Триодь Постная. Пятница 6-ой седмицы.
Службы Великого поста
Последование утрени
тро́ичны гла́са. По 1-м стихосло́вии седа́льны кре́стныя осмогла́сника. По 2-м же стихосло́вии глаго́лем настоя́щий седа́лен, господи́на Ио́сифа, гла́с 4.
Подо́бен: Ско́ро предвари́:
Дво́ица посыла́ется учени́к привести́ жребя́, я́коже пи́сано е́сть, на не́же Христо́с все́д красе́н вни́дет, хвалу́ от младе́нец прия́ти Боже́ственную. Сего́ у́бо сре́сти и́дем тща́тельно, ве́тви доброде́телей тому́ принося́ще дея́ний.
Сла́ва, то́йже.
И ны́не, Крестобогоро́дичен. Подо́бен:
Де́во Пренепоро́чная, Ма́ти Христа́ Бо́га, ору́жие про́йде Твою́ пресвяту́ю ду́шу, егда́ распина́ема ви́дела еси́ во́лею, Сына и Бо́га Твоего́: Его́же благослове́нная моля́щи не преста́й, проще́ние прегреше́ний во вре́мя поста́, на́м дарова́ти.
По 3-м стихосло́вии седа́лен господи́на Фео́дора. Гла́с 8.
Подо́бен: Воскре́с из ме́ртвых:
Дво́ица учени́к посыла́ется дне́сь, жребя́ привести́ Влады́це Все́х: гряде́т все́сти, носи́мый Серафи́мскими мно́жествы. Начина́ет боя́тися Ла́зарем, мироде́ржица всея́дица сме́рть, пе́рвее плени́вшая ро́д челове́ческий.
Сла́ва, то́йже.
И ны́не, Крестобогоро́дичен. Подо́бен:
При стра́сти Сына Чи́стая стоя́щи, рыда́ющи го́рько восклица́ше пе́сньми: ка́ко Тя́ немо́лчно а́нгельскими пе́сньми славосло́вимаго, де́ти евре́йстии, увы́ Мне́, пила́тову суди́щу Сы́не предста́виша? Песносло́влю Твое́ Сло́ве мно́гое и неизрече́нное Благоутро́бие.
Кано́н мине́и: и трипе́снец господи́на Ио́сифа. И стихосло́вится пе́снь. Гла́с 4.
Пе́снь 5.
Ирмо́с: Возсия́й ми́ Го́споди све́т повеле́ний Твои́х, я́ко к Тебе́ ду́х мо́й у́тренюет и пое́т Тя́: Ты́ бо еси́ Бо́г на́ш, и к Тебе́ прибега́ю, Царю́ ми́ра.
На Кресте́ Го́споди Твое́м усну́в, преложи́л еси́ на со́н влады́ко сме́рть. Вопи́л бо еси́: дру́г Ла́зарь у́спе, но по́йдем возбуди́ти его́ ны́не.
Проро́к пропове́дания исполня́я прорече́ния, в пророкоуби́йственный гра́д Христе́ ще́дрый прише́л еси́, убие́н бы́ти во́лею, убие́нна мя́ тле́ю, спаса́я.
Те́ло непокори́вое сло́ву повину́вше, воздержа́нием и мольба́ми, мона́си и прости́и лю́дие Христа́ усря́щите, на жребя́ все́дша, гряду́ща же пострада́ти.
Богоро́дичен: Кропле́нием ми́лости Твоея́ напо́й Пречи́стая, изсо́хшую мою́ мы́сль, пла́менем греха́ и угаше́нный се́рдца моего́ вожжи́ све́щник, две́ре све́та.
И́ный господи́на Фео́дора. Гла́с 8.
Ирмо́с: Мра́к души́ моея́ разжени́ Светода́вче Христе́ Бо́же, началоро́дную тьму́ изгна́в бе́здны, и да́руй ми́ све́т повеле́ний Твои́х Сло́ве, да у́тренюя сла́влю Тя́.
Дво́ицу ученик твои́х, внегда́ хоте́л еси́ дости́гнути в Вифа́нию Христе́, посыла́еши привести́ Тебе́ жребя́, на не́же никто́же от челове́к все́де: кроме́ бо Тебе́ Спа́се никто́же безслове́сныя язы́ки повину́.
Сни́деся Иуде́ов от Иерусали́ма в Вифа́нию мно́жество, и с сро́дницами Ла́заревыми дне́сь стра́ждут: нау́трие же разуме́вше сего́ из гро́ба ска́чуща, дви́жутся на убие́ние Христо́во.
Тро́ичен: Тро́ице Пресвята́я О́тче, и Сы́не, и Ду́ше Вседе́тельный, Блаже́нное Божество́, Безнача́льное Существо́, и Трисия́нный Све́те, Всезри́тельная Держа́во, рабы́ твоя́ сохрани́.
Богоро́дичен: На кресте́ Тя ви́дящи пригвожде́нна гвоздьми́ Христе́ Ма́ти Твоя́, и из ре́бр живо́тных теку́щую кро́вь и во́ду, уязвля́шеся Ма́терним милосе́рдием, Сына бо Тя́ позна́ своего́.
Сла́ва Тебе́ Бо́же на́ш, сла́ва Тебе́.
Се́ угото́вася Христо́с предста́ти Иерусали́му, и́же в гора́х вси́ и пусты́нях, собери́теся мона́си, того́ ра́достию усре́сти, со все́ю поднебе́сною.
Ирмо́с: Мра́к души́ моея́ разжени́ Светода́вче Христе́ Бо́же, началоро́дную тьму́ изгна́в бе́здны, и да́руй ми́ све́т повеле́ний Твои́х Сло́ве, да у́тренюя сла́влю Тя́.
Пе́снь 8.
Ирмо́с: Земля́, и вся я́же на не́й, мо́ре и вси исто́чницы, небеса́ небес, све́т и тьма, мраз и зной, сы́нове челове́честии, свяще́нницы благослови́те Господа, и превозноси́те Его во ве́ки.
Воскресе́ние и живо́т иму́ще жены́ любе́зное, что́ рыда́ете го́рько? И́дет оживи́ти бли́жняго дру́га, свои́м Воскресе́нием, воста́ние все́х провозвеща́яй, Все́х Благоде́тель.
Жили́ща мона́хов собери́теся я́ко а́гнцы слове́снии, Началопа́стыря Христа́ усря́щите, ны́не ве́тви нося́ще: предгряде́т во́лею, я́ко а́гнец закла́тися Госпо́дь, я́ко да от во́лча изме́т мучи́тельства.
Гряду́щу Ти́ к Виффаги́и, топта́ние Твои́х но́г, вра́г ощуща́ше а́д, и нога́ма Ла́заревыма прикаса́шеся, глаго́ля: а́ще восхо́щет зва́ти Тя́ Жи́знь, не облени́ся, но изы́ди: разуме́х бо мое́ разруше́ние вско́ре.
