Приложение Триоди Цветной. Трипеснцы на Утрени
В Четверг Третьей седмицы по Пасхе
В четверто́к 3-я неде́ли по Па́сце.
Трипе́снец, его́же краегране́сие: Пе́снь пою́ Богу.
Гла́с 2.
Пе́снь 4.
Ирмо́с: Пою́ Тя, слу́хом бо Господи, услы́шах и ужасо́хся: до мене́ бо и́деши, мене́ ищя́ заблу́ждшаго. Те́м мно́гое Твое́ снизхожде́ние, е́же на мя́, прославля́ю Многоми́лостиве.
Возше́л еси́ на Крест во́лею, Господи, си́лою препоя́сан, и соше́д Благоутро́бне с душе́ю во а́д, ду́шы ве́чных у́з разреши́л еси́, и с собо́ю Ще́дре совоскреси́л еси́.
Сокруши́в стра́шно вереи́ и врата́ а́дова, кре́постию Твое́ю Владыко, истощи́л еси́ его бога́тство: те́мже мно́гое Твое́ снизхожде́ние, и честно́е Воскресе́ние сла́вим.
Сла́ва: Пома́зати Пречи́стое Те́ло Твое́, на гро́б приидо́ша жены́, обре́тша же ангела на ка́мени седя́ща Христе́, боя́щяся удиви́шася: с ни́ми же песносло́вим Твое́ воста́ние.
И ны́не, богоро́дичен: Святы́х Свята́го па́че ума́ родила́ еси́ Богородице, освяще́ние, избавле́ние, и оставле́ние грехо́в ве́рным подаю́ща, хода́тайством Твои́м, Его сла́вящым Воскресе́ние.
Пе́снь 8.
Ирмо́с: Веле́нию мучи́телеву преподо́бнии трие́ о́троцы не повину́вшеся, в пе́щь вве́ржени, Бога испове́даху пою́ще: благослови́те дела́ Господня Господа.
Возвы́сил еси́ естество́ челове́ческое Христе́, на Кресте́ Твои́м возвыше́нием, и с высоты́ па́дшаго врага́ в про́пасть низве́ргл еси́, и погребе́н воста́л еси́, плени́в сме́рть.
Сокруши́л еси́ а́довы вереи́ Христе́, и окова́нныя у́зники в му́жестве изве́л еси́, Твою́ сла́вящыя си́лу, и е́же из гро́ба тридне́вное воста́ние.
Сла́ва: Яко ви́де Тя́ дре́вле ли́к святы́х апостол, из гро́ба воста́вша во сла́ве Христе́, весе́лия испо́лнен бы́в вопия́ше: сла́ва воста́нию Твоему́.
И ны́не, богоро́дичен: Пла́чь Тво́й Пречи́стая Свята́я, преложи́ся на ра́дость, внегда́ ви́дела еси́ Твоего́ Сына и Владыку Христа́, из ме́ртвых тридне́вно Воскре́сша во сла́ве, и ми́р просвети́вша.
Пе́снь 9.
Ирмо́с: Яже пре́жде со́лнца свети́льника Бога возсия́вшаго, пло́тски к на́м прише́дшаго, из боку́ Деви́чу неизрече́нно воплоти́вшая, благослове́нная Всечи́стая, Тя́ Богородице велича́ем.
Яви́лся еси́ посреде́ двою́ разбо́йнику ра́спят, Многоми́лостиве, и положе́н в ро́ве преиспо́днем, и я́же во тме́ и се́ни сме́ртней воскреси́л еси́, песносло́вящыя Благоутро́бне, Твое́ тридне́вное Воскресе́ние.
Сме́рть не ктому́ челове́ки облада́ет, я́коже е́сть пи́сано, отне́леже Христо́с Воскре́се Безсме́ртный, а́дова истощи́в несы́тая ца́рствия: да ра́дуется вся́ вселе́нная пра́зднующи.
Сла́ва: Рече́ мироно́сицам ангел, блиста́яйся пред гро́бом: в ме́ртвых Свобо́днаго что́ пла́чуще и́щете; я́коже пре́жде рече́, уже́ воста́: иди́те отсю́ду ра́дующеся.
И ны́не, богоро́дичен: Яви́лася еси́ простра́ннее Дево небе́с, Бога вмести́вши, под земле́ю положе́наго благости ра́ди, и сме́ртию безсме́ртие все́м дарова́вша: Его́же благоче́стно сла́вяще, Тебе́ по до́лгу ублажа́ем.
