Триодь Цветная. Понедельник Шестой седмицы по Пасхе. Последование Утрени.

Последование Утрени

По 1-м стихосло́вии седа́лен, гла́с 5.

Подо́бен: Собезнача́льное Сло́во:

Кре́ст Госпо́день похва́лим, погребе́ние свято́е пе́сньми почти́м, и Воскре́сение Его́ препросла́вим: я́ко совозста́ви ме́ртвыя от гро́б, я́ко Бо́г, плени́в сме́рти держа́ву, и кре́пость диа́волю, и су́щым во а́де Све́т возсия́.

Сти́х: Го́споди да не я́ростию Твое́ю:

Вси́ побди́м, и Христа́ усря́щим ве́рнии со мно́жеством еле́а, и свеща́ми све́тлыми, я́ко да черто́га вну́трь сподо́бимся: вне́ бо двере́й обрета́яйся, безде́льно Бо́гови воззове́т: поми́луй мя́.

Сти́х: Ди́вен Бо́г во святы́х Свои́х, Бо́г Изра́илев.

Му́ченичен: Го́споди, ча́ши Стра́сти Твоея́ страстоте́рпцы Твои́ поревнова́вше, оста́виша жите́йскую красоту́, и бы́ша а́нгелом соприча́стницы. Те́х мольба́ми пода́ждь душа́м на́шым ми́р Христе́ Бо́же, и ве́лию ми́лость.

Сла́ва, и ны́не:

Со а́нгелы небе́сная, с челове́ки земна́я, во гла́се ра́дования Богоро́дице вопие́м ти́: ра́дуйся, врата́ небе́с ши́ршая. ра́дуйся, еди́но земноро́дных спасе́ние. ра́дуйся Честна́я, ра́дуйся Благода́тная, ро́ждшая Бо́га воплоще́ннаго.

По 2-м стихосло́вии седа́лен, гла́с 5.

Подо́бен: Собезнача́льное Сло́во:

Пре́жде Креста́ Твоего́ Ще́дре, и Воста́ния, иду́щу Ти́, слепы́й от рожде́ния взыва́ше те́пле: Сы́не Дави́дов поми́луй, да́ждь ми́ све́т очесе́м, да узрю́ Тя и а́з: его́же зе́ницы пома́зав бре́нием от плюнове́ния Сло́ве, тому́ све́т све́тло да́л еси́.

Сла́ва, и ны́не: то́йже.

Воскресение Христо́во: псало́м 50. И посе́м, кано́н пра́здника, со ирмосо́м на 8. И мине́и на 4. Конда́к и ексапостила́рий пра́здника.

На хвали́тех поста́вим стихи́ 4. И пое́м стихи́ры осмогла́сника, гла́с 5:

Го́споди, запеча́тану гро́бу от беззако́нников, проше́л еси́ из гро́ба, я́коже роди́лся еси́ от Богоро́дицы: не уразуме́ша, ка́ко воплоти́лся еси́, безпло́тнии Твои́ а́нгели: не чу́вствоваша, когда́ воскре́сл еси́, стрегу́щии Тя́ во́ини. Обоя́ бо запечатле́стася испыту́ющым, яви́шася же чудеса́ кла́няющымся ве́рою та́инству: е́же воспева́ющым, возда́ждь на́м ра́дость и ве́лию ми́лость. [Два́жды.]

Увы́ мне́, кому́ уподо́бихся а́з? непло́дней смоко́внице, и бою́ся прокля́тия с посече́нием. Но Небе́сный Де́лателю Христе́ Бо́же, олядене́вшую мою́ ду́шу плодоно́сну покажи́, и я́ко блу́днаго сы́на приими́ мя́, и поми́луй мя́.

Му́ченичен:

Благослове́но во́инство Царя́ Небе́снаго: а́ще бо и земноро́дни бы́ша страстоте́рпцы, но а́нгельское досто́инство потща́шася дости́гнути: телеса́ презре́вше, и страда́ньми безпло́тных сподо́бльшеся че́сти. Моли́твами те́х Го́споди, низпосли́ на́м ве́лию ми́лость.