Богоро́дичен: Свяще́ннии гла́си тя́ проро́ков пропове́дуют обра́зно, две́рь, и го́ру, и се́нь, зе́млю святу́ю, све́тлый о́блак: из него́же су́щым во тьме́ и се́ни седя́щым, возсия́ со́лнце, Де́во, Еди́н Светода́тель.
И́ный.
Ирмо́с: А́нгели и Небеса́, на престо́ле сла́вы седя́щаго и я́ко Бо́га непреста́нно сла́вимаго, благослови́те, по́йте и превозноси́те Его́ во ве́ки.
Дво́ица ученик по́сланная привести́ подъяре́мника на о́блацех Восходя́щему, Его́же вся́ пою́т, и превозно́сят во вся́ ве́ки.
При две́рех Христо́с, про́чее Вифа́ние не се́туй: в ра́дость бо преложи́т пла́чь тво́й, твое́ воспита́ние воздви́г Ла́заря из гро́ба, пою́ща и превознося́ща Христа́ во ве́ки.
Благослови́м Отца́, и Сына, и Свята́го Ду́ха, Го́спода.
Еди́н Бо́г у́бо Тро́ица, ни Отцу́ изступи́вшу в сыновство́, ниже́ Сы́ну премени́вшуся во исхожде́ние: но сво́йственная и обое́, све́т Бо́га Три́, сла́влю во ве́ки.
Богоро́дичен: Еди́на нетле́нная ражда́еши, Еди́на дои́ши младе́нца небра́чная, Еди́на Зижди́теля ражда́еши и Влады́ку Твоего́, а́ще и Ма́терь и Раба́: Тя́ Де́во Ма́ти пое́м во ве́ки.
Сла́ва Тебе́ Бо́же на́ш, сла́ва Тебе́.
Сады́ доброде́телей, и чу́вственно ве́твьми я́ко сугу́ба Христа́ угото́вимся вси́ прия́ти, носи́ма на жребя́ти: Его́же превозно́сим во вся́ ве́ки.
Хва́лим, благослови́м, покланя́емся Госпо́дни:
Ирмо́с: А́нгели и Небеса́, на престо́ле сла́вы седя́щаго и я́ко Бо́га непреста́нно сла́вимаго, благослови́те, по́йте и превозноси́те Его́ во ве́ки.
Пе́снь 9.
Ирмо́с: Я́ко сотвори́ Мне́ вели́чия Си́льный и свя́то и́мя Его́, и ми́лость Его́ в ро́д и ро́д боя́щимся Его́.
Се́ предвозгласи́л еси́ Иису́се, взы́дем ко гра́ду свято́му, и рука́ма уби́йц вои́стинну преда́мся Кресту́, уби́тися пло́тию.
От сме́рти хотя́ Сло́ве, восхи́тити дру́га Твоего́, пло́тию умертви́тися на́с ра́ди пригвожда́ешися, челове́ки обезсмертвля́я ве́рныя, Еди́не Безсме́ртне.
Ва́иа целому́дрия принесе́м Христу́, на жребя́ти смири́вшуся пло́тию, и рце́м Ему́: на стра́сть прише́дый, благослове́н еси́ Спа́се.
Богоро́дичен: Стра́шное твое́ рожде́ние, Богоро́дице Ма́ти Христа́: те́мже Тя́ блажи́м ве́рно, и сла́вим че́стно, ро́дове родо́в во ве́ки, ами́нь.
И́ный. Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы в на́ше ве́рных спасе́ние, пе́сньми немо́лчными велича́ем.
Ны́не посыла́я ученики́, Христо́с рече́: отреши́вше мне́ жребя́ приведи́те все́сти, да разрешу́ язы́ки от безслове́сия, и покорю́ я́ко Сы́н Отцу́.
Гряде́т Госпо́дь, отве́рзи твоя́ две́ри Вифа́ние, приими́ ве́рою влады́ку: и́бо гряде́т воскреси́ти от гро́ба Ла́заря, я́ко еди́н всеси́лен.
Тро́ичен: Трисия́нное Го́споди Твоего́ единонача́лия, све́тлыми сия́ньми, у́м на́ш облиста́я, от ле́сти многообра́зныя обраща́ет на́с к соедини́тельному обоже́нию.
Ра́дуйся Пала́то все́х Царя́, Е́юже Ца́рство Небе́сное отве́рзеся су́щым на земли́, Богоро́дице Де́во, и со А́нгелы житие́.
Сла́ва Тебе́ Бо́же на́ш, сла́ва Тебе́.
В пусты́нях и гора́х, и в верте́пех су́щии, прииди́те собери́теся с на́ми ваиено́сцы, сре́сти Царя́ и Влады́ку: гряде́т бо спасти́ ду́шы на́шя.
Ирмо́с: Проявле́нное на горе́ законополо́жнику во огни́ и купине́, Рождество́ Присноде́вы в на́ше ве́рных спасе́ние, пе́сньми немо́лчными велича́ем.
Свети́лен гла́са.
На стихо́вне самогла́сен дне́, два́жды. Гла́с 1.
Творе́ние Льва́ царя́.
Презре́вши душе́ моя́ Боже́ственных пома́заний, объя́та была́ еси́ козньми́ врага́, свои́м хоте́нием преда́вшися тли́, и отягчи́вшися от греха́ мно́гаго, Боготка́нную оде́жду оскверни́ла еси́. и неукра́шену ца́рскому бра́ку сотвори́ла еси́. но да не со грехо́м привлече́шися, и покрове́нна оде́ждею страсте́й возле́гши, вины́ вхо́да возда́си, и черто́га изгна́на бу́деши, Спа́су возопи́й: стра́шное о́ко, приимы́й е́же е́смь, и е́же бы́л еси́ не оста́вивый, и пре́жде Креста́ хлами́дою поруга́ния, мене́ ра́ди облеки́йся, вре́тище мое́ расто́ргни, и в весе́лие облецы́, и тьмы́ вне́шния, и пла́ча ве́чнаго изба́ви мя́, и поми́луй мя́.
Му́ченичен: Страстоте́рпцы Христо́вы, прииди́те лю́дие вси́ почти́м, пе́сньми и пе́ньми духо́вными, свети́ла ми́ра, и пропове́дники ве́ры, исто́чники приснотеку́щыя, из ни́хже истека́ют ве́рным исцеле́ния. те́х моли́твами Христе́ Бо́же на́ш, ми́р да́руй ми́рови Твоему́, и душа́м на́шым ве́лию ми́лость.
Сла́ва, гла́с 8: Душеполе́зную соверши́вше четыредеся́тницу, и Святу́ю седми́цу стра́сти Твоея́, про́сим ви́дети Человеколю́бче, е́же просла́вити в не́й вели́чия Твоя́, и неизрече́нное на́с ра́ди смотре́ние Твое́, единому́дренно воспева́юще: Го́споди сла́ва Тебе́.
