Триодь Цветная. Последование Вечерни в Неделю Пасхи.

Последование вечерни

По 9-м часе́, во свети́льничном, облачи́тся настоя́тель во всю́ свяще́нную оде́жду. И ста́в пред свято́ю трапе́зою с кади́льницею, зна́менует крестови́дно, и возглаша́ет глаго́ля: Благослове́н Бо́г на́ш всегда́, ны́не и при́сно, и во ве́ки веко́в. И на́м отвеща́ющым: Ами́нь. И то́й начина́ет: Христо́с воскре́се из ме́ртвых, сме́ртию сме́рть попра́в, и су́щым во гробе́х живо́т дарова́в. три́жды. И мы́ то́йжде отвеща́ем три́жды. И глаго́лет настоя́тель преждерече́нныя стихи́: 1-й, Да воскре́снет Бо́г: 2-й: Я́ко исчеза́ет ды́м: 3-й: Та́ко да поги́бнут гре́шницы: 4-й: Се́й де́нь, его́же сотвори́ Госпо́дь: Мы́ же на ки́йждо сти́х пое́м: Христо́с воскре́се: по еди́ножды, Сла́ва: Мы́ же: Христо́с воскре́се: И ны́не: Мы́ же: Христо́с воскре́се: И па́ки настоя́тель: Христо́с воскре́се из ме́ртвых, сме́ртию сме́рть попра́в. И мы́ коне́ц: И су́щым во гробе́х живо́т дарова́в. Та́же ектениа́ вели́кая от диа́кона: Ми́ром Го́споду помо́лимся.

[зри́] Подоба́ет ве́дати, я́ко по внегда́ нача́ти иере́ю, кади́т святу́ю трапе́зу по обы́чаю и ве́сь олта́рь, ве́чер, на Го́споди воззва́х: на Утрени, в нача́ле кано́на исхо́дит и кади́т хра́м и ли́ки и бра́тию по обыкнове́нному чи́ну.

Посе́м, Го́споди воззва́х: пое́м во гла́с 2. Поста́вим стихо́в 6. И пое́м стихи́ры воскре́сны, 3, гла́с 2.

Пре́жде ве́к от Отца́ ро́ждшемуся Бо́жию Сло́ву, вопло́щшемуся от Де́вы Мари́и, прииди́те поклони́мся: Кре́ст бо претерпе́в, погребе́нию предаде́ся, я́ко Са́м восхоте́: и воскре́с из ме́ртвых, спасе́ мя заблужда́ющаго челове́ка.

Христо́с Спа́с на́ш, е́же на ны́ рукописа́ние пригвозди́в на Кресте́ загла́ди, и сме́ртную держа́ву упраздни́: покланя́емся Его́ тридне́вному Воскресе́нию.

Со арха́нгелы воспои́м Христо́во Воскресе́ние: То́й бо е́сть Изба́витель и Спа́с ду́ш на́ших, и в сла́ве стра́шней и кре́пцей си́ле, па́ки гряде́т суди́ти ми́ру, его́же созда́.

И восто́чны 3.

Тебе́ распе́ншагося и погребе́ннаго, а́нгел пропове́да Влады́ку, и глаго́лаше жена́м: прииди́те ви́дите, иде́же лежа́ше Госпо́дь: воскре́се бо, я́коже рече́, я́ко всеси́лен. Те́мже Тебе́ покланя́емся еди́ному безсме́ртному: жизнода́вче Христе́, поми́луй на́с.

Кресто́м Твои́м упраздни́л еси́, ю́же от дре́ва кля́тву, погребе́нием Твои́м умертви́л еси́ сме́рти держа́ву: воста́нием же Твои́м просвети́л еси́ ро́д челове́ческий. Сего́ ра́ди вопие́м Ти́: благоде́телю Христе́ Бо́же на́ш, сла́ва Тебе́.

