Приложение Триоди Цветной. Трипеснцы на Утрени
В Субботу Пятой седмицы по Пасхе
В суббо́ту пя́тыя неде́ли по Па́сце, четверопе́снец. его́же краестро́чие: Пою́ пе́ние четве́ртое.
Гла́с 4.
Пе́снь 6.
Ирмо́с: Пожру́ Ти со гла́сом хвале́ния Господи, Церковь вопие́т Ти́, от бесо́вския кро́ве очи́щшися, ра́ди ми́лости от ре́бр Твои́х исте́кшею кро́вию.
Просте́р на Кресте́ Пречи́стеи дла́ни Твои́, мы́сленнаго распя́л еси́ амали́ка Боже́ственною Си́лою Твое́ю, и ми́р изба́вил еси́ от рабо́ты, Христе́ Боже на́ш.
Сокруши́вый стра́шным сни́тием а́д, Христе́, и я́же держа́ше ю́зники Боже́ственною восхи́тив Си́лою, воскре́сл еси́ я́ко Бог из гро́ба тридне́вно.
Сла́ва: Яко приидо́ша ко гро́бу жены́, пома́зати Тя́ безце́нное ми́ро, к ни́м ангел вопия́ше: не пла́чите, Его́же и́щете, воста́ Господь.
И ны́не, богоро́дичен: Не ктому́ Богома́ти Дево рыда́й, Сын бо Тво́й воскре́се, я́ко Бог, тридне́вно из гро́ба: но ра́дуйся, и моли́ Его́ спасти́ся на́м.
Пе́снь 7.
Ирмо́с: Спасы́й во огни́ авраа́мския Твоя́ о́троки и халде́и уби́в, я́же пра́вда пра́ведно уловля́ше, препе́тый Господи Боже Отец на́ших, благослове́н еси́.
На ло́бнем на́с ра́ди, посреде́ разбо́йнику пове́шен бы́в на Кресте́, и вла́сти тмы́ на се́м упраздни́л еси́ Всеси́льне Господи, Боже Отец на́ших, благослове́н еси́.
Копие́м в ре́бра прободе́н, источи́л еси́ на́м Животода́вче, от исто́чника приснотеку́щаго Твоея́ Боже́ственныя Кро́ве Христе́, зову́щым: Препе́тый Господи Боже Отце́в, благослове́н еси́.
Сла́ва: Блиста́яйся оде́ждою ангел, рыда́ющым вопия́ше жена́м: что́ я́ко ме́ртва со благоуха́ньми и́щете, иму́щаго животу́ вла́сть Христа́; воскре́се я́ко же рече́ и пре́жде стра́сти.
И ны́не, богоро́дичен: Пло́ть прия́т из Тебе́ Чи́стая, содержа́й тва́рь всю́, и земли́ концы́, и умре́ти на́с ра́ди изво́ли: Его́же зря́щи воскре́сша со сла́вою от гро́ба, возвесели́ся.
Пе́снь 8.
Ирмо́с: Ру́це распросте́р Дании́л, льво́в зия́ния в ро́ве затче́, о́гненную же си́лу угаси́ша, доброде́телию препоя́савшеся, благоче́стия рачи́тели о́троцы, взыва́юще: благослови́те вся́ дела́ Господня Господа.
Язвою Владыко Твое́ю все́ исцели́л еси́ челове́чество Спасе, претерпе́в же сме́рть, сие́ от тле́ния свободи́л еси́ Твое́ю сме́ртию Блаже, и на́с обезсме́ртил еси́ вопию́щих: вся́ дела́ Господня Господа по́йте, и превозноси́те его́ во ве́ки.
Весели́теся вси́ лю́дие, земна́я вся́ ра́дуйтеся ны́не и небесная: Жизнода́вец бо Господь воскре́се от гро́ба, совоскреси́в на́ше естество́, зову́щее: благослови́те вся́ дела́ Господня Господа, по́йте и превозноси́те Его́ во ве́ки.
Сла́ва: Мучи́теля связа́в Христе́ сни́тием Твои́м, положи́вся во гро́бе, мертвецы́ воздви́гл еси́ вся́, благода́рно воспева́ющыя Тя́, Благоде́теля все́х и Вседержи́теля: благослови́те вся́ дела́ Господня Господа, по́йте и превозноси́те Его́ во ве́ки.
И ны́не, богоро́дичен: Ада́ма па́дшаго во Еде́ме, разреши́ти смеше́ние Чистая хотя́, Всеси́льный Господь воплоти́ся из Тебе́ Пречистая, распя́тся же и погребе́ся: воскре́се спаса́яй на́с, любо́вию Тебе́ воспева́ющих, Мари́е Богоневе́сто.
Пе́снь 9.
Ирмо́с: Ева у́бо неду́гом преслуша́ния кля́тву всели́ла е́сть: ты́ же Дево Богородице, прозябе́нием чревоноше́ния ми́рови благослове́ние процвела́ еси́: те́м Тя́ вси́ велича́ем.
Раздра́ся Твои́м е́же на Крест, Долготерпели́ве, воздви́жением заве́са, и со́лнце сокры́ лучы́, разседа́емо же ка́мение, показа́ше непра́ведное заколе́ние, е́же претерпе́л еси́ Спасе во́лею за ро́д челове́ческий.
Прободе́н копие́м Иисусе Человеколю́бче на Дре́ве, исцели́л еси́ уязви́вшагося преступле́нием Ада́ма, в раи́ Долготерпели́ве: положе́н же в ме́ртвых, я́ко безсме́ртен вся́ изве́л еси́ воспева́ющыя Тя́.
Сла́ва: Вся́ дла́нию содержа́й, и ма́нием стро́яй подсо́лнечную, ка́ко в ме́ртвых вмени́лся еси́ безсме́ртен сы́й, хотя́ изба́вити уя́звенныя угрызе́нием змии́ным; Тебе́ воспева́ем я́ко Человеколю́бца.
И ны́не, богоро́дичен: Ме́ртва и на́га Твоего́ Сына, ви́сяща на Дре́ве зря́щи, боле́ла еси́: а́бие же сего́ воскре́сша тридне́вно ви́дящи, весели́лася еси́ Всенепоро́чная я́ко Ма́ти, моли́ся о ве́рою почита́ющих Тя́.