И ны́не, па́ки то́йже.
И про́чее после́дование я́ко обы́чно.
На 6-м часе́ тропа́рь проро́чества. Гла́с 3:
Нестерпи́мый е́сть Го́споди, гне́в на гре́шники преще́ния Твоего́, и не́смы досто́йни воззре́ти, и проси́ти от Тебе ми́лости: да не я́ростию Твое́ю, ни гне́вом Твои́м погуби́ши на́с, и́хже от земли́ руко́ю Твое́ю созда́л еси́.
Проки́мен, псало́м 121. Гла́с 4: До́му ра́ди Го́спода Бо́га на́шего взыска́х блага́я Тебе́.
Сти́х: Возвесели́хся о ре́кших мне́: в до́м Госпо́день по́йдем.
Проро́чества Иса́иина чте́ние. [Ис.66:10–24.]
Весели́ся Иерусали́ме, и торжеству́йте в не́м вси́ лю́бящии его́, и живу́щии в не́м ра́дуйтеся вку́пе с ни́м ра́достию, вси́ ели́цы пла́касте о не́м, Да ссе́те и насы́титеся от сосца́ утеше́ния его́, да сса́вше насладите́ся от вхо́да сла́вы его́. Я́ко сия́ глаго́лет Госпо́дь: се́ А́з уклоня́ю на Ня́, а́ки реку́ ми́ра, и а́ки пото́к наводня́емый, сла́ву язы́ков: де́ти и́х на ра́мена взя́ты бу́дут, и на коле́ну уте́шатся. Я́коже а́ще кого́ ма́ти утеша́ет, та́ко и А́з уте́шу вы́, и во Иерусали́ме уте́шитеся. И у́зрите, и возра́дуется се́рдце ва́ше, и ко́сти ва́шя я́ко трава́ прозя́бнут: и позна́ется рука́ Госпо́дня боя́щымся его́, и запрети́т непокаря́ющымся. Се́ бо Госпо́дь, я́ко о́гнь прии́дет, и я́ко бу́ря колесни́цы Его́, возда́ти я́ростию отмще́ние Свое́, и преще́ние во пла́мени о́гненне. Огне́м бо Госпо́дним суди́тися бу́дет вся́ земля́, и мече́м Его́ вся́ка пло́ть: мно́зи я́звени бу́дут от Го́спода. Очища́ющиися и освяща́ющиися в вертогра́дех, и в преддве́риих яду́щии мя́со свино́е, и ме́рзости, и мы́шы, вку́пе поги́бнут, рече́ Госпо́дь. И А́з дела́ и́х и помышле́ния и́х ве́м и гряду́ собра́ти вся́ наро́ды и язы́ки, и прии́дут, и у́зрят сла́ву Мою́: И оста́влю на ни́х зна́мение, и послю́ от ни́х спасе́ных во язы́ки, в Фарси́с, и в Фу́д, и в Лу́д, и в Мосо́х, и в Фове́ль, и во Елла́ду, и во о́стровы да́льныя, и́же не слы́шаша и́мене Моего́, ниже́ ви́деша сла́ву Мою́: и возвестя́т сла́ву Мою́ во язы́цех. И приведу́т бра́тию ва́шу от все́х язы́к да́р Го́сподеви, с ко́ньми и колесни́цами и с носи́лами мско́в, под се́ньми во святы́й гра́д Иерусали́м, рече́ Госпо́дь: а́ки бы принесли́ сы́нове Изра́илевы же́ртвы своя́ Мне́ со псалмы́ в до́м Госпо́день. И от те́х пойму́ Себе́ жерцы́ и леви́ты, рече́ Госпо́дь. Я́коже бо не́бо но́во, и земля́ нова́, я́же А́з творю́, пребыва́ют предо мно́ю, глаго́лет Госпо́дь: та́ко ста́нет се́мя ва́ше, и и́мя ва́ше. И бу́дет ме́сяц от ме́сяца, и суббо́та от суббо́ты, прии́дет вся́ка пло́ть поклони́тися предо Мно́ю во Иерусали́м, рече́ Госпо́дь. И изы́дут: и у́зрят тру́пы челове́ков преступи́вших Мне́, че́рвь бо и́х не сконча́ется, и о́гнь и́х не уга́снет, и бу́дут в позо́р вся́кой пло́ти.
Проки́мен, псало́м 122, гла́с 6: Поми́луй на́с Го́споди, поми́луй на́с.
Сти́х: К Тебе́ возведо́х о́чи мои́ живу́щему на Небеси́.
Последование вечерни
во свети́льничное обы́чное стихосло́вие. На Го́споди воззва́х, поста́вим стихо́в, 10. И пое́м самогла́сен дне́ два́жды, и му́ченичен: и пра́веднаго Ла́заря самогла́сных 5, творя́ще я́ се́дмь. Самогла́сен, гла́с 8, два́жды.
Душеполе́зную соверши́вше Четыредеся́тницу, и Святу́ю седми́цу стра́сти Твоея́, про́сим ви́дети Человеколю́бче, е́же просла́вити в не́й вели́чия Твоя́, и неизрече́нное на́с ра́ди смотре́ние Твое́, единому́дренно воспева́юще: Го́споди сла́ва Тебе́.
Му́ченичен: Му́ченицы Госпо́дни моли́те Бо́га на́шего, и испроси́те душа́м на́шым мно́жество щедро́т, и очище́ние мно́гих прегреше́ний, мо́лимся.
Та́же пое́м свята́го Ла́заря, самогла́сны 5. Творе́ние благочести́ваго царя́, господи́на льва́ прему́драго. Гла́с 6.
Го́споди, Ла́зарев хотя́ гро́б ви́дети, во́лею хотя́й во гро́б всели́тися вопроша́л еси́: где́ положи́сте его́? уве́дев же, е́же не неве́дал еси́, и возглаша́л, его́же люби́л еси́: Ла́заре гряди́ во́н. и послу́ша бездыха́нный, дыха́ние даю́щаго ему́, Тебе́ Спа́са душа́м на́шым. [Два́жды.]
Го́споди, на гро́б четверодне́внаго прише́л еси́ Ла́заря, и над гро́бом сле́зы пролия́в, мертвеца́ четверодне́вна возста́вил еси́, кла́се живота́. Те́мже сме́рть свя́зана бы́сть гла́сом: пелены́ разреши́шася рука́ми. тогда́ ра́дости испо́лнися мно́жество учени́к, и еди́но от все́х служа́шеся согла́сие: благослове́н еси́ Спа́се, поми́луй на́с. [Два́жды.]
