КАНОН ПРЕПОДОБНОМУ СЕРГИЮ, ИГУМЕНУ РАДОНЕЖСКОМУ И ВСЕЯ РОССИИ ЧУДОТВОРЦУ
Тропарь , глас 4:
И́же доброде́телей подви́жник, / я́ко и́стинный во́ин Христа́ Бо́га, / на стра́сти вельми́ подвиза́лся еси́ в жи́зни вре́менней, / в пе́ниих, бде́ниих же и поще́ниих о́браз быв твои́м ученико́м; / те́мже и всели́ся в тя Пресвяты́й Дух, / Его́же де́йствием све́тло укра́шен еси́. / Но я́ко име́я дерзнове́ние ко Святе́й Тро́ице, / помина́й ста́до, е́же собра́л еси́, му́дре, / и не забу́ди, я́коже обеща́лся еси́, / посеща́я чад твои́х, / Се́ргие преподо́бне, о́тче наш.
Ин тропарь, глас 8:
От ю́ности восприя́л еси́ Христа́ в души́ твое́й, преподо́бне, / и па́че всего́ вожделе́л еси́ мирска́го мяте́жа уклони́тися, / му́жески в пусты́ню всели́лся еси́ / и ча́да послуша́ния в ней, плоды́ смире́ния, возрасти́л еси́. / Тем быв Тро́ице вселе́ние, / чудесы́ твои́ми всех просвети́л еси́, приходя́щих к тебе́ ве́рою, / и исцеле́ния всем подая́ оби́льно. / О́тче наш Се́ргие, моли́ Христа́ Бо́га, да спасе́т ду́ши на́ша.
Канон преподобнаго, глас 8.
Песнь 1
Ирмос: Колесницегони́теля фарао́ня погрузи́ / чудотворя́й иногда́ / Моисе́йский жезл, крестообра́зно порази́в / и раздели́в мо́ре, / Изра́иля же беглеца́, пешехо́дца спасе́, / песнь Бо́гови воспева́юща.
Припев: Преподо́бне о́тче наш Се́ргие, моли́ Бо́га о нас.
Христа́, нас ра́ди во́лею смири́вшагося да́же до ра́бия о́браза, подража́в, / возлюбил еси́ смире́ние / и, зе́льным бде́нием и моли́твами душегу́бныя стра́сти умертви́в, / на го́ру безстра́стия возше́л еси́, Се́ргие пребога́те.
Я́ко свети́льник све́та, / твою́ ду́шу сле́зными пото́ки украша́я, / и друга́го Исаа́ка подо́бно сам себе́ возне́сл еси́, преподо́бне, / и се́рдце твое́ Бо́гу поже́рл еси́.
Слава: И́же во чре́ве ма́терни трикра́ты проглаше́нием / Тро́ицы служи́тель показа́лся еси́ / и, Трисо́лнечным све́том озаря́емь, / де́монская ополче́ния, я́ко паучи́ну, разори́л еси́, преблаже́нне Се́ргие.
И ныне: Зако́нов кроме́ есте́ственных родила́ еси́ Законода́вца Бо́га и Челове́ка бы́вша, / Того́, я́ко Бла́га, моли́, Всенепоро́чная, / на́ша беззако́ния презре́ти, вопию́щих всегда́: / пои́м Го́споду, сла́вно бо просла́вися.
Песнь 3
Ирмос: Утвержде́й в нача́ле Небеса́ ра́зумом / и зе́млю на вода́х основа́вый, / на ка́мени мя, Христе́, за́поведей Твои́х утверди́, / я́ко несть свят па́че Тебе́, / Еди́не Человеколю́бче.
Припев: Преподо́бне о́тче наш Се́ргие, моли́ Бо́га о нас.
Благи́х о́браз тебе́ дав твои́м ученико́м, / и привле́кл еси́ мно́ги ду́ши во спасе́ние, отлучи́вшихся мирска́го пристра́стия, / и́же утеше́ния улучи́ша ра́йскаго наслажде́ния.
