ се́мо. И напа́д на вы́ю Вениами́на бра́та своего́, пла́кася над ни́м: и Вениами́н пла́кася на вы́и его́. И облобыза́в всю́ бра́тию свою́, пла́кася над ни́ми: и по си́х глаго́лаша к нему́ бра́тия его́. И пронесе́ся гла́с в дому́ фарао́нове, глаго́люще: приидо́ша бра́тия Ио́сифова: возра́довася же фарао́н, и раби́ его́.

Проки́мен, псало́м 115 гла́с 4: Моли́твы моя́ Го́сподеви возда́м пред все́ми людьми́ его́. Сти́х: Ве́ровах, те́мже возглаго́лах, а́з же смири́хся зело́.

При́тчей чте́ние. [Притч.21:23–31, 22:1–4.]

И́же храни́т своя́ уста́ и язы́к, соблюда́ет от печа́ли ду́шу свою́. Проде́рзый, и велича́вый, и гордели́вый, губи́тель нарица́ется: а и́же памятозло́бствует, беззако́нен. По́хоти лени́ваго убива́ют: не произволя́ют бо ру́це его́ твори́ти что́. Нечести́вый жела́ет ве́сь де́нь по́хоти злы́я, пра́ведный же ми́лует и ще́дрит неща́дно. Же́ртвы нечести́вых ме́рзость Го́сподеви: не́бо беззако́нно прино́сят я́. Свиде́тель ло́жный поги́бнет, му́ж же послушли́в сохраня́емь возглаго́лет. Нечести́в му́ж безсту́дно стои́т лице́м: пра́вый же са́м разумева́ет пути́ своя́. Не́сть прему́дрости, не́сть му́жества, не́сть сове́та у нечести́ваго. Ко́нь уготовля́ется на де́нь бра́ни: от Го́спода же по́мощь. Лу́чше и́мя до́брое, не́же бога́тство мно́го, па́че же сребра́ и зла́та благода́ть блага́я. Бога́т и ни́щ срето́ста дру́г дру́га: обои́х же Госпо́дь сотвори́. Худо́г ви́дев лука́ваго му́чима кре́пко, са́м наказу́ется; безу́мнии же мимоше́дше оттщети́шася. Ро́д прему́дрости стра́х госпо́день, и бога́тство, и сла́ва, и живо́т.

И про́чее возсле́дование преждеосвяще́нных.