Приложение Триоди Цветной. Трипеснцы на Утрени

Во Вторник Четвертой седмицы по Пасхе

Во вто́рник четве́ртыя неде́ли по Па́сце, трипе́снец, его́же краегране́сие: Пе́ние Ио́сифово:

Гла́с 3.

Пе́снь 2.

Ирмо́с: Яко ту́ча на тро́скот, и я́коже и́ней на се́но, да сни́дут на зе́млю глаго́ли Мои́.

Псалмы́ воскли́кнем, воспле́щим рука́ми ве́село, из ме́ртвых Животода́вец воста́.

Возше́л еси́ Христе́ на Крест Тво́й, препоя́сався си́лою и Воскре́сл еси́ из ме́ртвых, я́коже предре́кл еси́.

Белооде́жден ангел ви́ден бы́сть жена́м вопия́й: воскре́се, сы́й Воскресе́ние ве́рных и Спасе́ние.

Сла́ва: Пома́зати Тя́ тща́щеся, идя́ху жены́ ко гро́бу: воскре́сша же ви́девше, покланя́хуся.

И ны́не, богоро́дичен: Яко зау́треннее Солнце, преднося́щи Дево на руку́ возсия́ла еси́ на́м во тме́ су́щым.

Пе́снь 8.

Ирмо́с: Ангелами немо́лчно в Вы́шних сла́вимаго Бога, небеса́ небе́с, земля́, и го́ры и хо́лми, и глубина́, и ве́сь ро́д челове́ческий, пе́сньми Того́ я́ко Созда́теля, и Изба́вителя благослови́те, и превозноси́те во вся́ ве́ки.

Собо́р законопресту́пный евре́йский на дре́ве Тебе́ распя́, дре́ва ра́ди челове́ком бы́вший вре́д, Владыко исцеля́юща боже́ственно. Те́мже Тя́ гла́сы ра́достными при́сно пое́м.

Ра́вен Отцу́ Христе́ и Духу Сы́й, Крест претерпе́л еси́, и вмени́вся в ме́ртвых, ца́рствия а́дова истощи́л еси́ пресла́вно, и воскре́с совоздви́гл еси́ с собо́ю всю́ тва́рь.

Сла́ва: Аде всея́дче, где́ жа́ло твое́; где́ твоя́ сме́рте побе́да; Воскре́сшим из ме́ртвых умертви́лся еси́, Спаси́телем Христо́м Еди́нем Жизнода́вцем. Его́же со Отце́м и Духом ве́рнии воспева́ем.

И ны́не, богоро́дичен: Да обожи́т челове́чество Бог, челове́к бы́сть из Тебе́ Всенепоро́чная Чи́стая. Его́же из гро́ба красне́йша ви́дела еси́ проше́дша, я́ко Победи́теля а́ду, и ра́дости испо́лнилася еси́.

Пе́снь 9.

Ирмо́с: На сина́йстей горе́ ви́де Тя́ в купине́ Моисе́й, неопа́льно о́гнь Божества́ заче́ншую во чре́ве. Дании́л же Тя́ ви́де го́ру несеко́мую: же́зл прозя́бший, Иса́иа взыва́ше, от ко́рене Давидова.

Яко Агнец к заколе́нию приведе́н бы́л еси́ Владыко во́лею Иисусе, не вопия́, ни зовы́й, я́коже пи́шет, сме́ртию Свое́ю Сло́ве на́с обезсме́ртив, песносло́вящих Твою́ Стра́сть Пречи́стую, и е́же из а́да стра́шное ожи́тие.

Сокруше́нных на́с обнови́л еси́, Иисусе все́х Царю́, Честны́м и Стра́шным Воскресе́нием Твои́м, ученико́м же ви́девся, ми́р Тво́й си́м пода́л еси́ Человеколю́бче. Его́же на́м да́руй песносло́вящым Твое́ Боже́ственное воста́ние.

Сла́ва: Честно́е мироно́сиц собра́ние, прии́де тща́нием ко свято́му Владыко, гро́бу Твоему́, е́же пома́зати Тя́ ве́рно: в бе́лых же ри́зах ви́деша седя́ща ангела, и те́м веща́юща: что́ с ме́ртвыми Жива́го зре́ти хо́щете;

И ны́не, богоро́дичен: Светода́вца родила́ еси́ и Господа, две́ри су́щи све́та, Его́же из гро́ба облиста́вша ви́девши, испо́лнилася еси́ ра́дости: но Того́ моли́ Дево, пла́чь мне́ дарова́ти ра́достный, хода́тайствен Чи́стая та́мошняго утеше́ния.