АКАФИСТ всем святым, в земле Российстей просиявшим

Кондак 1

      Избраннии от Бога святии угодницы, в земли Российстей просиявшии и Церковь нашу яко звезды светлыя украсившии, верою сошедшеся днесь восхваляем пречестную память вашу. Вы же, яко имущии дерзновение ко Спасу, от всяких бед нас свободите зовущих:
     Радуйтеся, святии вси в земли Российстей просиявшии.

Икос 1

      Ангелов и человеков Творче и Царю, отверзи ныне грешная уста достойно воспети вся святыя Твоя, благодатию Твоею в земли Российстей просиявшыя и Тебе Бога нашего, благочестием своим прославившыя, да с любовию зовем им таковая:
     Радуйтеся, священномученицы седмочисленнии, кровьми вашими в Херсонесе Тавричестем Церковь Христову утвердившии, от неяже и мы освящение прияхом.
     Радуйтеся, Иоанне с юным Феодором первомученицы Российстии, прежде просвещения страны нашея за Христа страдавшии.
     Радуйся, Ольго равноапостольная, тму язычества светом Христовым озарившая.
     Радуйся, равноапостольный Владимире, земли Российския славный крестителю.
     Радуйся, Михаиле, Церкве Русския первосвятителю и православнаго благочестия и чина в земли нашей насадителю.
     Радуйтеся, Антоние и Феодосие преподобнии, святыя лавры Киево-Печерския устроителие и жития иноческаго в земли нашей основателие.
     Радуйтеся, святии вси в земли Российстей просиявшии.

Кондак 2

      Видев Господь скорби и утеснения малаго словеснаго стада Своего, в земли нашей от идольскаго злочестия озлобляема, крепкую помощь Свою дарова: да посрамивше прелъщение вражие, в вере Христовой утвердится и непрестанно поет Ему: Аллилуиа.

Икос 2

      Разум разумных века сего отвергая и объюродевшую премудрость премудрых погубляя, приял еси, Господи, якоже плод красный от новаго вертограда Твоего, вся святыя, в ней просиявшыя. Ихже делания ныне восхваляюще, ублажаем их тако:
     Радуйтеся, Борисе и Глебе, страстотерпцы святии, в жертву чисту себе Богови принесшии.
     Радуйтеся, Леонтие священномучениче, страны Ростовския просветителю, и Исаие, Игнатие, Феодоре и Иакове, града Ростовскаго святителие.
     Радуйся, Кукше, Вятския земли благовестниче и священномучениче.
     Радуйтеся, Никито и Иоанне, знамению Богоматере послуживии и прочии святителие Новаграда Великаго.
     Радуйся, Кирилле, святителю Туровский, словесе Божия изрядный проповедниче.
     Радуйся, Ефреме преподобне, града Торжка просветителю, со Аркадием и Улианиею девою.
     Радуйтеся, святии вси в земли Российстей просиявшии.

Кондак 3

      Сила Вышняго в немощех человеческих совершающаяся, укрепляше вас, святии угодницы Божии, в земли нашей тому многообразне послужившии, Емуже купно с вами поем: Аллилуиа.

Икос 3

      Имуще облежащъ нас толик облак сведетелей, все множество святых в земли нашей просиявших, торжествуем радостно и духовно веселимся приносяще им хвалебное пение сие:
     Радуйся, Симоне, Владимирския и Суздальския страны святителю и храмов Божиих усердный здателю.
     Радуйтеся, Иоанне и Феодоре, с преподобным Дионисием, Евфимием и Евфросиниею, Суздаля звезды пресветлыя.
     Радуйтеся, Муромския страны просветителю Константине, со чады твоими Михаилом и Феодором.
     Радуйтеся, Петре и Февроние, Муромскии чудотворцы, со Иулианиею праведною и милостивою.
     Радуйся, Василие святителю, в Муроме поношение ложное приемый и в Рязань преестественно преплывый.
     Радуйтеся, Никито столпниче и Данииле мертвых погребателю, Переяславль-Залесскому украшение.
     Радуйтеся, святии вси в земли Российстей просиявшии.