Го́споди, гла́с тво́й разруши́ а́дово ца́рствие, и сло́во вла́сти Твоея́ возста́ви из гро́ба четверодне́внаго, и бы́сть Ла́зарь пакибытия́ проображе́ние спаси́тельное. вся́ возмо́жна Тебе́ Влады́ко все́х Царю́, да́руй рабо́м твои́м очище́ние, и ве́лию ми́лость. [Еди́ножды.]
Го́споди, уве́рити хотя́ ученико́м Твои́м из ме́ртвых Твое́ Воскресе́ние, на гро́б Ла́зарев прише́л еси́: и возгласи́вшу ти́ сего́, а́д плени́ся, и отпусти́ четверодне́вна, вопию́ща Тебе́: благослове́нный Го́споди сла́ва Тебе́. [Еди́ножды.]
Го́споди, пое́мь ученики́ Твоя́, в Вифа́нию прише́л еси́, да возста́виши Ла́заря: и прослези́вся над ни́м зако́ном естества́ челове́ча, я́ко Бо́г того́ четверодне́вна воздви́гл еси́, и вопия́ше Ти́ Спа́се: благослове́нный Го́споди сла́ва Тебе́.
Сла́ва, гла́с 8: Предста́в гро́бу Ла́зареву Спа́се на́ш, и возгласи́в ме́ртваго, я́ко от сна́ воскреси́л еси́: оттрясе́ тле́ние нетле́ния ма́нием, и изы́де сло́вом, свя́занный укро́йми. вся́ мо́жеши, вся́ Тебе́ рабо́тают человеколю́бче, вся́ повину́ются Ти́, Спа́се на́ш сла́ва Тебе́.
И ны́не, гла́с то́йже: Душеполе́зную соверши́вше четыредеся́тницу, возопии́м: ра́дуйся гра́де Вифа́ние, оте́чество Ла́зарево. ра́дуйтеся Ма́рфа и Мари́а, того́ сестры́, зау́тра бо Христо́с прихо́дит, оживи́ти глаго́лом уме́ршаго бра́та: Его́же гла́с услы́шав, го́рький и несы́тый а́д, стра́хом вострепета́в, и вельми́ возстена́в, отпу́стит Ла́заря укро́йми обя́зана: Его́же чудеси́ собо́р Евре́йский удиви́вся, с ва́ием и ве́твьми того́ сря́щут, и явя́тся похваля́ющии де́ти, Ему́же зави́дят отцы́. благослове́н Гряды́й во и́мя Госпо́дне Ца́рь Изра́илев.
Вхо́д. Све́те ти́хий:
Проки́мен, псало́м 123, гла́с 6: По́мощь на́ша во и́мя Го́спода, сотво́ршаго не́бо и зе́млю.
Сти́х: Я́ко а́ще не Госпо́дь бы бы́л в на́с, да рече́т у́бо Изра́иль.
Бытия́ чте́ние. [Быт.49:33, 50:1–26.]
Преста́ Иа́ков завеща́я сыно́м свои́м: и возложи́в Иа́ков но́зе свои́ на о́др, у́мре, и приложи́ся к лю́дем свои́м. И припа́д Ио́сиф на лице́ отца́ своего́, пла́кася [го́рько] о не́м, и облобыза́ его́. И повеле́ Ио́сиф рабо́м свои́м погреба́телем погребсти́ отца́ своего́: и погребо́ша погреба́тели Изра́иля. И испо́лнишася ему́ четы́редесять дне́й, та́ко бо исчисля́ются дни́е погребе́ния: и пла́кася его́ Еги́пет се́дмьдесят дне́й. Егда́ же преидо́ша дни́е пла́ча, глаго́ла Ио́сиф к вельмо́жам фарао́новым, глаго́ля: а́ще обрето́х благода́ть пред ва́ми, рцы́те о мне́ во у́ши фарао́ну, глаго́люще: Оте́ц мо́й закля́ мя пре́жде сконча́ния [своего́], глаго́ля: во гро́бе, его́же ископа́х себе́ в земли́ Ханаа́ни, та́мо мя́ погреби́ ны́не у́бо возше́д погребу́ отца́ моего́, и возвращу́ся. и реко́ша фарао́ну по словеси́ Ио́сифову. И рече́ фарао́н к Ио́сифу: взы́ди, погреби́ отца́ твоего́, я́коже закля́ тя. И взы́де Ио́сиф погребсти́ отца́ своего́: и совзыдо́ша с ни́м вси́ раби́ фарао́ни, и старе́йшины до́му его́, и вси́ старе́йшины земли́ Еги́петския. И ве́сь до́м Ио́сифов, и бра́тия его́, и ве́сь до́м отца́ его́, и сро́дницы его́: о́вцы же и волы́ оста́виша в земли́ Гесе́м. И совзыдо́ша с ни́м и колесни́цы и ко́нницы, и бы́сть по́лк вели́к зело́. И приидо́ша на Гумно́ Ата́дово, е́же е́сть об о́н по́л Иорда́на, и рыда́ша его́ рыда́нием ве́лиим и кре́пким зело́: и сотвори́ пла́чь отцу́ своему́ се́дмь дне́й. И ви́деша жи́тели земли́ Ханаа́нския пла́чь на Гумне́ Ата́дове, и ре́ша: пла́чь вели́к се́й е́сть Еги́птяном: сего́ ра́ди нарече́ся и́мя ме́сту тому́, пла́чь Еги́петск, е́же е́сть об о́н по́л Иорда́на. И сотвори́ша ему́ та́ко сы́нове его́, я́коже запове́да и́м. И взя́ша его́ сы́нове его́, в зе́млю Ханаа́ню: и погребо́ша его́ в пеще́ре сугу́бей, ю́же стяжа́ Авраа́м, пеще́ру в стяжа́ние гро́ба от Ефро́на Хеттеа́нина, пря́мо Мамври́и. И возврати́ся Ио́сиф во Еги́пет, са́м и бра́тия его́, и вси́ совозше́дшии погребсти́ отца́ его́. Ви́девше же бра́тия Ио́сифовы, я́ко у́мре оте́ц и́х, ре́ша: да не когда воспомяне́т зло́бу на́шу Ио́сиф, и воздая́нием возда́ст на́м за вся́ зла́я, я́же показа́хом ему́. И прише́дше ко Ио́сифу, реко́ша: оте́ц тво́й закля́ пре́жде кончи́ны своея́, глаго́ля: Та́ко рцы́те Ио́сифу: оста́ви и́м непра́вду и гре́х и́х, я́ко лука́вая тебе́ показа́ша, и ны́не приими́ непра́вду рабо́в Бо́га отца́ твоего́. и пла́кася Ио́сиф, глаго́лющым и́м к нему́. И прише́дше к нему́ реко́ша: се́ мы́ тебе́ раби́. И рече́ к ни́м Ио́сиф: не бо́йтеся, Бо́жий бо е́смь а́з. Вы́ совеща́сте на мя́ зла́я, Бо́г же совеща́ о мне́ во блага́я, дабы́ бы́ло я́коже дне́сь, и препита́лися бы лю́дие мно́зи. И рече́ и́м: не бо́йтеся, а́з препита́ю ва́с, и до́мы ва́ши. и уте́ши и́х, и глаго́ла и́м по се́рдцу и́х. И всели́ся Ио́сиф во Еги́пте са́м и бра́тия его́, и ве́сь до́м отца́ его́: и поживе́ Ио́сиф ле́т сто́ де́сять. И ви́де Ио́сиф Ефре́мли де́ти до тре́тияго ро́да: и сы́нове Махи́ра сы́на Манасси́ина роди́шася при бе́дрех Ио́сифовых. И рече́ Ио́сиф бра́тии свое́й, глаго́ля: а́з умира́ю: посеще́нием же посети́т ва́с Бо́г, и изведе́т ва́с от земли́ сея́ в зе́млю, о не́йже кля́тся Бо́г отце́м на́шым, Авраа́му, Исаа́ку, и Иа́кову. И закля́ Ио́сиф сы́ны Изра́илевы, глаго́ля: в посеще́нии, и́мже посети́т ва́с Бо́г, совознеси́те и ко́сти моя́ отсю́ду с ва́ми. И сконча́ся Ио́сиф сы́й ле́т ста́ десяти́: и погребо́ша его́, и положи́ша в ра́це во Еги́пте.