Я́ко добропло́дная ма́слина в дому́ Бо́жии, блаже́нне, процве́л еси́, / и еле́ем умаща́я ду́ши любо́вию тя пою́щих, преблаже́нне Се́ргие, / и ве́рою Христу́ вопию́щих: / несть свят па́че Тебе́, Человеколю́бче.
Слава: Стра́сти душетле́нныя успи́л еси́ бо́дренными бде́нии, блаже́нне, / и сих ра́ди в черто́г Небе́сный всели́лся еси́, / прие́м, богому́дре Се́ргие, благода́ть исцеле́ний.
И ныне: Херуви́мов и Серафи́мов превы́шши яви́лася еси́, Богоро́дице: / Ты бо еди́на прия́ла еси́ невмести́маго Бо́га во чре́ве Твое́м, Нескве́рная. / Те́мже Тя, вси ве́рнии, пе́сньми, Чи́стая, ублажа́ем.
Го́споди, поми́луй, трижды.
Седален, глас 4. Подобен: Вознесыйся на Крест:
Я́ко вои́стину тле́нных оста́вив нестоя́нное, / Христу́ от души́ после́довал еси́ / и боле́зньми, и труды́, и зе́льным воздержа́нием, / я́ко безпло́тен пожи́в, преблаже́нне Се́ргие, / моли́ Христа́ Бо́га, спасти́ся душа́м на́шим.
Слава, и ныне, Богородичен: Херуви́мов и Серафи́мов превы́шши еси́, Богоро́дице, / Небесе́ же и земли́ простра́ннейши, / ви́димыя тва́ри и неви́димыя яви́лася еси́ преиму́щи / несосу́дным сосужде́нием: / Его́же бо простра́нствия Небеса́ не вмеща́ют, / в Твое́й утро́бе вмести́ла еси́, Чи́стая, / Его́же моли́ спасти́ся рабо́м Твои́м.
Песнь 4
Ирмос: Ты моя́ кре́пость, Го́споди, / Ты моя́ и си́ла, / Ты мой Бог, Ты мое́ ра́дование, / не оста́вль не́дра О́тча / и на́шу нищету́ посети́в. / Тем с проро́ком Авваку́мом зову́ Ти: / си́ле Твое́й сла́ва, Человеколю́бче.
Припев: Преподо́бне о́тче наш Се́ргие, моли́ Бо́га о нас.
Ду́ха Пресвята́го храм, о́тче, был еси́, и жи́зненных вод река́ исполня́ема, / основа́ние непоколеби́мо Це́ркве, мона́шествующих утвержде́ние, / Се́ргие досточу́дне.
Проро́чески сле́зными ка́плями на всяк день посте́лю омоча́я, Се́ргие сла́вне, / до́ндеже до конца́ страсте́й пучи́ну изсуши́л еси́; / те́мже па́мять твою́ почита́ем, присночестну́ю и свяще́нную.
Слава: Лице́ Христо́во лице́м, преподо́бне Се́ргие, зре́ти сподо́бился еси́, / зерца́лом вои́стинну разре́шшимся. / Сие́ бо и от ми́ра отлучи́ тя к возлю́бленному жела́нию.
И ныне: Очище́ние на́ших да́руй неве́дений, я́ко безгре́шен, / и умири́ мир Твой, Бо́же, моли́твами Ро́ждшия Тя.
Песнь 5
Ирмос: Вску́ю мя отри́нул еси́ / от лица́ Твоего́, Све́те незаходи́мый, / и покры́ла мя есть чужда́я тьма, окая́ннаго? / Но обрати́ мя и к све́ту за́поведей Твои́х / пути́ моя́ напра́ви, молю́ся.
Припев: Преподо́бне о́тче наш Се́ргие, моли́ Бо́га о нас.
В поще́ниих непрекло́нен пребы́л еси́, му́дре, / и до отше́ствия своего́ храня́ сие́ опа́сно, / и́мже сподо́бился еси́ я́ве нетле́ннаго блаже́нства.
Остр ум име́я к Бо́гу внима́ти, стра́сти душетле́нныя успи́л еси́, о́тче, / и снопы́ благопло́дия пожа́л еси́, / пита́я благоче́стно восхваля́ющия тя, преподо́бне о́тче Се́ргие.