Кондак 4

      Буря нечестия идолобожного, аще и восставаше в земли нашей на Церковь Христову православную, обаче потопити ю не возможе: доселе бо стоит в чине своем, победно поющи Богу: Аллилуиа.

Икос 4

      Слышаша святии сладчайший глас Христов, ко спасению призывающий, и того иго благое чрез все житие свое понесше: ныне покой безболезненный и вечный в райских обителех обретоша. Сего ради слышат от нас таковая:
     Радуйтеся, Несторе, достопамятных деяний списателю, Иоанне многострадальный, Алипие, святых икон живописателю и весь безчисленный лик прочих преподобных Печерских от Господа прославленных.
     Радуйся, Иове, лавры Почаевския украшение, со всеми угодники и чудотворцы Волынскими.
     Радуйся, Евфросиние, граду Полоцку радование и девам сияние.
     Радуйтеся, преподобне Авраамие и мучениче Меркурие, Смоленстии чудотворцы.
     Радуйтеся, Антоние, Иоанне и Евстафие, Литовстии мученицы, огню служити отвергшиися и страданьми своими многия люди ко Христу приведшии.
     Радуйся, Исидоре пресвитере, со всем собором мученик в Юрьеве граде Литовстем, от латин за веру пострадавшии.
     Радуйтеся, святии вси в земли Российстей просиявшии.

Кондак 5

      Боготечныя звезды землю нашу благодатно озаряющыя, восхваляем вас, угодницы Божии: овии во святительстве, друзии во иночестве, инии во юродстве Христа ради подвизавшиися: вси же преподобием и правдою Богу послужившии, Емуже согласно поем: Аллилуиа.

Икос 5

      Видевше просиявших в земли Российстей святых Божиих неослабное терпение в сем веце и неизреченную радость на небесех, сами себе и друг друга к подражанию тех поощряти потщимся, зовуще им:
     Радуйся, Сергий Радонежский чудотворче, основателю Свято-Троицкия обители, иноков первоначальниче и за всю землю нашу теплый молитвенниче.
     Радуйтеся, Сергие и Германе Валаамстии и Арсение Коневский, монахов наставницы и иноверных просветителие.
     Радуйся, Антоние, от ветхаго Рима, земли твоея, в Новград Великий на камени преплывый и зде образ иноческаго жития явивый.
     Радуйся, Варлааме, Хутынский чудотворче, Новаграда похвало и всея страны нашея светильниче.
     Радуйтеся, Зосимо, Савватие и Германе, звезды иночества пресветлыя, со всеми преподобными Соловецкими.
     Радуйся, и сия Фиваида русская: пустыни и дебри Олонецкия, Белоезерския и Вологодския, святых и славных преподобных отцев множество возрастившыя.
     Радуйтеся, святии вси в земли Российстей просиявшии.

Кондак 6

      Проповедницы веры Христовы и благочестия христианскаго бысте святии на земли: темже ныне на небесех с веселием предстояще Христу велегласно поете Ему: Аллилуиа.

Икос 6

      Возсияли есте нам святии, украшеннии обильно многоразличными дары, имиже венча вас Подвигоположник Христос. Прибегающе бо к вам не всуе труждаемся: Божию благодать и милость улучаем молитвами вашими. Сего ради вопием вам:
     Радуйтеся, честнии страдальцы Черниговстии Михаиле и Феодоре, велению мучителеву не повинувшиися и Единому Богу точию поклонятися изволившии.
     Радуйтеся, Александре Невский и Андрее Боголюбский, Георгие и Глебе, Владимирстии чудотворцы, веры ревнителие и защитницы.
     Радуйся, мучениче Авраамие Болгарский, в казни пострадавый за Христа и град Владимир украсивый.
     Радуйся, Данииле, града Москвы покровителю, родительскаго благочестия наследниче.
     Радуйтеся, Арсение, святителю Тверский, княже Михаиле и Анно, Кашинстии чудотворцы.
     Радуйтеся, святии вси в земли Российстей просиявшии.

