Приложение Триоди Цветной. Трипеснцы на Утрени
Во Вторник Шестой седмицы по Пасхе
Во вто́рник шесты́я неде́ли по Па́сце, трипе́снец, гла́с 5. Творе́ние ио́сифово, его́же краестро́чие: Песнопе́ние сие́ Ио́сифово.
Пе́снь 2.
Ирмо́с: Ви́дите, ви́дите, я́ко Аз е́смь Бог, в пло́ть облеки́йся во́лею Свое́ю, да спасу́ Ада́ма от ле́сти па́дшаго в преступле́ние зми́ем.
Якоже воздви́же дре́вле зми́а Моисе́й, та́ко на дре́во воздви́глся еси́ Ще́дре, льсти́ваго врага́ я́д змии́н и зло́бу отгоня́я, и спаса́я на́с.
Сла́ва Сла́ве Твое́й препросла́вленне Иисусе, положи́в бо Ся во гро́бе я́ко ме́ртв во́лею, воскре́сл еси́ я́ко Бог, и совоздви́гл еси́ ми́р Твои́м воста́нием, я́ко Всеси́лен.
Сла́ва: Се́ воста́ Животода́вец из ме́ртвых, вопия́ше жена́м дре́вле ангел блиста́яйся: не пла́читеся у́бо про́чее, но апостолом сие́ воста́ние возвести́те.
И ны́не, богоро́дичен: Святы́й Господи, от Девы Чистыя рожде́йся, распе́нся же и во́лею погребе́н, и воскресы́й из ме́ртвых, Тоя́ мольба́ми Твою́ Милость все́м низпосли́.
Пе́снь 8.
Ирмо́с: Творца́ тва́ри, Его́же ужаса́ются ангели, по́йте лю́дие, и превозноси́те во вся́ ве́ки.
Песносло́вим Твое́ Христе́, тридне́вное погребе́ние, и пресве́тлое Воскресе́ние, ве́рою при́сно восхваля́ем.
Распе́ншагося на́с ра́ди, и положи́вшагося во гро́бе, и Свои́м воста́нием просвети́вшаго ми́р, Христа́ славосло́вим.
Сла́ва: Со́лнце незаходи́мое Христе́, погребы́йся и воскресы́й из ме́ртвых, просвети́ все́х на́с помышле́ния, сла́вити Тя́ непреста́нно.
И ны́не, богоро́дичен: Мольбу́ из тебе́ воплоти́вшемуся Сло́ву, сотвори́ Богородице Дево, я́ко да на́с уще́дрит смире́нных.
Пе́снь 9.
Ирмо́с: Велича́ем Христе́, Твою́ Всенепоро́чную Матерь Чистую, я́ко роди́ Тя преесте́ственно пло́тию, от вся́кия льсти́ и тли́ на́с избавля́яй.
Яко а́гнец на заколе́ние приведе́ся Владыко Христе́ Боже, и я́звами Твои́ми, я́же во́лею претерпе́л еси́, бесо́в вся́кое лука́вое мно́жество уязви́л еси́.
Сокруши́шася вереи́ а́довы прише́ствием Твои́м Христе́, и воста́ша от ве́ка истле́вшии, воспева́юще Тя́ я́ко победи́теля, и все́ми владу́щаго.
Сла́ва: Свято́е Твое́ Христе́, е́же из гро́ба воста́ние, Живо́т е́сть, вознесе́ние же при́сно и весе́лие, е́же ве́рою вси́ мы́ ны́не предпра́зднуем.
И ны́не, богоро́дичен: Све́т на́м и́же от Све́та Дево Пречи́стая ро́ждши, разори́ла еси́ безбо́жия тму́: те́мже вси́ земноро́днии ве́рою Тя́ велича́ем.