Проки́мен, псало́м 124, гла́с 4: Наде́ющиися на Го́спода, я́ко гора́ Сио́н не подви́жится во ве́к.
Сти́х: Я́ко не оста́вит Госпо́дь жезла́ гре́шных на жре́бий пра́ведных.
При́тчей чте́ние. [Притч.31:8–32.]
Сы́не, отверза́й уста́ твоя́ сло́ву Бо́жию, и суди́ вся́ здра́во. Отверза́й уста́ твоя́, и суди́ пра́ведно, разсужда́й же убо́га и не́мощна. Жену́ до́блю кто́ обря́щет, дража́йши е́сть ка́мения многоце́ннаго такова́я. Дерза́ет на ню́ се́рдце му́жа ея́: такова́я до́брых коры́стей не лиши́тся. Де́лает бо му́жу своему́ блага́я во все́ житие́. Обре́тши во́лну и ле́н, сотвори́ благопотре́бное рука́ма свои́ма. Бы́сть я́ко кора́бль ку́плю де́ющий, издале́ча собира́ет себе́ бога́тство. И востае́т из но́щи, и даде́ бра́шна до́му, и дела́ рабы́ням. узре́вши село́ купи́: от плодо́в же ру́к свои́х насади́ стяжа́ние. Препоя́савши кре́пко чре́сла своя́, утверди́т мы́шцы своя́ на де́ло. И вкуси́, я́ко добро́ е́сть де́лати, и не угаса́ет свети́льник ея́ всю́ но́щь. Ла́кти своя́ простира́ет на поле́зная, ру́це же свои́ утвержда́ет на вретено́. И ру́це свои́ отверза́ет убо́гому, дла́нь же простре́ ни́щу. Не пече́тся о су́щих в дому́ му́ж ея́, егда́ где́ заме́длит: вси́ бо у нея́ оде́яни су́ть. Сугу́ба одея́ния сотвори́ му́жу своему́, от виссо́на же и порфи́ры себе́ одея́ния. Сла́вен быва́ет во врате́х му́ж ея́, внегда́ а́ще ся́дет в со́нмищи со старе́йшины жи́тельми земли́. Плащани́цы сотвори́, и продаде́ Финики́аном, опоя́сания же Ханане́ом. уста́ своя́ отве́рзе внима́тельно и зако́нно, и чи́н запове́да язы́ку своему́. Кре́постию и ле́потою облече́ся, и возвесели́ся во дни́ после́дния. Те́сны стези́ до́му ея́: бра́шна же ле́ностнаго не яде́. уста́ своя́ отве́рзе му́дро и зако́нно: Ми́лостыня же ея́ возста́ви ча́да ея́, и обогати́шася: и му́ж ея́ похвали́ ю́. Мно́ги дще́ри стяжа́ша бога́тство, мно́ги сотвори́ша си́лу: ты́ же предуспе́ла и превознесла́ся еси́ над все́ми. Ло́жнаго угожде́ния, и су́етныя добро́ты же́нския не́сть в тебе́: жена́ бо разу́мная благослове́на е́сть. стра́х же Госпо́день сия́ да хвали́т. Дади́те е́й от плодо́в усте́н ея́, и да хвали́мь бу́дет во врате́х му́ж ея́.
И про́чее после́дование преждеосвяще́нных я́ко обы́чно.
Ве́домо бу́ди, я́ко от дне́сь ниже́ му́ченичен, ниже́ Богоро́дичен, ниже́ осмогла́сник пое́тся, да́же до суббо́ты свята́го Фомы́.
Великое повечерие
повече́рие глаго́лем вели́кое.
На повече́рии пое́м настоя́щий кано́н, творе́ние свята́го отца́ господи́на Андре́а Кри́тскаго, Иерусалими́ты. Гла́с 1.
Пе́снь 1.
Ирмо́с: Пе́снь побе́дную пои́м вси́ Бо́гу, сотво́ршему ди́вная чудеса́, мы́шцею высо́кою, и спа́сшему Изра́иля, я́ко просла́вися.
Припе́в: Сла́ва Тебе́ Бо́же на́ш, сла́ва Тебе́.
Ме́ртва четверодне́вна воскреси́в Спа́се мо́й Ла́заря, тли́ измени́л еси́ мы́шцею высо́кою, и показа́л еси́ я́ко си́льный вла́сть твою́.
Возгласи́в Ла́заря из гро́ба, а́бие воскреси́л еси́: но а́д до́ле го́рце рыда́ше, и стеня́ трепета́ше, Спа́се, вла́сти Твоея́.
Прослези́лся еси́ Го́споди, над Ла́зарем, показу́я воплоще́ние смотре́ния Твоего́, и я́ко естество́м Бо́г сы́й, естество́м по на́м бы́л еси́ челове́к.
Ма́рфины сле́зы и Мари́ины утоли́л еси́ Го́споди, из ме́ртвых Ла́заря воскреси́в Спа́се, и показа́в одухновле́нна ме́ртваго вла́стию Твое́ю.
Зако́ном естества́ челове́ча вопроси́л еси́ Влады́ко: где́ положе́н бы́сть Ла́зарь? показу́я все́м Спа́се, и́стинное е́же к на́м смотре́ние Твое́.
Закле́пы сокруши́л еси́ тогда́ а́довы, возгласи́в Ла́заря, и держа́ву стря́сл еси́ борца́, и покори́л еси́ пре́жде Креста́, трепета́ти Тебе́ Еди́не Спа́се.