Слава: Све́тло житие́ твое́, преподо́бне Се́ргие, и изве́стно всем конце́м яви́ся, / и боже́ственныя добро́ты испо́лнено, / моли́твами же, и поще́ньми, и любо́вию, я́же ко Христу́ Человеколю́бцу.
И ныне: Тя сте́ну иму́ще и заступле́нием Твои́м соблюда́еми, / Твое́ю боже́ственною сла́вою хва́лящеся, Тя ублажа́ем. / Ты бо, Пречи́стая, душа́м на́шим источа́еши весе́лие и ра́дование.
Песнь 6
Ирмос: Очи́сти мя, Спа́се, / мно́га бо беззако́ния моя́, / и из глубины́ зол возведи́, молю́ся: / к Тебе́ бо возопи́х, и услы́ши мя, / Бо́же спасе́ния моего́.
Припев: Преподо́бне о́тче наш Се́ргие, моли́ Бо́га о нас.
Па́мять твою́ творя́щим свяще́нную, о́тче, / не преста́й моля́ Изба́вителя дарова́ти согреше́ний оставле́ние / и Небе́сное Ца́рство восприя́ти, иде́же глас пра́зднующих весели́т вся.
О Христе́ укрепля́емь, / вся кова́рствия лука́ваго тве́рдым умо́м, Се́ргие, / я́коже сеть, расто́ргнул еси́ / и пресве́тло свети́ло ми́ру, о́тче, показа́лся еси́.
Слава: Све́том Боже́ственным осия́емь / и со А́нгелы ны́не на Небесе́х водворя́яся, / помина́й ве́рою чту́щих па́мять твою́, / преподо́бне Се́ргие приснопа́мятне.
И ныне: Возвы́сила еси́ вои́стинну па́дшее челове́ческое существо́, / и́же о́бразом Боже́ственным и Отца́ ра́венством, / ви́димым Сы́ном неизме́нным, Богома́ти, / без се́мене во чре́ве поноси́вши.
Го́споди, поми́луй, трижды. Сла́ва, и ны́не:
Кондак, глас 8. Подобен: Взбранной Воеводе:
Христо́вою любо́вию уязви́вся, преподо́бне, / и Тому́ невозвра́тным жела́нием после́довав, / вся́кое наслажде́ние плотско́е возненави́дел еси́ / и, я́ко со́лнце, Оте́честву твоему́ возсия́л еси́; / тем и Христо́с да́ром чуде́с обогати́ тя. / Помина́й нас, чту́щих пресве́тлую па́мять твою́, да зове́м ти: / ра́дуйся, Се́ргие богому́дре.
Икос: Ева́нгельский глас, о́тче, услы́шав, / вся оста́вил еси́ плотска́я мудрова́ния, / бога́тство же и сла́ву, я́ко прах, вмени́в, / и на стра́сти, я́ко безпло́тен, подвиза́вся, / и безпло́тных ликостоя́нием че́сти сподо́бился еси́. / Ра́зума дарова́ние прия́л еси́, / е́же и пода́ждь в пе́снех пою́щим ти си́це: / ра́дуйся, Се́ргие преподо́бне и богоно́се, Небе́сный челове́че, земны́й А́нгеле; / ра́дуйся, Ду́ха Свята́го оби́тель; / ра́дуйся, моли́твами богода́нен дар прие́мый; / ра́дуйся, я́ко пре́жде рожде́ния проглаше́нием просла́вив Святу́ю Тро́ицу, Я́же тя просла́ви в жи́зни сей и по сме́рти; / ра́дуйся, целому́дрия сто́лпе, и́мже вся́ка страсть попра́ся; / ра́дуйся, я́ко от млады́х ногте́й после́дствовал еси́ Христу́; / ра́дуйся, притека́ющим к тебе́ спасе́ния хода́тай; / ра́дуйся, свети́льниче многосве́тлый, возведы́й ко Христу́ мона́хов мно́жества; / ра́дуйся, похвало́ Оте́честву твоему́; / ра́дуйся, проро́чеством укра́шенный, во е́же прорица́ти я́ко настоя́щая, бу́дущая; / ра́дуйся, я́ко моли́твами твои́ми сопроти́внии побежда́ются; / ра́дуйся, правосла́вному во́инству на́шему похвала́ и утвержде́ние, / его́же соблюди́ моли́твами твои́ми от враг ненаве́тно, да зове́м ти: / ра́дуйся, Се́ргие Богому́дре.
