Приложение Триоди Цветной. Трипеснцы на Утрени

В Пятницу Шестой седмицы по Пасхе

В пято́к шесты́я неде́ли по Па́сце, трипе́снец, гла́с 1.

Пе́снь 5.

Ирмо́с: Нечести́вии не у́зрят сла́вы Твоея́ Христе́, но мы́ Тя Единоро́дне, Отеческия сла́вы сия́ние Божества́, от но́щи у́тренююще воспева́ем Тя́, Человеколю́бче.

Восходя́ от земли́ к Небеси́, не отлуче́н бы́л еси́ Отца́, и соседя́ Владыко и Духу, Его́же ученико́м посла́л еси́ с Небесе́ Уте́шителя.

Безпло́тных чи́ни, я́ко ви́деша Тебе́ Иисусе с Пло́тию на Небеса́ возше́дша, ра́дующеся дивля́хуся мно́гому Твоему́ Господи, к челове́ком снизхожде́нию.

Сла́ва: Истле́вшее Владыко существо́ на́ше, на престо́ле Отечесте посади́л и удобри́л еси́ Господи, с Ни́мже и́маши приити́ суди́ти ми́ру Всеси́льне.

И ны́не, богоро́дичен: Чи́стую и Пречи́стую почти́м мы́сленно, добро́ту Иа́ковлю, и Боже́ственными де́тельми удобря́ему благоче́стно пои́м, я́ко Ма́терь Бога на́шего.

Пе́снь 8.

Ирмо́с: Изба́вителю все́х Всеси́льне, посреде́ пла́мене благоче́ствовавшыя снизше́д ороси́л еси́, и научи́л еси́ пе́ти: вся́ дела́ благослови́те, по́йте Господа.

На херуви́мску ра́му носи́мь, возне́слся еси́ во сла́ве, зря́щым Тя́ ученико́м Твои́м Господи, и вопию́щым непреста́нно: вся́ дела́ Господня Господа по́йте, и превозноси́те Его́ во ве́ки.

Низложи́в вражду́ средосте́ния, уме́ршыя Отцу́ Твоему́ примири́л еси́, и возше́д соприве́л еси́, ю́же прия́л еси́ Пло́ть Безнача́льне Сло́ве превы́ше Нача́л и Си́л.

Сла́ва: Благословля́я ученики́ возноша́лся еси́ на высоту́ Христе́, Уте́шителя си́м посла́в, пою́щым и единому́дренно вопию́щым: вся́ дела́ Господня Господа по́йте, и превозноси́те Его́ во ве́ки.

И ны́не, богоро́дичен: Общее ве́рных очисти́лище, гото́вую челове́ком по́мощь, и к зижди́телю мо́ст, преводя́щий все́х ко спасе́нию, Божию Матерь сла́вим.

Пе́снь 9.

Ирмо́с: Ева у́бо неду́гом преслуша́ния кля́тву всели́ла е́сть, Ты́ же Дево Богородице, прозябе́нием чревоноше́ния, ми́рови благослове́ние процвела́ еси́: те́м Тя́ вси́ велича́ем.

От горы́ Христе́ Елео́нския, о́блак Тебе́ я́коже престо́л прия́т, все́м боже́ственным Твои́м ученико́м зря́щым, и с тре́петом вопию́щым Ти́: не оста́ви си́ры, и́хже возлюби́л еси́ за милосе́рдие несказа́нное.

Соше́л еси́ пе́рвее без пло́ти, возше́л же еси́ Пло́ть нося́, ю́же прия́л еси́: стра́хом же врата́ небесная Тебе́ отверзо́шася, и у́ми небеснии зря́ще дивля́хуся, глаго́люще: сла́ва е́же на́с ра́ди Твоему́ Владыко соше́ствию.

Сла́ва: Что́ стоите́ вы́, зря́ще возше́ствие стра́шное; дре́вле реко́ша ангели боже́ственным апостолом: и́мже о́бразом ви́дите восходя́ща, па́ки на зе́млю прии́дет суди́ти все́х, со сла́вою неизрече́нною.

И ны́не, богоро́дичен: Сопрису́тствующи боже́ственным ученико́м Пречистая, и зря́щи, Его́же родила́ еси́, от земли́ возноси́ма, вопия́ла еси́: восхо́диши к Безнача́льному Отцу́, сла́вою Твое́ю исполня́яй вся́ческая, препросла́вленный Еди́не Господи.