Приложение Триоди Цветной. Трипеснцы на Утрени

В Четверг Четвертой седмицы по Пасхе

В четверто́к 4-я неде́ли по Па́сце, трипе́снец, его́же краегране́сие: Хвала́ Господу. Гла́с 3

Пе́снь 4.

Ирмо́с: Приосене́нную го́ру Авваку́м прозря́ше Пречистую Твою́ утро́бу Чи́стая, те́м взыва́ше: от ю́га прии́дет Бог и Святы́й от горы́ приосене́нныя ча́щи.

Неизрече́нным соедине́нием уподо́бився челове́ком, Еди́н Пресу́щный, Крест Пло́тию претерпе́в, и вмени́вся в ме́ртвых, тридне́вно воскре́сл еси́ Жи́знь все́х.

Иисусе Боже на́ш, Вода́ Жи́зни Сы́й, ше́ствуеши тружда́яся в пло́ти ко исто́чнику, соседя́ же и самаряны́не жене́, прему́дрости Твоея́ во́ду та́йно пролива́еши.

Сла́ва: Неду́гов разли́чных приходя́щих к Тебе́ Сло́ве, очища́я повеле́нием Твои́м, Крест во́лею претерпе́л еси́ во гро́бе положи́вся, воскреси́л еси́ естество́ челове́ческое истле́вшее.

И ны́не, богоро́дичен: На Тя́ Прему́дрость Отца́ Безнача́льнаго сни́де, я́ко до́ждь на руно́ Чи́стая, и вопло́щши кроме́ преложе́ния, пути́ жи́зни показа́ла еси́ на́м ве́дущым Тя́ Деву по рождестве́ и Матерь.

Пе́снь 8.

Ирмо́с: В пла́мень ко отроко́м евре́йским снизше́дшаго, Божиею Си́лою, и я́вльшагося Господа, свяще́нницы благослови́те, и превозноси́те во вся́ ве́ки.

Ты́ на Кресте́ возне́сся, челове́ческое все́ естество́ совозне́сл еси́ Сло́ве, и положи́вся во гро́бе, во гробе́х спя́щыя воздви́гл еси́ Боже́ственным воста́нием Твои́м Ще́дре.

Иерихо́н и Сали́м бли́жняя с вода́ми мно́гими преше́д, к студенцу́ Иа́ковлю прии́де, исто́чник прему́дрости, во́ду спасе́ния самаряны́не дая́.

Сла́ва: Ты́ слепца́ просвети́вый сло́вом, и разсла́бленных повеле́нием Твои́м стягну́вый, и ме́ртв тридне́вно возсия́вый из гро́ба, умерщвле́нную воскреси́ ду́шу мою́.

И ны́не, богоро́дичен: Ми́рови всему́ Богородице Мари́е Ты́ еси́ прибе́жище, мирски́х мя́ собла́зн и страсте́й теле́сных, и ве́чнующия изба́ви гее́нны, я́ко да песносло́влю Тя́.

Пе́снь 9.

Ирмо́с: Тебе́ неопали́мую купину́, и Святу́ю Деву, Матерь Све́та и Богородицу, наде́жду все́х на́с, велича́ем.

Просте́рл еси́ дла́ни на дре́ве, зле́ просте́ртых пра́отца ру́к, к дре́ва сне́ди, потребля́я вре́д, Христе́ Многоми́лостиве.

Глаго́лом разсла́бленнаго стягну́вый, и хромы́я испра́вивый, распя́лся еси́, Иисусе, и воскре́сл еси́, ученико́м на мно́гия дни́ явля́яся.

Сла́ва: Ви́де самаряны́ня жена́ Тебе́, прише́дши почерпсти́, и во́ду жи́зни от Тебе́ прии́мши, насы́тися, Христе́ Боже, воспева́ющи Тя́.

И ны́не, богоро́дичен: О па́че ума́, Твои́х чуде́с Пречи́стая Дево, Ты́ бо родила́ еси́ Бога воплоще́нна, Боже́ственным воста́нием Свои́м все́х спа́сшаго.