Триодь Цветная. Неделя Шестая по Пасхе вечера. Последование Вечерни в воскресенье.

Последование Вечерни

На Го́споди воззва́х: поста́вим стихо́в 6: пра́здника 3, и мине́и 3.

Пра́зднику, гла́с 5. Подо́бен: Ра́дуйся по́стников:

Све́т всему́ естеству́ челове́ческому, и О́ко те́лу ми́ра сего́, сы́й Бо́же и Сло́ве, и очесе́м о́бще, Соде́тель и Зижди́тель познава́емь: и ны́не от смеше́ния бре́ния и плюнове́ния, слепа́го неизрече́нно вооча́еши пе́рсты Твои́ми созида́ющими и бре́ние, и виде́ние: е́же и улучи́в, пре́жде в рожде́нных зна́емый, со́лнца отню́д не ви́дя, Тебе́ Сла́дкое ви́дит Со́лнце, зря́ о́браз, на́с за благоутро́бие неизрече́нное Созда́вшаго.

Удо́в лише́нием, и отложе́нием челове́ческия плотски́я ору́дийныя ча́сти богате́я, пре́жде слепы́й от утро́бы ма́терни произше́дый, я́ко не бы́ти созда́ние помышля́ше, оче́с лише́ние, из него́же нога́ма, и множа́йшая телесе́ преткнове́ния, е́же о ка́мение быва́ху: и́же Тобо́ю и сие́ бога́тство стяжа́в, ви́дит све́т ми́ра, и Тебе́ све́тов Строи́теля Бо́га и Влады́ку тва́рем возвеща́ет, и Соде́теля всеми́рнаго.

Усты́ и душе́ю и умо́м, от пе́рсти Зижди́тельски и плюнове́ния оче́с зе́ницы Да́вшаго, и о́бщее просвеще́ние, и́же пре́жде слепы́й испове́даше, тва́рем всеми́рнаго Смотри́теля и Строи́теля, за милосе́рдие то́кмо созда́ния вочелове́чившагося, и пропове́даше я́ко Бо́га Всеси́льнаго: его́же кни́жницы ре́вностию, и е́же к ни́м бесе́дование отню́д не могу́ще зре́ти, слепотству́юще мно́жае, изгна́на от собо́рища су́дят, иногда́ зе́ницы Да́вшаго слепо́му, душе́вныя и теле́сныя.

Сла́ва, и ны́не: гла́с 2:

Слепы́й роди́выйся в свое́м по́мысле глаго́лаше: еда́ а́з гре́х ра́ди роди́тельных роди́хся без о́чию? еда́ а́з за неве́рие язы́ков роди́хся во обличе́ние? домышля́юся вопроша́ти: когда́ но́щь, когда́ де́нь? не терпи́та ми́ но́зе ка́меннаго претыка́ния: не ви́дех бо со́лнца сия́юща, ниже́ во о́бразе мене́ Созда́вшаго: но молю́ ти ся Христе́ Бо́же, при́зри на мя́ и поми́луй мя́.

На стихо́вне стихи́ры воскре́сны, гла́с 5:

Честны́м Твои́м Кресто́м Христе́, диа́вола посрами́л еси́, и Воскре́сением Твои́м жа́ло грехо́вное притупи́л еси́, и спа́сл еси́ ны́ от вра́т сме́ртных: Сла́вим Тя́ Единоро́дне.

Сти́х: К Тебе́ возведо́х о́чи мои́:

Покая́нен: Го́споди, согреша́я не престаю́, человеколю́бия сподобля́емь не разуме́ю: победи́ мое́ омраче́ние, еди́не Бла́же, и поми́луй мя́.

Сти́х: Поми́луй на́с Го́споди, поми́луй на́с:

Му́ченичен: О земны́х все́х небре́гше, и на му́ки му́жески дерзну́вше, блаже́нных наде́жд не погреши́сте, но небе́снаго Ца́рствия насле́дницы бы́сте, прехва́льнии му́ченицы: иму́ще дерзнове́ние к Человеколю́бцу Бо́гу, ми́ру ми́р проси́те, и душа́м на́шым ве́лию ми́лость.

Сла́ва, и ны́не: гла́с 8:

Мимоходя́ Иису́с от святи́лища, обре́те челове́ка сле́па от рожде́ния, и умилосе́рдився положи́ бре́ние на о́чию его́, и рече́ к нему́: иди́, умы́йся в Силоа́ме: и умы́вся прозре́, сла́ву возсыла́я Бо́гу. Сосе́ди же его́ глаго́лаху ему́: кто́ твои́ зе́ницы отве́рзе, и́хже никто́же от зря́щих исцели́ти возмо́же? Он же возопи́в рече́: Челове́к Иису́с глаго́лемый, Он ми́ рече́: умы́йся в Силоа́ме, и прозре́х. То́й е́сть вои́стинну, Его́же рече́ Моисе́й в зако́не Христа́, Месси́ю, То́й е́сть Спа́с ду́ш на́ших.