Приложение Триоди Цветной. Трипеснцы на Утрени
В Четверг Восьмой седмицы по Пасхе
В четверто́к пятдеся́тныя неде́ли, трипе́снец. Гла́с 4.
Пе́снь 4.
Ирмо́с: Седя́й в сла́ве на Престо́ле Божества́, во о́блаце ле́гце прии́де Иисус Пребоже́ственный, нетле́нною дла́нию, и спасе́ зову́щыя: сла́ва Христе́ си́ле Твое́й.
Истиннаго обетова́ния предузаконе́ние испо́лнися, светоно́сная благода́ть Пятдеся́тницею прии́де, Уте́шителева сла́ва яви́ся зову́щым: сла́ва Христе́ си́ле Твое́й.
Непостижи́мь е́сть Дух Всесвяты́й, прехо́дит вся́к у́м и смы́сла ско́рость, я́ко веко́в все́х дре́внейший, я́ко Отцу́ и Единоро́дному Сыну счиня́емь.
Сла́ва: Неначина́емь е́же бы́ти, и непрестава́ем по́слежде, но при́сно Сы́й пучи́на бога́тства неизме́римая, Всеси́льный Дух Присносу́щный, Отцу́ и Единоро́дному Сыну спрославля́ется.
И ны́не, богоро́дичен: Осени́ на Тя́ Дух Всесвяты́й, Всесвята́я Отрокови́це, Тебе́ боголе́пное пребыва́лище воплоще́нию Сына соде́ловая красно́, небес вы́шшую.
Пе́снь 8.
Ирмо́с: Изба́вителю все́х Всеси́льне, посреде́ пла́мене благоче́ствовавшыя снизше́д ороси́л еси́, и научи́л еси́ пе́ти: вся́ дела́ благослови́те, по́йте Господа.
Печа́ли мглу́ разсы́пли Преблаги́й, Уте́шительством Твои́м, благоче́стно пою́щих Тя́, и ве́рно вопию́щих: благослови́те дела́ Господня Господа.
Хоте́нием Твои́м дарова́ния раздава́яй, и́мже хо́щеши Уте́шителю, Тебе́ Бога зна́ющым, Твою́ благода́ть пода́ждь ве́рою вопию́щым: благослови́те вся́ дела́ Господня Господа.
Сла́ва: Яко Бог Истинный, Уте́шитель покланя́ем е́сть ве́рно, и служи́м благоче́стно сла́вящими, и вопию́щими непреста́нно: благослови́те вся́ дела́ Господня Господа.
И ны́не, богоро́дичен: Бога воплоще́нна роди́вшая, страсте́й мои́х утоли́ мяте́ж, и ду́шу мою́ просвети́, сподо́бивши пе́ти: благослови́те вся́ дела́ Господня Господа.
Пе́снь 9.
Ирмо́с: Ева у́бо неду́гом преслуша́ния кля́тву всели́ла е́сть, Ты́ же Дево Богородице, прозябе́нием чревоноше́ния, ми́рови благослове́ние процвела́ еси́: те́м Тя́ вси́ велича́ем.
Духа Божественный да́р излия́ся на вся́кую ве́ровавшую пло́ть, я́коже дре́вле проро́к зри́тельне ра́дуяся предвозвести́: мы́ же предрече́нных ны́не сбытие́ зря́ще, просвеща́емся.
Твоя́ богогла́сныя ученики́ испо́лнил еси́, Спасе, Всесвята́го Духа, ми́рови же си́х, я́ко лучи́, све́т благоче́стия освеща́ющыя посла́л еси́, я́ко Владыка и Господь. Те́мже Тя́ вси́ велича́ем.
Сла́ва: Огнь духо́вный, очисти́лище ученико́в ороси́ сердца́: паля́щая роса́ с небесе́, Сло́ва самови́дцы просвети́, ми́рови богоразу́мие блиста́ющее Троичное посла́вши.
И ны́не, богоро́дичен: От Свята́го Духа Чи́стая зачала́ еси́, безле́тно возсия́вшаго Сло́ва из Нерожде́нна Отца́, и сего́ воплоти́вшася родила́ еси́, ра́ди кра́йняго человеколю́бия и благости, Богороди́тельнице Мати Дево.