Песнь 7
Ирмос: Бо́жия снизхожде́ния / огнь устыде́ся в Вавило́не иногда́, / сего́ ра́ди о́троцы в пещи́, ра́дованною ного́ю, / я́ко во цве́тнице, лику́юще, поя́ху: / благослове́н еси́, Бо́же оте́ц на́ших.
Припев: Преподо́бне о́тче наш Се́ргие, моли́ Бо́га о нас.
В пещи́ искуше́ний разжже́ния / Боже́ственная благода́ть ороси́ тя, преподо́бне, / и многосве́тла Тро́ическим жела́нием показа́, зову́ща: / благослове́н Бог оте́ц на́ших.
Мир преоби́дев, сла́вне Се́ргие, / на земли́, я́ко безпло́тен, пожи́л еси́ / и а́нгельским ликостоя́нием сподо́бился еси́. / Тем тя ве́рою почита́ем, досточу́дне.
Слава: В приста́нище ти́хое вшед, богому́дре, / жите́йских пла́ваний отбегл еси́ / и волну́ющимся жите́йскими спаси́тельное окормле́ние был еси́, воспева́ющим: / благослове́н Бог оте́ц на́ших.
И ныне: Жезл прорасте́, Де́во, из ко́рене Иессе́ева, / всеблаже́нный Плод, Цвет нося́щи спаси́тельный / ве́рою Сы́ну Твоему́ вопию́щим: / отце́в на́ших Бо́же, благослове́н еси́.
Песнь 8
Ирмос: Седмери́цею пещь / халде́йский мучи́тель / богочести́вым неи́стовно разжже́, / си́лою же лу́чшею спасе́ны сия́ ви́дев, / Творцу́ и Изба́вителю вопия́ше: / о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Припев: Преподо́бне о́тче наш Се́ргие, моли́ Бо́га о нас.
Светоно́сный твой пра́здник, преблаже́нне Се́ргие, / испо́лни ра́дости и весе́лия духо́внаго, благоуха́ния же и просвеще́ния / тя иму́щим засту́пника и пра́вило мона́шествующим.
Моли́твою непреста́нною к Бо́гу восте́кл еси́ / и отту́ду Трисо́лнечными сия́нии озари́лся еси́, / на враги́ боре́ния поста́вив, приводя́ по́стников собо́ры но́вым житие́м, Христу́ вопию́щим: / де́ти, благослови́те, свяще́нницы, воспо́йте, лю́дие, превозноси́те Его́ во ве́ки.
Слава: В поще́ниих кре́пкое, в моли́твах неле́ностное / терпе́ние в искуше́ниих, Се́ргие, на земли́ показа́л еси́, зовы́й: / де́ти, благослови́те, свяще́нницы, воспо́йте, лю́дие, превозноси́те Его́ во ве́ки.
И ныне: Богороди́тельнице Чи́стая, души́ моея́ я́звы грехо́вныя и собла́зны очи́сти, / ко исто́чником примеша́ющи, я́же из ребр Рождества́ Твоего́, и́же от них поте́кшим струя́м; / к Тебе́ бо взыва́ю, и к Тебе́ прибега́ю, и Тя призыва́ю, Богоблагода́тную.
Песнь 9
Ирмос: Ужасе́ся о сем Не́бо, / и земли́ удиви́шася концы́, / я́ко Бог яви́ся челове́ком пло́тски / и чре́во Твое́ бысть простра́ннейшее Небе́с. / Тем Тя, Богоро́дицу, / А́нгелов и челове́к чинонача́лия велича́ют.
Припев: Преподо́бне о́тче наш Се́ргие, моли́ Бо́га о нас.
