Приложение Триоди Цветной. Трипеснцы на Утрени

В Среду Третьей седмицы по Пасхе

В сре́ду тре́тия неде́ли по Па́сце. Трипе́снец, его́же краегране́сие: Воста́ Спас.

Гла́с 2.

Пе́снь 3.

Ирмо́с: Процвела́ е́сть пусты́ня я́ко кри́н, Господи, язы́ческая неплодя́щая царковь, прише́ствием Твои́м, в не́йже утверди́ся мое́ се́рдце.

Тва́рь ви́девши Тя́ на Кресте́, стра́ждуща во́лею Господи, измени́ся и смуща́шеся, и ме́ртвии от гробо́в воста́ху.

Бы́вшу Ти́ во а́де Животода́вче Господи с душе́ю, я́ко ви́де всепа́губная сме́рть ужасе́ся, отреша́ющи ю́зники, я́же поже́рла.

Сла́ва: Испо́лнися тва́рь вся́ ра́дости, Ще́дрый Господи, из ме́ртвых воста́нием Твои́м, я́ко ми́р ве́сь совозста́вил еси́, низло́жь сме́ртное ца́рство.

И ны́не: богоро́дичен: Ору́жие ду́шу Твою́ про́йде Чи́стая Всенепоро́чная, егда́ Христа́ распина́ема ви́дела еси́: возра́довала же ся еси́, воста́вша из гро́ба сего́ узре́вши.

Пе́снь 8.

Ирмо́с: Пе́щь иногда́ о́гненная в вавило́не де́йства разделя́ше, Божиим веле́нием халде́и опаля́ющая, ве́рныя же ороша́ющая, пою́щыя: благослови́те вся́ дела́ Господня Господа.

Умира́еши на Кресте́, Живо́т сы́й все́х, и я́ко ме́ртв бездыха́нен во гро́бе положи́лся еси́ Долготерпели́ве, и Тридне́вен воста́л еси́ на воста́ние ми́ру. Те́мже Тя́ Животода́вче весе́лием сла́вим.

Услы́ша Сио́н воста́ние Господне, и весе́лия ны́не испо́лнися, дще́ри же сего проявле́нно возра́довашася, и ученико́м пропове́даху глаго́люще: не скорби́те, Животода́вец воста́л е́сть.

Сла́ва: Утру бы́вшу, со тща́нием жены́ на гро́б приидо́ша, и тре́петом прини́кше, в бе́лых оде́ждах ангелы ви́девше, и стра́хом одержи́мы, слы́шаху: не бо́йтеся, Жизнода́вец воста́л е́сть.

И ны́не, богоро́дичен: Тя́ све́тлый о́блак со́лнца у́мнаго, Богора́дованная, пою́ще сла́вим: сердца́ на́ша просвети́, тму́ отгоня́ющи всю́ уны́ния и страсте́й, Богоневе́сто.

Пе́снь 9.

Ирмо́с: Безнача́льна Роди́теля Сын, Бог и Господь, вопло́щся от Девы на́м яви́ся, омраче́нная просвети́ти. Собра́ти расточе́нная: те́м Всепе́тую Богородицу велича́ем.

Яко ви́де Тя́ со́лнце, Пра́веднаго Солнца на Кресте́ просте́рта, све́т скрыва́ше, ка́мение распада́шеся, а́д ме́ртвыя ско́ро отдава́ше, пою́щыя Держа́ву Твою́ Животода́вче Всеси́льне.

Адову несы́тую утро́бу, Пребоже́ственный пресла́вно истощи́в я́ко Всеси́лен, а́бие Воскре́с во сла́ве, и ученики́ боже́ственными ви́ден бы́сть. Тому́ поклони́мся со Отце́м же и Духом.

Сла́ва: Воста́ Господь, мироно́сицам глаго́лаше, явле́йся во гро́бе святы́й ангел: иди́те, и рцы́те Сего ученико́м, в Галиле́и пла́чущым и рыда́ющым, я́ко да Сего́ та́мо у́зрят.

И ны́не, богоро́дичен: Изба́витися Всенепоро́чная, от напа́стей и скорбе́й, и страсте́й бу́ри и омраче́ния, и многоплете́нных сете́й лука́ваго, моли́ непреста́нно Христа́ Бога на́шего, при́сно блажа́щым Тя́.