Отверзо́шася Тебе́ Го́споди, стра́хом врата́ сме́ртная, вра́тницы же а́довы ви́девше Тя́, убоя́шася: врата́ бо ме́дная сокруши́л еси́, и вереи́ желе́зныя сте́рл еси́, и изве́л еси́ на́с от тьмы́ и се́ни сме́ртныя, и у́зы на́шя растерза́л еси́.

Сла́ва:

Спаси́тельную пе́снь пою́ще, от у́ст возсле́м: прииди́те вси́ в дому́ Госпо́днем припаде́м, глаго́люще: на Дре́ве распны́йся, и из ме́ртвых воскресы́й, и сы́й в не́дрех О́тчих, очи́сти грехи́ на́шя.

И ны́не: Богоро́дичен:

Пре́йде се́нь зако́нная, благода́ти прише́дши: я́коже бо купина́ не сгара́ше опаля́ема, та́ко Де́во родила́ еси́, и Де́ва пребыла́ еси́. Вме́сто столпа́ о́гненнаго, пра́ведное возсия́ Со́лнце: вме́сто Моисе́а, Христо́с, спасе́ние ду́ш на́ших.

Вхо́д со Ева́нглием. Све́те ти́хий: Та́же, проки́мен вели́кий, гла́с 7: Кто́ бо́г ве́лий я́ко Бо́г на́ш? ты́ еси́ Бо́г творя́й чудеса́. Сти́х 1: Сказа́л еси́ в лю́дех си́лу твою́. Сти́х 2: И ре́х: ны́не нача́х, сия́ изме́на десни́цы вы́шняго. Сти́х 3: Помяну́х дела́ госпо́дня, я́ко помяну́ от нача́ла чудеса́ Твоя́. И па́ки: Кто́ Бо́г ве́лий: По проки́мне же возглаша́ет диа́кон: И о сподо́битися на́м слы́шанию свята́го Ева́нглиа, Го́спода Бо́га мо́лим. Посе́м чте́т Ева́нглие настоя́тель во олтари́, Иоа́нна, зача́ло 65: Су́щу по́зде в де́нь то́й: Коне́ц: Не иму́ ве́ры.

Посе́м ектениа́: Рце́м вси́: и Сподо́би Го́споди в ве́чер се́й: Та́же: Испо́лним вече́рнюю моли́тву:

И по возгла́се пое́м стихи́ру воскре́сну, гла́с 2:

Воскресе́ние Твое́ Христе́ Спа́се, всю́ просвети́ вселе́нную и призва́л еси́ Твое́ созда́ние: всеси́льне Го́споди сла́ва тебе́.

Та́же стихи́ры па́схи, гла́с 5: Па́сха свяще́нная: с припе́вы и́х. Сла́ва, и ны́не: Воскресе́ния де́нь: Христо́с воскре́се: три́жды, кроме́ конца́ стихи́ры. Та́же диа́кон: Прему́дрость. Мы́ же: Благослови́. Настоя́тель: Сы́й благослове́н Христо́с Бо́г на́ш: И мы́: утверди́ бо́же: Та́же настоя́тель, вме́сто: Сла́ва Тебе́ Христе́ Бо́же: Христо́с воскре́се из ме́ртвых сме́ртию сме́рть попра́в. И мы́: И су́щым во гробе́х живо́т дарова́в. И а́бие глаго́лет отпу́ст со Кресто́м: Христо́с воскресы́й из ме́ртвых: И про́чее, я́коже изъяви́ся в коне́ц у́трени.

[зри́] И целу́ем святы́я ико́ны. И вхо́дим в трапе́зу, и глаго́лем: Христо́с воскре́се: три́жды. Сла́ва, и ны́не: Настоя́тель: Христе́ Бо́же благослови́: По воста́нии же от трапе́зы, глаго́лем: Христо́с воскре́се: три́жды. Сла́ва, и ны́не: Настоя́тель: С на́ми Бо́г Свое́ю благода́тию: И та́ко твори́м во всю́ седми́цу Све́тлую Вече́рни после́дование.