Светоявле́ния духо́внаго испо́лнен быв, преподо́бне Се́ргие, / свети́льник сия́я издале́ча, яви́лся еси́, / слове́сныя зари́ нам облиста́я, / и Пребоже́ственныя Тро́ицы жили́ще показа́лся еси́.
Вои́стинну тя вели́ка учи́теля, му́дре Се́ргие, Росси́йским страна́м Христо́с дарова́, / нело́жным правле́нием пра́вяща Оте́чество свое́ / и уче́ния сладча́йша ме́да излива́юща, / и́хже, я́ко от окри́на, и мы, ве́рнии, почерпа́ем незави́стно.
Слава: Душетле́нныя стра́сти победи́в, / я́ко па́стырь и́стинный, упа́сл еси́ слове́сное Христо́во ста́до, / е́же вы́ну благода́тию Ду́ха, я́ко цве́ты ра́йския, пита́я, преподо́бне.
И ныне: Псалмы́ Тя воспева́ем, Обра́дованная, / и немо́лчно Ти, е́же ра́дуйся, вопие́м: / Ты бо источи́ла еси́ всем ра́дование.
Светилен:
Процве́л еси́, я́ко фи́никс, Дави́дски, о́тче, / и оби́тель яви́лся еси́ Ду́ха Всесвята́го, / И́же сла́вна тя вселе́нней показа́, / о нас непреста́нно Христа́ моли́, / почита́ющих ве́рою пречестну́ю па́мять твою́, / преподо́бне Се́ргие.
Слава, и ныне, Богородичен: Тя пе́сньми немо́лчными ублажа́ем, Де́во, / я́ко от Тро́ицы Еди́наго родила́ еси́, Богоро́дице, / и но́сиши на боже́ственных объя́тиих / Пребога́тое Сло́во, Невра́щное и Неизме́нное.
Молитва первая:
О свяще́нная главо́, преподо́бне и богоно́сне о́тче наш Се́ргие, моли́твою твое́ю, и ве́рою, и любо́вию, я́же к Бо́гу, и чистото́ю се́рдца, еще́ на земли́ во оби́тель Пресвяты́я Тро́ицы ду́шу твою́ устро́ивый, и а́нгельскаго обще́ния и Пресвяты́я Богоро́дицы посеще́ния сподо́бивыйся, и дар чудоде́йственныя благода́ти прие́мый, по отше́ствии же твое́м от земны́х наипа́че к Бо́гу прибли́живыйся, и небе́сныя си́лы приобщи́выйся, но и от нас ду́хом любве́ своея́ не отступи́вый и честны́я твоя́ мо́щи, я́ко сосу́д благода́ти по́лный и преизлива́ющийся, нам оста́вивый! Ве́лие име́я дерзнове́ние ко Всеми́лостивому Влады́це, моли́ спасти́ рабы́ Его́, су́щей в тебе́ благода́ти Его́ ве́рующия и к тебе́ с любо́вию притека́ющия. Испроси́ нам от Великодарови́таго Бо́га на́шего вся́кий дар, всем и коему́ждо благопотре́бен, ве́ры непоро́чны соблюде́ние, градо́в на́ших утвержде́ние, ми́ра умире́ние, от гла́да и па́губы избавле́ние, от наше́ствия иноплеме́нных сохране́ние, скорбя́щим утеше́ние, неду́гующим исцеле́ние, па́дшим возставле́ние, заблужда́ющим на путь и́стины и спасе́ния возвраще́ние, подвиза́ющимся укрепле́ние, благоде́лающим в дела́х благи́х преспе́яние и благослове́ние, младе́нцам воспита́ние, ю́ным наставле́ние, неве́дущим вразумле́ние, сиро́там и вдови́цам заступле́ние, отходя́щим от сего́ вре́меннаго жития́ к ве́чному благо́е уготовле́ние и напу́тствие, отше́дшим блаже́нное упокое́ние, и вся ны споспешеству́ющими твои́ми моли́твами сподо́би в день Стра́шнаго суда́ шу́ия ча́сти изба́вится, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам ца́рствие от сложе́ния ми́ра. Ами́нь.