Свя́зня Ла́заря, от а́да держи́маго Влады́ко, я́ко Бо́г предвари́л еси́, и разреши́л еси́ от у́з: к твоему́ бо вся́ си́льне, и́дут повеле́нию.
Сла́ва: Отца́ просла́вим, Сына , и Ду́ха, Тро́ицу неразде́льную, во еди́нице естества́, и со А́нгелы ю́, я́ко Еди́наго Несозда́ннаго Бо́га славосло́вим.
И ны́не, Богоро́дичен: Непрело́жно родила́ еси́ Де́во Ма́ти Созда́теля Естества́, от Свята́го Ду́ха по благоволе́нию О́тчу бы́вша е́же есмы́, кроме́ измене́ния и смеше́ния.
Пе́снь 2.
Ирмо́с: Вонми́ Не́бо и возглаго́лю, и воспою́ Христа́, еди́наго Человеколю́бца.
Сла́ва Тебе́ возгласи́вшему то́кмо, и из гро́ба ме́ртва четверодне́вна дру́га воздви́гшему Ла́заря.
Услы́ша гла́са твоего́ безду́шный, и одушевле́н от ме́ртвых воста́ а́бие, сла́вя Тя́ Го́споди.
Повеле́ние живоно́снаго гла́са Твоего́ прии́м, смердя́щий воста́ от гро́ба, Спа́се Мо́й, Ла́зарь.
Прослези́лся еси́ над дру́гом Спа́се Мо́й, уверя́я на́ше, я́коже носи́л еси́, естество́, и сего́ воскреси́л еси́.
Вострепета́ я́коже ви́де а́д, па́ки теку́ща а́бие свя́зана укро́йми, гла́сом к зде́шнему животу́.
Ужасо́шася евре́йстии наро́ди егда́ возгласи́в Спа́се, воскреси́л еси́ сло́вом смердя́щаго ла́заря.
Сотрясо́шася сокро́вища а́дова, я́ко одушевле́н бы́сть а́бие ни́зу Ла́зарь, тогда́ гла́сом оживи́вшаго.
Пе́снь 3.
Ирмо́с: Ка́мень, его́же небрего́ша зи́ждущии, се́й бы́сть во главу́ у́гла. То́й е́сть ка́мень, на не́мже утверди́ Це́рковь Христо́с, ю́же от язы́к искупи́.
Чу́до стра́нное и пресла́вное, ка́ко Созда́тель Все́х, е́же не неве́дяше, я́ко не ве́дый вопроша́ше: где́ лежи́т, его́же рыда́ете? где́ погребе́ся Ла́зарь, его́же пома́ле из ме́ртвых жи́ва ва́м воскрешу́ А́з?
Ка́мень, его́же тебе́ привали́ша погре́бшии тя́, сего́ взя́ти Иису́с повеле́в, а́бие воскреси́ тя, возгласи́в тебе́: Ла́заре воста́ни, гряди́ ко Мне́, да твоего́ а́д устраши́тся гла́са.
Ма́рфа и Мари́а Го́споди, рыда́ньми вопия́сте: се́ его́же люби́л еси́ четверодне́вен смерди́т: а́ще бы еси́ бы́л зде́, тогда́ не бы́ у́мерл Ла́зарь. но я́ко неразлу́чен везде́, сего́ а́бие возгласи́в воздви́гл еси́.
Пролия́в над дру́гом сле́зы смотре́ния ра́ди, показа́л еси́ пло́ть от на́с взе́млемую, существо́м не мне́нием Спа́се, соедини́вшуюся Тебе́, и я́ко Человеколю́бец Бо́г, сего́ а́бие возгласи́в воздви́гл еси́.
Увы́ мне́ вои́стинну, ны́не погибо́х, вопия́ше а́д, си́це возглаша́ше сме́рти глаго́ля: се́ Назоряни́н до́льняя подвиза́, и утро́бу мою́ посека́я, бездыха́нна ме́ртва возгласи́в воздви́же.
Где́ Евре́йское безу́мие? где́ неве́рие? доко́ле чужди́и, доко́ле лестцы́, зрите́ уме́ршаго гла́сом исходя́ща, и не ве́руете Христу́, вои́стинну сы́нове тьмы́ вси́ вы́.
Сла́ва: Еди́наго от Тро́ицы ве́м Тя́, а́ще и воплоти́лся еси́, еди́наго и сла́влю, Сына воплоще́нна, от Богоро́дицы безсе́менно прозя́бшаго, и со Отце́м и Ду́хом еди́наго Сына славосло́вима.
И ны́не, Богоро́дичен: Стра́нное и стра́шное виде́ние смотре́ния, е́же предзре́ша нело́жнии проро́цы Де́ву Богоро́дицу: безсе́менно у́бо заче́ншую, и нетле́нно ро́ждшую Бо́га, пребыва́ющую же по Рождестве́ чи́стую.
Пе́снь 4.
Ирмо́с: Взя́тся со́лнце, и луна́ ста́ в чи́не свое́м, возне́слся еси́ долготерпели́ве на Дре́во, и водрузи́л еси́ на не́м Це́рковь Твою́.
Прослези́лся еси́ Го́споди над Ла́зарем, показа́в я́ко челове́к еси́, и воздви́гл еси́ Влады́ко уме́ршаго, и показа́л еси́ лю́дем, я́ко Сы́н еси́ Бо́жий.
Бездыха́нный услы́ша повеле́ние Твое́, гряди́ во́н Ла́заре, теки́й воста́ше с пелена́ми, и скака́ше, Бла́же, показу́я держа́ву Твою́.
Ма́рфины сле́зы и Мари́ины утоли́л еси́ Христе́ Бо́же, возгласи́в Ла́заря самовла́стно, воздви́гл еси́ гла́сом, и поклони́ся Тебе́.
Прослези́вся я́ко челове́к над Ла́зарем, воздви́гл еси́ его́ я́ко Бо́г. вопроси́л еси́: где́ погребе́ся четверодне́вный? уверя́я Бла́же, вочелове́чение Твое́.
Стра́сти зна́мения и Креста́ Твоего́, уверя́ти хотя́ Бла́же, а́дово несы́тное чре́во растерза́в, возста́вил еси́ я́ко Бо́г четверодне́внаго.
Кто́ ви́де, кто́ слы́ша, я́ко воста́ челове́к ме́ртвый смердя́щий? Илиа́ у́бо воздви́же и Елиссе́й, но не от гро́ба, но ниже́ четверодне́вна.
Пое́м Твое́ Го́споди, могу́тство, пое́м и стра́сти Христе́: о́нем бо я́ко благоутро́бен чудоде́йствовал еси́, си́ми же смотри́тельно я́т еси́ я́ко челове́к.
Бо́г еси́ и челове́к, и́стинствуяй вещьми́ и имены́, предста́л еси́ гро́бу пло́тию Сло́ве, и воздви́гл еси́ я́ко Бо́г четверодне́внаго.
