Приложение Триоди Цветной. Трипеснцы на Утрени

В Среду Восьмой седмицы по Пасхе

В сре́ду пятдеся́тныя неде́ли, трипе́снец. Гла́с 3.

Пе́снь 3.

Ирмо́с: Утверже́ние на Тя́ наде́ющихся, утверди́ Господи Церковь, ю́же стяжа́л еси́ Честно́ю Твое́ю Кро́вию.

Утверди́вый небесныя си́лы, показа́ дне́сь апостолы небеса́, Дух Уте́шительный.

Единосу́щну, Равноси́льну же Духу Сопресто́льну, и Сообра́зну Отцу́ и Сло́ву, покланя́ющеся благоче́стно велича́ем.

Сла́ва: Нескве́рнаго Чисте́йшаго Духа, Уте́шителя Пречи́стаго богосло́вим, владе́юща все́ю тва́рию.

И ны́не, богоро́дичен: Хра́м святы́й, и ковче́г, и све́щник, Всепречи́стая, была́ еси́ незаходи́маго Све́та, су́щым во тме́ Христа́ возсия́вша.

Пе́снь 8.

Ирмо́с: Нестерпи́мому огню́ соедини́вшеся, богоче́стия предстоя́ще ю́ноши, пла́менем же неврежде́ни божественную пе́снь поя́ху: благослови́те вся́ дела́ Господня Господа, и превозноси́те во вся́ ве́ки.

Еди́ному в Трие́х Ли́цех, несеко́му, Боже́ственному Существу́ покланя́емся, Единонача́лие и Царство богому́дренно пою́ще: благослови́те вся́ дела́ Господня Господа.

Живонача́льный и Божественный Дух, соверши́тельный же в Троице позна́вше, трисвяты́ми хвалослове́ньми правосла́вно пое́м: благослови́те вся́ дела́ Господня Господа.

Сла́ва: Дух у́мный, Дух Божественный владычествуяй, всебога́тно раздава́яй даро́в де́йства, в ве́ре пою́щым: благослови́те вся́ дела́ Господня Господа.

И ны́не, богоро́дичен: Иа́ковлю добро́ту, Тебе́ боголе́пнейшую, Богома́ти Пречистая, кра́сный па́че все́х, избра́ Бог Сло́во, Его́же пое́м: благослови́те вся́ дела́ Господня Господа.

Пе́снь 9.

Ирмо́с: В зако́не се́ни и писа́ний, о́браз ви́дим ве́рнии: вся́к му́жеский по́л ложесна́ разверза́я, свят Богу те́м перворожде́нное Сло́во, Отца́ Безнача́льна, Сына Первородя́щася Материю неискусому́жно, велича́ем.

Многоче́стный, и Благодви́жимый Дух богосло́вим, дре́вле во проро́цех предвозвести́вший ны́нешнее просвеще́ние, и всебога́тное излия́ние благи́х даро́в, разделя́емое ученико́м Сло́ва и свиде́телем.

Богонача́льнаго, невре́днаго Духа славосло́вим, все́м источа́ющаго и деля́щаго боже́ственныя да́ры, Духа, Уте́шителя друга́го, из Безнача́льна Отца́ исходя́ща, и Сыну Собезнача́льному сразумева́ема.

Сла́ва: Благоде́тельна и бога́та Духа хвалосло́вим, все́х освяща́ющаго, и просвеща́ющаго све́том разу́мным, всеси́льную держа́ву всепосети́тельную, счиня́емую Отцу́, и Сыну спрославля́емую.

И ны́не, богоро́дичен: Зако́на се́нь мимотече́, и просвеще́ние возсия́ во тме́ седя́щым, из Тебе́ Дево воплоти́выйся, за мно́гое благоутро́бие, из Безнача́льна Отца́ роди́выйся пре́жде ве́к, ро́ждшему Единосу́щен.