Молитва вторая:
О свяще́нная главо́, преподо́бне о́тче, преблаже́нне а́вво Се́ргие вели́кий! Не забу́ди убо́гих свои́х до конца́, но помина́й нас во святы́х свои́х и благоприя́тных моли́твах к Бо́гу. Помяни́ ста́до твое́, е́же сам упа́сл еси́, и не забу́ди посеща́ти чад свои́х. Моли́ за ны, о́тче свяще́нный, за де́ти своя́ духо́вныя, я́ко име́я дерзнове́ние к Небе́сному Царю́, не премолчи́ за ны ко Го́споду и не пре́зри нас, ве́рою и любо́вию чту́щих тя. Помина́й нас, недосто́йных у Престо́ла Вседержи́телева, и не преста́й моля́ся о нас ко Христу́ Бо́гу, и́бо дана́ тебе́ бысть благода́ть за ны моли́тися. Не мним бо тя су́ща ме́ртва: а́ще бо и те́лом преста́вился еси́ от нас, но и по сме́рти жив сый пребыва́еши. Не отступа́й от нас ду́хом, сохраня́я нас от стрел вра́жиих, и вся́кия пре́лести бесо́вския, и ко́зней диа́вольских, па́стырю наш до́брый; а́ще бо и моще́й твои́х ра́ка пред очи́ма на́шима ви́дима есть всегда́, но свята́я твоя́ душа́ со а́нгельскими во́инствы, со безпло́тными ли́ки, с Небе́сными Си́лами, у престо́ла Вседержи́теля предстоя́щи, досто́йно весели́тся. Ве́дуще бо тя вои́стинну и по сме́рти жи́ва су́ща, тебе́ припа́даем и тебе́ мо́лимся, е́же моли́тися о нас Всеси́льному Бо́гу о по́льзе душ на́ших, и испроси́ти вре́мя на покая́ние, и о невозбра́нном преи́тии от земли́ на Не́бо, мыта́рств же го́рьких, бесо́в, возду́шных князе́й и ве́чныя му́ки изба́витися, и Небе́сному Ца́рствию насле́дником бы́ти со все́ми пра́ведными, от ве́ка угоди́вшими Го́споду на́шему Иису́су Христу́. Ему́же подоба́ет вся́кая сла́ва, честь и поклоне́ние со Безнача́льным Его́ Отце́м, и с Пресвяты́м, и Благи́м, и Животворя́щим Его́ Ду́хом ны́не, и при́сно, и во ве́ки веко́в. Ами́нь.
Молитва третия:
О небе́снаго граждани́не Иерусали́ма, преподо́бне о́тче Се́ргие! Воззри́ на нас ми́лостиво и к земли́ приве́рженных возведи́ к высоте́ Небе́сней. Ты горе́, на Небеси́; мы, на земли́ ни́зу, удалены́ от тебе́ не толи́ко ме́стом, ели́ко греха́ми свои́ми и беззако́ниями; но к тебе́, я́ко нам сро́дному, прибега́ем и взыва́ем: наста́ви нас ходи́ти путе́м твои́м, вразуми́ и руково́дствуй. Сво́йственно есть тебе́, о́тче наш, благоутро́бие и человеколю́бие на земли́ живу́щу, не о свое́м то́кмо спасе́нии бысть тебе́ попече́ние, но и о всех к тебе́ притека́ющих. Наставле́ния твоя́ бы́ша тро́стию кни́жника скоропи́сца, на се́рдце ка́ждаго глаго́лы жи́зни начертава́ющаго. Не теле́сныя то́кмо врачева́л еси́ боле́зни, но па́че душе́вных врач изя́щный яви́лся еси́; и вся твоя́ свята́я жизнь бысть зерца́лом вся́кия доброде́тели. А́ще толи́к был еси́, свя́тче Бо́жий, на земли́, коли́к ны́не еси́, на Небеси́! Ты днесь предстои́ши Престо́лу Све́та Непристу́пнаго и в нем, я́ко в зерца́ле, зри́ши вся на́ша ну́жды и проше́ния; ты водворя́ешися вку́пе со А́нгелы, о