Ужасо́шася Влады́ко, Евре́йстии наро́ди, я́ко ви́деша воста́вша ме́ртва из гро́ба Ла́заря со гла́сом Твои́м, и пребы́ша непокорли́ви чудесе́м твои́м.
Сла́ва: Безнача́льно возсия́л еси́ от Отца́ Твоего́, я́ко еди́н сы́й от Тро́ицы Спа́се, в ле́то в Ду́се из де́вственных Ты́ проше́л еси́ крове́й, пло́ть взе́м пресу́щественный.
И ны́не, Богоро́дичен: Зача́тие безсе́менное Богоро́дицы, Рождество́ кроме́ стра́сти тле́ния: Бо́г бо обоя́ чудоде́йствовавый истощи́ Себе́, да на́м соедини́тся.
Пе́снь 5.
Ирмо́с: Тво́й ми́р да́ждь на́м Сы́не Бо́жий, ино́го бо ра́зве Тебе́ Бо́га не зна́ем, и и́мя Твое́ имену́ем, я́ко Бо́г живы́х и ме́ртвых еси́.
Жи́знь сы́й Го́споди, и све́т и́стинный, Ла́заря возгласи́в воскреси́л еси́: я́ко си́лен бо все́м показа́л еси́, я́ко Бо́г живы́х и ме́ртвых еси́.
Нестерпи́мое твое́ повеле́ние Иису́се, не терпя́ а́д мно́гих прие́мый убоя́ся, и четверодне́вна су́ща Ла́заря, со гла́сом жи́ва, а не ме́ртва дая́ше.
Пе́рсть совоку́пль ду́ху, дре́вле бре́ние ду́хом жи́зни, одуши́вый Сло́ве сло́вом Твои́м: и ны́не же сло́вом воскреси́л еси́ от тли́ дру́га из преиспо́дних.
Ма́нию Твоему́ Го́споди, сопроти́вися никто́же: егда́ бо ме́ртваго гласи́л еси́ Ла́заря, а́бие бездыха́нный востава́ше, и у́зы нося́, нога́ма хожда́ше.
О иуде́йское безу́мие! о омраче́ние враго́в! кто́ ви́де мертвеца́ из гро́ба востаю́ща? Илиа́ дре́вле воскреси́, но не от гро́ба, но ниже́ четверодне́вна.
Непобеди́ме, долготерпели́ве, вся́ на́с ра́ди творя́й я́ко Бо́г, и терпя́й я́ко челове́к, прича́стники вся́ ны́ сотвори́ Ца́рствия Твоего́, моли́твами Ла́заревыми.
Сла́ва: Пребезнача́льная, Собезнача́льная, Единочестна́я Тро́ице, О́тче Вседержи́телю, и Сы́не, и Ду́ше Святы́й, Еди́нице Свята́я Триипоста́сная, су́щыя от Ада́ма спаса́й, ве́рно Тя́ воспева́ющыя.
И ны́не, Богоро́дичен: Пречи́стое чре́во Твое́ освяти́ Чи́стая, пло́ть из него́ прие́мый Пребоже́ственный, в Тро́ице покланя́емый, из Отца́ Сло́во, и с Ду́хом Бо́г.
Пе́снь 6.
Ирмо́с: Отве́ргл мя́ еси́ во глубины́ се́рдца морска́го, и спа́сл еси́ мя́ Спа́се от рабо́ты сме́ртныя, и разреши́л еси́ у́зы беззако́ний мои́х.
Вопроси́л еси́: где́ есть? вся́ ве́дый, прослези́лся же еси́ Спа́се, я́ко челове́к естество́м, воздви́гл мя́ еси́ ме́ртва повеле́нием твои́м.
Возгласи́л мя́ еси́ Спа́се, из а́да преиспо́дняго, вопие́т Ла́зарь к Тебе́ разруши́телю а́да, и воздви́гл мя́ еси́ ме́ртва повеле́нием твои́м.
Оде́ял мя́ еси́ Спа́се, в бре́нное те́ло, и вдохну́л ми́ еси́ жи́знь, и ви́дех све́т Тво́й, и воздви́гл мя́ еси́ ме́ртва повеле́нием Твои́м.
Одуши́л еси́ Ты́, бездыха́нный о́браз пло́ти моея́ Спа́се, стягну́л мя́ еси́ костьми́ и жи́лами, и воздви́гл мя́ еси́ ме́ртва повеле́нием Твои́м.
Всесне́дное растерза́в чре́во а́дово, исто́ргнул мя́ еси́ Спа́се, Твое́ю вла́стию, и воздви́гл мя́ еси́ ме́ртва повеле́нием Твои́м.
Носи́л еси́ Спа́се, смеше́ние мое́ всеце́ло: сохрани́л же еси́ чи́сту пречи́стую утро́бу, из нея́же проше́л еси́ воплоти́вся, Еди́н Сы́й Тро́ицы.
Сла́ва, Тро́ичен: Тро́ице Свята́я, прославля́ю твое́ благоутро́бие, и со А́нгелы пою́ трисвяту́ю пе́снь: поми́луй ду́шы на́с воспева́ющих Тя́.
И ны́не, Богоро́дичен: В пречи́стую Твою́ утро́бу вни́де Сло́во, соблюде́ же па́ки по Рождестве́ сию́ чи́стую, Богороди́тельнице, чу́до вои́стинну пресла́вное.
Пе́снь 7.
Ирмо́с: Су́щым в пещи́ отроко́м Твои́м Спа́се, не прикосну́ся, ниже́ стужи́ о́гнь. тогда́ трие́, я́ко еди́неми усты́ поя́ху, и благословля́ху глаго́люще: благослове́н Бо́г Оте́ц На́ших.
Над мертвеце́м прослези́лся еси́ Спа́се Человеколю́бче: да пока́жеши все́м лю́дем, я́ко Бо́г сы́й, на́с ра́ди челове́к яви́лся еси́, и во́лею прослези́лся еси́, о́бразы на́м предлага́я серде́чныя любве́.
Четверодне́вный Ла́зарь спа́се, я́ко услы́ша ни́зу гла́с Тво́й, воста́в воспе́ Тя, и ра́дуяся си́це вопия́ше: Ты́ Бо́г и созда́тель мо́й, Тебе́ покланя́юся, и пою́ Воскреси́вшаго мя́.
А́ще и у́зами обложе́н е́смь, Ла́зарь ни́зу вопия́ше свободи́телю: но ника́коже во чре́ве пребу́ду а́дове, а́ще то́кмо воззове́ши мя́, Ла́заре, гряди́ во́н: Ты́ бо све́т мо́й и живо́т.
Молю́ тя Ла́заре, а́д рече́, воста́ни, изы́ди от закле́пов мои́х ско́ро, отиди́ у́бо: добро́ бо мне́ еди́наго рыда́ти го́рце оте́млема, не́жели все́х, и́хже пре́жде а́лчя поглоти́х.
