Приложение Триоди Цветной. Трипеснцы на Утрени
В понедельник Шестой седмицы по Пасхе
В понеде́льник шесты́я неде́ли по Па́сце, трипе́снец, его́же краегране́сие: Сла́ва Богу подоба́ет.
Гла́с 5.
Пе́снь 1.
Ирмо́с: Пои́м Господеви, сотво́ршему ди́вная чудеса́ в чермне́м мо́ри, пе́снь побе́дную: я́ко просла́вися.
Твои́м Честны́м кресто́м Господи, дре́вния кля́твы вси́ изба́вихомся: те́мже Твою́ сла́вим Благость.
Распны́йся во́лею воста́, сокро́вища вся́ плени́ сме́рти, Христо́с Спас на́ш: Того́ прославля́ем.
Сла́ва: Стра́нен зра́к ви́девше блиста́ющ мироно́сицы ангела, Боже́ственное мня́ху Зижди́теля Воскресе́ние, ра́дости исполня́ющеся.
И ны́не, богоро́дичен: Восто́к Дево Пречи́стая была́ еси́ Солнца Пра́вды, и́мже неразу́мия тмы́ изба́вихомся.
Пе́снь 8.
Ирмо́с: Творца́ тва́ри, Его́же ужаса́ются ангели, по́йте лю́дие, и превозноси́те во вся́ ве́ки.
Бога Пло́тию распина́ема со́лнце ви́девше помрачи́ся, и земля́ поколеба́ся, и ка́мение распаде́ся.
Из ме́ртвых тридне́вен Христо́с воста́, и совозста́ви вся́, во тме́ и се́ни сме́ртней седя́щыя.
Яви́лся еси́ по воста́нии Твое́м апо́столом, и испо́лнил еси́ си́х весе́лия неизглаго́ланнаго Ще́дре.
Сла́ва: Отца́ Пресвята́го, Сло́ва Соприсносу́щна, и Духа Божия несозда́нна, Троицу пое́м непреста́нно.
И ны́не, богоро́дичен: Изба́ви на́с му́ки, и ве́чнаго осужде́ния, Тебе́ воспева́ющих, Богороди́тельнице Чи́стая.
Пе́снь 9.
Ирмо́с: Тя́ Блаже́нную в жена́х, и Благослове́нную Богом, челове́ческий ро́д пе́сньми велича́ем.
Просте́рл еси́ дла́ни на Кресте́, просте́ртаго мя́ мно́гими кова́рствы льсти́ваго, Ще́дре, приобрета́я.
Вся́ совоскреси́л еси́ бБаже, соше́д во а́дская врата́ Христе́, и совоздви́гл еси́ пою́щыя Человеколю́бче Твою́ Си́лу.
Сла́ва: Источи́л еси́ Христе́ ме́ртвым Живо́т, и воскре́с тридне́вен, возне́слся еси́ во сла́ве, зря́щым честны́м ученико́м.
И ны́не, богоро́дичен: Ми́лостива на́м соде́лай Пречистая Дево, Твоего́ Сына и Бога все́х, ве́рою воспева́ющым Тя́.