Кондак 7

      Хотяще спасение вечное улучити, святии скорбным и тесным путем Христу последоваша и Единому Богу угождати потщишася, и ныне, лицем к лицу Того во славе зряще, воспевают Ему: Аллилуиа.

Икос 7

      Достойныя светильники православную веру и Церковь укрепляющыя, зрим вся святыя наша: своими бо прославлении Творца утверждают веру нашу и нас назидают к радению о спасении, ходатайствующе за нас пред Богом, да благодарне вопием им:
     Радуйся, Петре, великий святителю, первопрестольниче Московский.
     Радуйся, Алексие святителю, наш драгий просветителю, горячий ходатаю свобождения земли Русския и всего Православия достойная похвало.
     Радуйся, Ионо, паствы православныя наставниче и предстателю.
     Радуйся, Филиппе, царя неистовства обличивый и люте убиенный.
     Радуйся, священномучениче патриарше Ермогене, прославлению Казанския иконы Богоматере послуживый и за веру православную душу свою положивый.
     Радуйтеся, Василие, Иоанне и Максиме, Московстии чудотворцы, блаженнии юроди Христа ради, подвижницы неложнии и молитвенницы теплии.
     Радуйтеся, святии вси в земли Российстей просиявшии.

Кондак 8

      Странно есть неверным видети, како сила Божия в немощи совершается: мы же, истинную Христову веру твердо держаще, славе святых наших возрадуемся, и Господу, прославляющему их, непрестанно усердно воспоим: Аллилуиа.

Икос 8

      Вся отложше попечения житейская и самех себе отвергшеся, неуклонно Христу последовасте, присноблаженнии: не может язык изобразити и воспети достойно труды и болезни, терпения и страдания по вере вашея и любви ко Господу, имиже в радость Господа своего вошли есте. Сего ради восхваляем вас сице:
     Радуйтеся, Никоне Радонежский, преподобному Сергию преемниче, и Михее смиренный, и друзи Радонежстии, и Савво Звенигородский, и Стефане Махрищский, и прочии ученицы Сергиевы, многих обителей иноческих устроителие.
     Радуйтеся, Макарие Калязинский и Макарие Унженский Желтоводский, Богу угодившии.
     Радуйтеся, Ниле Столобенский, в молитвах и трудех неусыпно подвизавыйся, и Ниле Сорский, скудость скитскую возлюбивый.
     Радуйся, Иосифе, отче Волоцкий, монастырскаго чина ревнителю.
     Радуйтеся, Пафнутие Боровский, падших исправителю, с Тихоном Калужским чудотворцем, внутри дуба славившим Творца.
     Радуйтеся, святии вси в земли Российстей просиявшии.

Кондак 9

      Всяк подвиг и всяку добродетель, всяко справисте святии, образ христианскаго благочестия людем Творец в вас показал есть: яко да видяще ваша добрая дела, прославят Отца нашего, иже на Небесех, поюще Ему: Аллилуиа.

Икос 9

      Ветий художество превзошедшии святии, благодатную силу веры Христовы житием и подвиги своими всему миру явиша, благодатию Божиею неустанно невидимаго врага попирающе, сего ради зовем:
     Радуйся, Стефане, святителю Пермския страны, в трудех апостольских славно просиявый.
     Радуйтеся, того преемницы Герасиме, Питириме священномучениче и Ионо Усть-Вымский чудотворцы.
     Радуйся, Трифоне преподобне, страну Вятскую от зловерия идольскаго ко Христу приведый.
     Радуйся, Трифоне Печенгский, обители твоея похвало, во тму языческую стран полунощных свет веры Христовы прнесый.
     Радуйтеся, Гурие, Варсонофие и Германе, града Казани и всех окрестных стран светила пресветлая.
     Радуйтеся, равноапостольно просиявшии в Сибири Иннокентие Иркутский, первый епископе, с Софронием премудрым и Иоанном Тобольским, добродетельми вашими вся Сибирския страны озарившии.
     Радуйтеся, святии вси в земли Российстей просиявшии.