О что́ косни́ши Ла́заре, глаго́лет, гряди́ во́н, зове́т стоя́ Дру́г тво́й: изы́ди у́бо, да и а́з осла́бу прииму́, отне́леже бо тя́ снедо́х, на блева́ние пи́ща устро́ися ми́.
Что́ не воста́неши Ла́заре ско́ро, воззва́ из до́лу а́д рыда́я? что́ не а́бие воскре́с тече́ши отсю́ду? да не и други́х ми́ плени́т Христо́с, воскреси́в тя́.
Удивля́емь бы́л еси́ Влады́ко Христе́, чу́дная тогда́ соде́лав мно́гая, све́т бо слепы́м, глухи́м же у́шы отве́рзл еси́ сло́вом, и дру́га Ла́заря из ме́ртвых, я́ко Бо́г возгласи́в воздви́гл еси́.
Сла́ва, Тро́ичен: Тро́ическую воспои́м пе́снь, сла́вяще Безнача́льнаго Отца́, и Сына, и Ду́ха Пра́ваго, Еди́нственное Еди́но Существо́, Е́же тро́ически воспои́м: Свя́т, Свя́т, Свя́т еси́ Тро́ице.
И ны́не, Богоро́дичен: Я́ко Еди́наго от Тро́ицы Тя́ Христе́ сла́вим, я́ко от Де́вы вопло́щься, кроме́ преложе́ния челове́чески вся́ претерпе́л еси́, не отсту́пль естества́ Оте́ческа Иису́се, а́ще и соедини́лся еси́ на́м.
Пе́снь 8.
Ирмо́с: Небеса́ Небе́с, и вода́ я́же превы́ше небе́с, благослови́те, по́йте Го́спода, и превозноси́те Его́ во ве́ки.
Творе́ц и Содержи́тель все́х, за милосе́рдие во Вифа́нию прии́де, воздви́гнути Ла́заря.
Четверодне́вный смердя́, и пово́йми обя́зан, измени́ся дыха́нием бездыха́нный, возгласи́вшу Ти́ Го́споди.
Иуде́йстии лю́дие, я́ко ви́деша уме́ршаго, Твои́м гла́сом воста́вша Христе́, распыха́хуся.
Омраче́ннии о све́те Иуде́е, что́ не ве́руете Ла́зареву воста́нию, Христо́ву начина́нию?
Да ра́дуется Сио́н, и да пое́т Жизнода́вца, воскреси́вшаго сло́вом от гро́ба Ла́заря.
Во́и небе́снии, и ро́д земны́х воспе́ша Тя́, егда́ Спа́се мо́й Ла́заря воздви́гл еси́.
Сла́ва: Со Отце́м и Сы́ном Ду́ха славосло́влю и поя́ немо́лчно взыва́ю: Трисвяты́й, сла́ва Тебе́.
И ны́не, Богоро́дичен: Тебе́ благословлю́ и покланя́юся Ро́ждшемуся из Де́вы, не разлу́чшуся Престо́ла Святы́я сла́вы Твоея́.
Пе́снь 9.
Ирмо́с: Сотвори́ держа́ву мы́шцею свое́ю: низложи́ бо си́льныя со престо́л, и вознесе́ смире́нныя Бо́г Изра́илев. в ни́хже посети́ на́с восто́к с высоты́, и напра́вил ны́ е́сть на пу́ть ми́ра.
Да пое́т чу́до Вифа́ниа с на́ми: в не́й бо прослези́ся Созда́тель, зако́ном естества́ пло́ти, Ла́заря воскреша́я, и Ма́рфины сле́зы про́чее, и пла́чь Мари́ин в ра́дость прелага́я, мертвеца́ воздви́гл е́сть.
Уверя́я Сло́ве, Воскресе́ние Твое́, призва́л еси́ Ла́заря из гро́ба, и воздви́гл еси́ я́ко Бо́г, да пока́жеши лю́дем Бо́га же и челове́ка вку́пе вои́стинне су́ща, и воздви́гша хра́м телесе́ Твоего́.
Стря́сл еси́ врата́ и вереи́ желе́зныя, устраши́л еси́ а́д гла́сом Твои́м, ужасе́ся же с ни́м и сме́рть а́бие, я́ко ви́деша Ла́заря спа́се, су́ща в ни́х у́зника, одушевле́нна гла́сом и воскре́сша.
Ужасо́шася вси́, я́ко ви́деша тя́ Спа́се слезя́ща, Ла́заря уме́рша, и глаго́лаху наро́ди: ви́ждь, ка́ко его́ любля́ше. а́бие у́бо возгласи́л еси́ его́, и воста́в бездыха́нный, отложи́ тле́ние повеле́нием Твои́м.
Потрясо́шася врата́, сокруши́шася вереи́, разреши́шася у́зы ме́ртваго гла́сом си́лы Христо́вы, и а́д го́рько воздыха́ше рыда́я, и свои́м вопия́ше: увы́ мне́, ки́й и отку́ду гла́с оживля́яй ме́ртвыя?
Воста́ни отсю́ду послу́шав гла́са, Дру́г бо тво́й во́н приглаша́ет тя́: се́й е́сть пре́жде воскреси́вый ме́ртвыя. Илиа́ у́бо воздви́же ме́ртва, и Елиссе́й ку́пно: но се́й бе́ о́неми и глаго́ляй и де́йствуяй.
Пое́м твою́ Сло́ве непобеди́мую кре́пость: костьми́ бо и жи́лами уме́рша воздви́гл еси́ сло́вом Твои́м, я́ко все́х Созда́тель, и сего́ воскреси́л еси́ Спа́се, от преиспо́дних, я́коже вдо́выя сы́на су́ща на одре́.
Сла́ва: Тро́ице Всесвята́я, О́тче Безнача́льный Бо́же, Собезнача́льный Сы́не и Боже́ственный Сло́ве, Уте́шителю Благи́й, Ду́ше Святы́й Бо́жий: Еди́ный и Трисо́лнечный Све́те, Соесте́ственное Существо́, Еди́не Бо́же и Го́споди, уще́дри ми́р.
И ны́не, Богоро́дичен: Вся́ сотвори́вый в прему́дрости Иису́се, и во всего́ мя оболки́йся из Де́вы, и ве́сь пребыва́яй при́сно в не́дрех Отца́: Святы́й Ду́х Тво́й Христе́, на ста́до Твое́ низпосла́в я́ко Бо́г, осени́ на́с.
Вме́сто Досто́йно, ирмо́с. Сотвори́ держа́ву мы́шцею свое́ю: низложи́ бо си́льныя со престо́л, и вознесе́ смире́нныя Бо́г Изра́илев. в ни́хже посети́ на́с восто́к с высоты́, и напра́вил ны́ е́сть на пу́ть ми́ра.