еди́нем гре́шнице ка́ющемся ра́дующимися. И человеколю́бие Бо́жие есть неистощи́мо, и твое́ к Нему́ дерзнове́ние мно́го, не преста́ни о нас вопия́ ко Го́споду. Испроси́ предста́тельством свои́м у Всеми́лостиваго Бо́га на́шего мир Це́ркви Его́, под зна́мением креста́ во́инствующей, согла́сие в ве́ре и единому́дрие, суему́дрия же и раско́лов истребле́ние, утвержде́ние во благи́х де́лех, больны́м исцеле́ние, печа́льным утеше́ние, оби́женным заступле́ние, бе́дствующим по́мощь. Не посрами́ нас, к тебе́ с ве́рою притека́ющих. А́ще бо и недосто́йни есмы́ толи́каго отца́ и хода́тая, но ты, подража́тель человеколю́бия Бо́жия, сотвори́ нас досто́йны чрез обраще́ние от злых дел к благо́му житию́. Вся богопросвеще́нная Росси́я, твои́ми чудесы́ испо́лненная и ми́лостями облагоде́тельствованная, испове́дает тя бы́ти своего́ покрови́теля и засту́пника. Яви́ дре́вния ми́лости твоя́ и и́хже отце́м спомоществова́л еси́, не отри́ни и нас, чад их, стопа́ми их к тебе́ ше́ствующих. Ве́руем, я́ко ду́хом нам сопрису́тствуеши. Иде́же бо есть Госпо́дь, я́коже сло́во Его́ учи́т нас, та́мо и слуга́ Его́ бу́дет. Ты ве́рный еси́ раб Госпо́день, и Бо́гу везде́ су́щу, ты в Нем еси́, и Он в тебе́ есть, па́че же и те́лом с на́ми еси́. Се нетле́нныя и живоно́сныя твоя́ мо́щи, я́ко сокро́вище безце́нное, вручи́ нам чуде́с Бог. Предстоя́ще им, я́ко тебе́ жи́ву су́щу, припа́даем и мо́лимся: приими́ моле́ния на́ша и вознеси́ их на же́ртвенник благоутро́бия Бо́жия, да прии́мем тобо́ю благода́ть и благовре́менну в ну́ждах на́ших по́мощь. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки моли́твами твои́ми. Па́ству же твою́ духо́вную, тобо́ю со́бранную, не преста́ни управля́ти жезло́м духо́вныя му́дросте: подвиза́ющимся помози́, разсла́бленных возста́ви, споспеши́ и́го Христо́во нести́ во благоду́шии и терпе́нии и всех нас упра́ви в ми́ре и покая́нии сконча́ти живо́т наш и пресели́тися со упова́нием в блаже́нная не́дра Авраа́мова, иде́же ты ра́достно по труде́х и по́двизех ны́не почива́еши, прославля́я со все́ми святы́ми Бо́га, в Тро́ице сла́вимаго, Отца́, и Сы́на, и Свята́го Ду́ха. Ами́нь.
Молитва четвертая:
О преподо́бне и богоно́сне о́тче наш Се́ргие! Воззри́ на нас (имя рек) ми́лостивно и, к земли́ приве́рженных, возведи́ к высоте́ Небе́сней. Укрепи́ на́ше малоду́шие и утверди́ нас в ве́ре, да несомне́нно упова́ем получи́ти вся блага́я от благосе́рдия Влады́ки Бо́га моли́твами твои́ми. Испроси́ предста́тельством твои́м вся́кий дар всем и коему́ждо благопотре́бен и вся ны споспе́шествующими твои́ми моли́твами сподо́би в день Стра́шнаго суда́ шу́ия ча́сти изба́витися, десны́я же страны́ о́бщники бы́ти и блаже́нный о́ный глас Влады́ки Христа́ услы́шати: прииди́те, благослове́ннии Отца́ Моего́, насле́дуйте угото́ванное вам Ца́рствие от сложе́ния ми́ра. Ами́нь.