Кондак 10

      Спасти хотя люди земли нашея, даровал еси нам Господи, вся святыя в ней просиявшыя, яко образы жития спасительнаго, и яко ходатаи за нас и помощники, да благодаряще Тебе вопием: Аллилуиа.

Икос 10

      Стена есте и заступление всем с верою к вам прибегающым, святии, вам бо дадеся благодать всем требующым полезная даровати: недужным исцеление, в напастех сущым избавление, да воспоем вам таковая:
     Радуйтеся, Всеволоде кроткий и Довмонте, граду Пскову стены необоримыя.
     Радуйтеся, Никандре пустынножителю и Евфросиние преподобная, во стране Псковстей подвизавшиися.
     Радуйся, Прокопие блаженне, град твой Устюг от каменнометныя тучи избавивый.
     Радуйся, Симеоне праведный, Верхотурский молитвенниче и всему Уралу утверждение.
     Радуйтеся, блаженнии юроди Христа ради: Николае Кочанов и Феодоре Новградстии, и Исидоре Ростовский, неправды обличителие и премудрости века сего посрамителие.
     Радуйся, и ты Российстий Златоусте Ростовский святителю Димитрие, жития святых собравый и в назидание всем нам словом твоим живописавый.
     Радуйтеся, святии вси в земли Российстей просиявшии.

Кондак 11

      Пение хвалебное сие благодарственно приимите от нас угодницы Божии: к вам бо прибегающе, упование наше на предстательство и помощь вашу возлагаем, Богу же вопием: Аллилуиа.

Икос 11

      Светозарнии лучи многообразных подвиг ваших, святии, всяку душу христианскую ко умилению и ревности о спасении побуждают, вам же пети подвизают таковая:
     Радуйся, Митрофане, Воронежская похвало, святителю препростый и душеводителю ко Христу премудрый.
     Радуйся, Тихоне, Задонский чудотворче, медоточивыя уста, Христова Евангелиа вещателю сладчайший.
     Радуйся, Феодосие, святителю Черниговский, светильниче преизрядный.
     Радуйся, Иоасафе, молитвенниче Белоградский и благочестия ревнителю великий.
     Радуйся, Питириме, страны Тамбовския предстоятелю и ходатаю пред Богом неленостный.
     Радуйся, и ты, Серафиме преподобне, Саровский подвижниче и Дивеевский начальниче и всем православным предстателю и чудотворче.
     Радуйтеся, святии вси в земли Российстей просиявшии.

Кондак 12

      Благодать Господа нашего Иисуса Христа и любовь Бога и Отца и причастие Святаго Духа испросите нам святии угодницы Божии, да силою и действием Пресвятыя Троицы ограждаеми, избегнем пагубы, ересей и раскола, православно поюще всегда: Аллилуиа.

Икос 12

      Поюще великий и пресветлый полк ваш, вси святии в земли нашей просиявшии, благодарно величаем прославльшаго вас Господа, Егоже милость и прощение нам грешным испросите, да усердно воспеваем вам:
Радуйтеся, святии земли нашея во благочестии Христове подвизавшиися и Церковь Православную в Сибири, Китаи, Японии, Америце и Индии насадившии.
     Радуйтеся, вси благовестнический подвиг своею кровию запечатлевшии и за исповедание Христа душы положившии.
     Радуйтеся, и вси прочии земли нашея святии, зде нами не поименованнии, Богу же знаемии, Церкви явленнии и еще не явленнии, но прсно молящиися о нас.
     Радуйтеся, Нино равноапостольная со множеством православных мученик и преподобных Грузинских.
     Радуйтеся, Апостоли Христови Варфоломее и Симоне Кананите до предел наших дошедшии.
     Радуйся, Клименте Римский, священномучениче, подвиг твой в земли нашей скончавый.
     Радуйся, Афанасие Царьградский, к нам пришедый и во граде Лубнах мощи своя во благовестие нам оставивый.
     Радуйся, и ты, Церкве Российския первоначальниче Андрее, Апостоле Первозванный: на обильный плод первосеяния твоего ныне взираем.
     Радуйтеся, святии вси в земли Российстей просиявшии.

