Приложение Триоди Цветной. Трипеснцы на Утрени

В понедельник Четвертой седмицы по Пасхе

В понеде́льник четве́ртыя неде́ли по Па́сце, трипе́снец, его́же краегране́сие: Воскре́се Спас.

Гла́с 3.

Пе́снь 1.

Ирмо́с: Пресека́емое мо́ре жезло́м, дре́вле Израиль про́йде я́ко по пусты́ни, и крестообра́зно я́ве предуготовля́ет стези́: сего ра́ди пои́м во хвале́нии чу́дному Богу на́шему, я́ко просла́вися.

Возше́д на высоту́, плене́ние во а́де содержи́мое, я́ко Кре́пкий прия́л еси́ Спасе, и совоскреси́л еси́ с собо́ю, тридне́вен из гро́ба воскре́с Человеколю́бче, я́ко Всеси́лен.

Умерщвле́нна дре́вле Тебе́ Спасе, и погребе́нна в но́вом гро́бе ви́дев а́д, ве́сь ме́ртв пребы́сть и безде́лен: ме́ртвии же вси́ Твои́м воста́нием живоно́сным, ра́дующеся, от у́з разреши́шася.

Сла́ва: В ме́ртвых Жива́го что́ и́щете; мироно́сицам рече́ у гро́ба светообра́зный ангел, иногда́ явля́яся: отше́дше ско́ро, апостолом возвести́ти потщи́теся Сего воста́ние.

И ны́не, богоро́дичен: Воплоще́нна Господа неизрече́нно из Пречи́стых крове́й Твои́х Богородице, и на́с ра́ди сме́рть пло́тию восприи́мша, Воскре́сша ви́девши из гро́ба, ра́достно сла́вящи велича́ла еси́.

Пе́снь 8.

Ирмо́с: Вавило́нская пе́щь о́троки не опали́, ниже́ Божества́ о́гнь Деву растли́. Те́м со о́троки ве́рнии возопие́м: благослови́те дела́ Господня Господа.

Распя́таго Господа дре́вле ви́девше, со́лнце сокры́ све́т, ка́мение распаде́ся, го́ры поколеба́шася, и земля́ потрепета́, и и́же дре́вле у́зницы от у́з разреша́хуся.

Внегда́ Тя ви́де а́д всесме́шный, Сло́ве Всеси́льне, я́ве к себе́ иду́ща, потрепета́, и все́х ме́ртвых отреша́ше, воспева́ющих держа́ву и благоутро́бие Твое́.

Сла́ва: Господь воста́, вси́ воскли́кнем, и рука́ми воспле́щим ве́рно, и ли́ки соста́вим, сего си́лу пропове́дающе, и вопию́ще: дела́ по́йте Господа, и превозноси́те Его́ во ве́ки.

И ны́не, богоро́дичен: Зачала́ еси́ Всенепоро́чная, вся́ содержа́щаго, и Того́ родила́ еси́ пло́тию, плени́вша сме́рть сме́ртию тридне́вною: Его́же умоли́, души́ моея́ стра́сти умертви́ти, и спасти́ мя.

Пе́снь 9.

Ирмо́с: Купино́ю и огне́м пропи́санную в Сина́и, законополо́жнику Моисе́ю, и Божий во чре́ве неопа́льно заче́ншую о́гнь, всесве́тлую и негаси́мую Свещу́, су́щую Богородицу пе́сньми чту́ще велича́ем.

Красне́йший Христе́, ка́ко Ти́ за́йде на Кресте́ добро́ты све́тлое; ка́ко терпи́т земля́ зря́щи Тя́ ви́сяща; ка́ко непра́ведное претерпе́ заколе́ние Твое́; пое́м мно́гое Твое́ и неизрече́нное Сло́ве соше́ствие.

Тридне́вным Твои́м погребе́нием плене́н бы́сть вра́г, и от а́довых у́з отреши́шася мертвецы́, умертви́ся сме́рть, истощи́шася ца́рства а́дова. Те́мже Тя́ Животода́вче, в пе́снех чту́ще велича́ем.

Сла́ва: Ве́чный Животе́, ка́ко вкуси́л еси́ на́с ра́ди сме́рти хотя́ Спасе; ка́ко сше́л еси́ в ме́ртвыя, все́х Воскресе́ние, и истощи́л еси́ а́дова сокро́вища; те́мже Тя́ благода́рственно в пе́снех чту́ще велича́ем.

И ны́не, богоро́дичен: Изба́ви гра́д и лю́ди прибега́ющыя к Тебе́, Богороди́тельнице Чи́стая, роди́вшая Христа́, от вся́каго сопроти́внаго гне́ва, и плене́ния, и язы́к нахожде́ния, я́ко да Тя́ по до́лгу в пе́снех велича́ем.