Сла́ва, и ны́не: гла́с 2:

Все́ житие́ слепы́й но́щь помышля́я, возопи́ к Тебе́: Го́споди отве́рзи ми́ зе́ницы, Сы́не Дави́дов, Спа́се на́ш, да со все́ми и а́з воспою́ Твою́ си́лу.

На стихо́вне стихи́ры пра́здника, гла́с 5.

Подо́бен: Преподо́бне О́тче:

Ослепле́ние яви́ся слепы́й не́гли ви́дящым, омрача́я и ра́зумы и ду́шы и у́м, зря́щым его́ безго́дное прозре́ние, и пригласи́вше вопроша́ху с лю́тостию: ка́ко ны́не зри́ши я́ко еди́н от све́т ви́дящих, сле́п сы́й от рожде́ния, и приседя́й стезя́м и прося́й? Те́мже показа́ све́т Подава́ющаго, и Созда́вшаго свети́ла в ми́ре. От ни́хже пропове́дается Сы́н Бо́жий Пребезнача́льный, в после́дняя из Де́вы Челове́к явле́йся за милосе́рдие, от Боже́ственнаго Ду́ха.

Сти́х: При́зри на мя́, и поми́луй мя́.

Я́коже бре́мя и земно́е тяжконо́сие зря́шеся, в ми́ре ходя́ слепы́й, и по сто́гнах но́ги сокруша́яй, не́гли я́коже зре́нием жезло́м богате́я. Те́мже прибега́ет к Светода́телю, от Него́же прие́млет све́т зре́ти, и очи́ма свои́ма ви́дети Творца́, по подо́бию Твоему́, и по о́бразу созда́вшаго естество́ челове́ческое от земли́ пе́рвее, и ны́не пе́рстию и плюнове́нием Просвети́вшаго его́ зе́ницы, и Да́вшаго человеколю́бно зре́ти со́лнце.

Сти́х: Стопы́ моя́ напра́ви по словеси́ Твоему́:

Сообра́зна узре́ челове́ческому о́бразу Сло́ва О́тча, све́т ви́дев слепы́й, от него́же светоно́сное и дненача́льное ви́де со́лнце, я́коже и про́чии челове́цы ра́дуяся зре́нию новоле́пнейшему, и́мже украся́шеся пра́во иды́й, и безтру́дне проходя́ стези́, и просвети́вшаго Сы́на Бо́жия познава́я, вочелове́чшася кра́йняго ра́ди благоутро́бия, и е́же бе́ пребы́вша Бо́га, Челове́ка бы́вша, и прии́мша е́же не бе́, неслия́нное же соблюда́юща си́х соедине́ние.

Сла́ва, и ны́не: гла́с 5:

Го́споди, мимоходя́ путе́м, обре́л еси́ челове́ка сле́па от рожде́ния, и удивле́ни бы́вше ученицы́, вопроша́ху Тя́ глаго́люще: Учи́телю, кто́ согреши́, се́й ли, или́ роди́тели его́, да сле́п роди́ся? Ты́ же Спа́се мо́й возопи́л еси́ к ни́м: ни се́й согреши́, ни роди́тели его́, но да явя́тся дела́ бо́жия на не́м. Мне́ подоба́ет де́лати дела́ Посла́вшаго Мя́, я́же никто́же мо́жет де́лати. И сия́ ре́к, плю́нув до́лу, и бре́ние сотво́рь, пома́зал еси́ о́чи его́, ре́к к нему́: иди́ умы́йся в Силоа́мстей купе́ли. Он же умы́вся здра́в бы́сть, и вопия́ше к Тебе́: ве́рую Го́споди, и поклони́ся Тебе́. Те́мже вопие́м и мы́: поми́луй на́с.