Кондак 13

      О угодницы Божии святии, в земли Российстей просиявшии! Всечестную память вашу ныне любовию празднующе, к вашему молитвенному предстательству и заступлению прибегаем, яко да вашими молитвами избавимся в сем веце от падений греховных, от навета злых человек и напрасныя смерти: и в будущем спасение улучити и вечных благ наслаждения сподобимся, купно с вами ангельски поюще Богу: Аллилуиа.

Этот кондак читается трижды, затем икос 1-й и кондак 1-й

Молитва Всем Святым в земле Российской просиявшим

      О преславнии и всехвальнии угодницы Божии, святии вси в земли Российстей просиявшии! Многая ваша имена и дарования! Священную и всепраздственную память вашу ныне совершающе, величаем возвеличившаго вас Христа Бога нашего: Ему же верою и любовию чрез все житие добре послужисте и многообразными труды и подвиги своими угодисте и славне Его прослависте; святостию жития вашего Церковь Христова укрепляется и украшается, вера православная утверждается, вся земля наша Российская освящается, и мы, яко духовная чада ваша, светло торжествуем: яко воистинну от Восток солнца до Запад, по всей земли нашей хвально имя Господа. Обаче ведуще безмерная беззакония наша, сами себе осуждаем и к вам, яко теплым ходатаем нашым, с любовию прибегаем и смиренно молимся: да вашими благоприятными молитвами, обаче же Своим человеколюбием Христос Бог страждущую страну Российскую от злых безбожник и власти их свободит, и возставит престол православных царей. Верных рабов Своих, в скорби и печали день и нощь вопиющих к Нему, многоболезный вопль услышит, и изведет от погибели живот наш; да дарует всем нам тихое и безмолвное житие в веце сем пожити во всяком благочестии и чистоте, избавляя нас от искушений и соблазнов лукаваго врага, от бед и напастей, и от всякаго зла; на страшнем же суде Своем да сподобит нас деснаго стояния, и наследники Царства Небеснаго да сотворит, яко благословися и прославися пречестное и великолепое имя Отца и Сына и Святаго Духа, ныне и присно, и во веки веков. Аминь.

Молитва иная

      О, преславнии и всехвальнии угодницы Божии, вси святии ведомыя и неведомыя в земле Российстей просиявшии! К вам, яко к теплым ходатаям и предстателям нашим с любовию прибегаем и смиренно молимся: умолите Господа Бога, да вашими благоприятными молитвами, Своим же человеколюбием да дарует нам (имена) тихое и благочестное житие в веце сем пожити, да избавит нас от искушений и соблазнов лукаваго диавола и от бед и напастей, и от всякаго зла; на Страшнем же суде Своем да сподобит нас деснаго стояния и наследники Царствия Своего Небеснаго да сотворит, яко благословися пречестное и великолепое имя Отца и Сына и Святаго Духа, ныне и присно и во веки веков. Аминь.

Тропарь всем святым, в земле Российской просиявшим
Тропарь, глас 8:

      Якоже плод красный Твоего спасительнаго сеяния, земля Российская приносит Ти, Господи, вся святыя, в той пресиявшия. Тех молитвами в мире глубоце Церковь и страну нашу Богородицею соблюди, Многомилостиве.

Величание

      Ублажаем вас, чудотворцы наши славнии, землю Русскую добродетельми вашими озарившии и образ спасения нам светоявленно показавшии.